Ephesians 3

Zande

← Chapter 2 Jump to: Chapter 4 →

1Bambiko gere, mi nga Pauro, nga ga Kristo Yesu kisikisi boro tipa roni nga aGendiria―

2si ngia oni gi pa gu mangapai Mbori afu he fere mbiko gako undahe, tipa roni;

3wa ko ayugu gu gbugbu pai fere ni yugoti, wa ke mi he mbata ni guruguru apai.

4Oni ya gedi he, oni ini gi rugati na gu gbugbu pai nga ga Kristo;

5gu i ayugo nga ha fu wiri aboro ni kura arago, wa du he ni yuguyugu he awere fu gako ziazia amokedi na anebi rogo Toro yo ya.

6Si nga aGendiria nga adikumbo a, na apa boroko, na adikidohe rogo Kristo Yesu yo mbiko wene pangbanga.

7Si i amoi re ni ni moyambu, ku sangba gu gamunihe yo nga gu ga Mbori undahe i afu fere ku sangba gu mangapai yo nga ga gako tandu.

8Wa pa re umba aumba susi kura ga Mbori aboro dũ, ono Mbori afu gi undahe fere re, mi tungusi pa gu gasigasi ũkumuko nga ga Kristo fu aGendiria;

9ki ya aboro bi gu he nga manga gu gbugbu pai i naaoka aoka rogo Mbori yo kina yo rago aenge ni, gu ko nafu ahe dũ;

10sa yugo gu baru tatamana nga ga Mbori awere mbiko kanisa fu azogoaboro na aasiapapai rogo agu arago du ngbangbaturũ yo.

11Gere adu ku sangba gu nyenye berã yo ko aberẽ rogo Kristo Yesu yo nga gaani Gbia.

12Ko du ani rogo ko yo zukazuka na gene ni nyanyaki idapase mbiko ida ani pa ko.

13Si du mi akpara ti ni ya ka oni zére nga be gi rungo tipa roni ya, si nga gaoni taarimo.

14Bambiko gere mi akuka ti ni fu Ba,

15ko yambu rimo vungu aenge yo du ko ni dunduko ngbangbaturũ yo na rogo kpoto sende,

16ko ídi fu roni, ku sangba gu ũkumuko yo nga ga gako taarimo, ya oni nyaki ni tandu be gako Toro kpoto yo.

17Kristo nyé kpotoroni yo mbiko idapase; oni ta dú na nduroni nyanyaki ni duadua roni rogo nyemuse yo.

18Oni ki ninyaki anyaka ka ruga tironi na gu he nga pati gu ga Kristo nyemuse nasusi inahe na bagizaha, na basonaha na badunguraha,

19ki ini he, na ga Mbori aboro dunduko, oni hi ahi ni ga Mbori hibepai.

20Were, fu gu ko ka mangi pai amanga bakere gbe si ki moi pai susi gu ani aõ na gu ani aberã dunduko, ku sangba gu tandu yo namanga pai kpotorani yo,

21ko dú taarimo fu ko rogo kanisa na rogo Kristo Yesu yo rogo arago dũ nye anye kindi. Amina.

← Chapter 2 Jump to: Chapter 4 →