Ephesians 1

Zande

Jump to: Chapter 2 →

1Pauro, nga ga Yesu Kristo mokedi mbiko gu pai Mbori akpi nyemu he, Fu ga Mbori aboro du Efesa yo nga aidipa Kristo Yesu ni rengo:

2Undahe dú fu roni na zereda be Mbori nga Barani na Gbia Yesu Kristo.

3I sámbua Mbori nga Ba gaani Gbia Yesu Kristo nafu maku fu rani ni gu maku dunduko nga ga toro rogo agu arago du ngbangbaturũ yo rogo Kristo yo,

4a wa ko asia rani ku rogo ko yo mbata zegino nikaenga, ani du ziazia ki zanga siro barangba ko ni nyemuse.

5Mbori aima ringbisa rani sa du ni awirimbuti fu ko, mbiko Yesu Kristo a wa si angba ti gu pai ko akpi nyemu he,

6sa tambua gu taarimo nga ga gu gako undahe ko afu gbua ku ri rani rogo Wiriko yo.

7Bambiko tumori du fu rani rogo Kristo yo mbiko kureko, vu rani ti tiandika, ku sangba gu ũkumuko yo nga ga Mbori undahe,

8gu ko aya si moi pai fu rani ni tatamana na inahe dũ.

9Ko nayugu gu gbugbu pai nga ga gu pai ko akpi nyemu he, ku sangba gu pai yo nangba ti ko ko aya si du rogo ko yo

10sa gu ringbisiringbisi rago ho arago ka diga ni, ka pora ahe apora sa dunduko kina ku rogo Kristo yo, agu ahe du ngbangbaturũ yo na agu ahe du ti kpotosende.

11Kina ku rogo ko yo, ko Mbori amoi rani rogo ko yo a ni ũkumbo, ki ima ringbisa rani ku sangba ga gu ko pai yo, namanga pai dunduko kina ku sangba gu berã yo nga ga gu pai ko akpi nyemu he;

12ya ani du adu sa tambua gako taarimo, agu rani namoi bangirani koyo du Kristo ni mbata.

13Ko gi oni gu pai nga ga rengo rogo ko yo a, nga gu wene pangbanga nga ga gaoni bata, rogo ko yo, wa idi oni pase, i amoi dezire fu roni nga gu Ziazia Toro nga ga kidohe,

14Ziazia Toro tigako nga dezire gaani ũkumbo. Ani nikadia ha dunduko ho Mbori ka tumo gako yo ni, sa tambua gako taarimo.

15Bambiko gere, mi tigimi, wa mi agi pa gu idapa Gbia Yesu du ti roni, oni nayugo ho ayugo fu ga Mbori aboro dũ,

16mi apiriga nga ti tambua he tipa roni, nigumba pa roni rogo gi kpe yo te;

17ya ga gaani Gbia Yesu Kristo Mbori, nga Ba taarimo, ko fu toro tatamana na yugoti fu roni sa ina pa ko.

18Bangiri kpotoroni yo ha, oni ini gu maabangirise du ti gako yambahe, na gu ũkumuko du ti gu taarimo nga ga gako ũkumbo du rogo gako aboro yo,

19na gu babakere gako tandu du sa agu rani naida pase, ku sangba gu mangapai yo nga ga gu nyaka du ti gako tandu.

20Si nga gu ko amangi ti Kristo ho ko azingisi ko ni be kpio dagba akangba. Mbori ki ya ko sungu pati kumbabeko rogo agu arago du ngbangbaturũ yo,

21tuturũ ri azogoaboro dũ, na asia pa pai, na tandu, na kindo na agu arimo dú i ayamba, kina rogo gi zegino sa te re, rogo gu a nikaye.

22Ko amoi ahe dunduko ku tii nduko, ki fu ko ko du ku ri ahedunduko fu kanisa

23nga boroko, nga gu hisi ko, nga gu ko hisi ahe dunduko.

Jump to: Chapter 2 →