Genesis 30

Zande

← Chapter 29 Jump to: Chapter 31 →

1Ho Raere abi he ni, ya ri abatika nga agude fu Yakoba te, Raere ki nikpi unvuruari. Ri ki ya fu Yakoba, “Mo fú agude fere, mi ka kpi!”

2Ga Yakoba zinga ki rungudi arunguda kuti Raere, ko ki ya, “Mi nga Mbori, nga gu ko naka na mobara ku rukumbu yo be ro?”

3Ri ki ya, “Mo ngére, gi kanga nga Bira; mo ndú fuo ri, ri batika ku auru arukusure, mi ki bi agude mbiko ri.”

4Ri ki fu Bira fu ko nangia gari kanga ni diako; Yakoba ki ndu fuo ri.

5Bira ki du na mobara ki batika kumbagude fu Yakoba.

6Raere ki ya, “Mbori sapu gi ngbanga, ki gi fugore a, ki fu kumbagude fere.” Si du ri ayambu rimoko ti ni nga Dana.

7Bira nga ga Raere kanga ki du na mobara berewe, ki batika ue kumbagude fu Yakoba.

8Raere ki ya, “Mi so vura ni bakere he na unvuruami, mi ki di be ri”; ri ki yambu rimoko nga Nafatari.

9Ho Rea aini he ni ya ri mbu batika, ri ki fu Zirepa, gari kanga, fu Yakoba ni diako.

10Zirepa nga ga Rea kanga, ki batika kumbagude fu Yakoba.

11Rea ki ya, “Mamu du!” Ri ki yambu rimoko nga Gada.

12Zirepa ga Rea kanga ki batika ue kumbagude fu Yakoba.

13Rea ki ya, “Mi na ngbarago! bambiko ade nikaya ti re boro ngbarago nga mi”; ri ki yambu rimoko nga Asera.

14Ti regbo ke zende ahe, Rubena ki ndu ku nvuo yo ki bi zuzu ngua yo du wa rindiseke, ki ndu na ni koyo du nako ni nangia Rea. Raere ki ya fu Rea, “Mi nakpara akpara foro, mo fú nga bete ga wiro rindiseke fere.”

15Rea ki ya fu ri, “Toni pai nga ha ya mo adi kumbami be re, mo ki nikpi nyemu ka dia ga wire rindiseke a?” Raere ki ya, “Ko ará yo du mo ni ni gi yuru re tipa ga wiro rindiseke.”

16Ho Yakoba ayega ni ati yo nyemu, Rea ki kuru ka gbia ko, ki ya, “Mo ka ra yo du mi ni areme; bambiko mi ngbe ro na ga wire rindiseke.” Ko ki ndu fuo ri ni gu yuru re.

17Mbori ki dege tuko ki gi pa Rea, ri ki du na mobara, ki batika bisue kumbagude fu Yakoba.

18Rea ki ya, “Mbori fu gi mosoro fere wa mi afu gi kanga fu kumbami”; ri ki yambu rimoko nga Yisasakara.

19Rea ki du na mobara berewe, ki batika sita kumbagude fu Yakoba;

20Rea ki ya, “Mbori fu wene aũgasade fere; awere kumbami nikanye na mi, wa batika mi akumbagude sita fu ko”; ri ki yambu rimoko nga Zeburuna.

21Fuo gure ri ki batika degude, ki yambu rimori nga Dina.

22Mbori ki tingidi pa Raere, Mbori ki gi pa ri ki za ngba rukumburi.

23Ri ki du na mobara ki batika kumbagude, ri ki ya, “Mbori di gi zee ku sa yo”;

24ri ki yambu rimoko nga Yosefa, ki ya, “Yekova fu kura kumbagude fere!”

25Ho Raere abatika Yosefa ni, Yakoba ki ya fu Rabana, “Mo ásia re, mi gá ku kpurani yo ku rogo gi ringara.

26Mo fú adiare fere na awire nga agu yo mi amangi sunge foro tipa yo, mi ki ga; bambiko mo ima ina pa gu gi sunge mi amangi he foro.”

27Rabana ki ya fu ko, “Si ngia ngba mi angba bangiro, mo súngu mbata, bambiko mi bi he rogo soroka ya Yekova nafu maku fere mbiko ro.

28Mo ríngbisi mosoro ga sunge fere, mi ki fu he foro.”

29Yakoba ki ya fu ko, “Mo ini he waĩ mi namanga foro, na waĩ du pa gamo abagara mbiko re.

30Mbata fu ye mi, ahe adu be ro kina toni. Si ki moi pai ki du ni badungu he; Yekova ki nifu maku foro ho mi anindu ku ho ni. Awere mi adúngura ahe tipa gimi aborokporo ni gini rago?”

31Rabana ki ya, “Gini he mi ka afu foro?” Yakoba ki ya, “Ka mo fú nga ahe fere ya; ono ka mo mángi gi pai fere re, mi aríga ga rimbasa anya ariga berewe ki nibanda ra;

32Mi andú dagba rimbasa gamo anya dunduko areme, ki rogodi agu ra du ni mbakambaka ra, na agu ra du ni kenekene ra, na agu ra du ni bibiri ra dagba akandoro, na agu ra du ni kenekene ra na agu ra du ni mbakambaka ra dagba ameme; ami ki du ni mosoro gi sunge.

33Si du gi rurupai ka yugo pai ti ni ku mbata yo tipa re, ho mo ka ye ni ka wisiga pa mosoro gi sunge. Agu ra adu nga ni mbakambaka ra ya na agu ra adu nga ni kenekene ra dagba ameme ya, na agu ra adu nga ni bibiri ra dagba akandoro ya, ka i bí ngbatunga ra be re i sá pa ra fere ni ũdĩ.”

34Rabana ki ya, “Ngba ha angba, mi idi kina sangbaro.”

35Ni kina gu uru re Rabana ki rogodi abaameme nga agu ra nadu ni gbafiogbafio ra na kenekene ra, na anaameme dunduko nga agu ra nadu ni mbakambaka ra, na kenekene ra, na agu ra dunduko nadu na pusi he ti kpotora, na agu ra dunduko nadu ni bibiri ra dagba akandoro, ki fu ra ku be awiriko i nibanda ra.

36Ko ki moi dagba rago dagba yo na Yakoba wa ka boro nungu tipa rame biata: Yakoba ki nirigi yangara ga Rabana rimbasa anya.

37Yakoba ki dewe vovo abe gu ngua nga ribine, na gu wiri bawirisangu na gu wiri bagbodi ki sesege he na mbarõ ti ni, ki da ti pusi pasioho.

38Agu abengua ko asesege he ko ki moi he ku rogo akurungbu baranbga akandoro, nga agu akurungbu nangia ga ime, ho akandoro naye ka mbira ime ni. Na wa ami anadia vuse ho ami ambira ime ni,

39akandoro ki di vuse ho ami aye ni ka mbira ime, ki batika agu ra du ni gbafiogbafio ra, agu ra du ni mbakambaka ra na agu ra du ni kenekene ra a.

40Yakoba ki kparaka awiri akandoro akia, ki kpamia rimbasa akandoro kuti agu ra nadu gbafiogbafio, na agu ra nadu ni bibiri ra dagba ga Rabana rimbasa akandoro. Ko ki kparaka gako rimbasa akandoro akia, ka ko akpamia nga ra kuti ga Rabana rimbasa akandoro ya.

41Ho agu anya nadu ni nyanyaki ra anidi vuse ni, Yakoba animoi angua barangba ra ku rogo akurungbu yo, ya ami nidí vuse dagba angua.

42Ono ho rimbasa akandoro anidu ni ni onyaonya ra ko anamaa nga ha ku rogo akurungbu yo te; were onyaonya ra ki nidu ni ga Rabana ra, nyanyaki ra ki nidu ni ga Yakoba ra.

43Gi kumba re ki kumuko akumuko ni bakere he, ki du na kikindigi rimbasa akandoro be ko, na agu amoyambu nga ade nga agu amoyambu nga akumba, na akameri na adongi a.

← Chapter 29 Jump to: Chapter 31 →