Genesis 32

Zande

← Chapter 31 Jump to: Chapter 33 →

1Yakoba ki nindu ngba gako gene ga Mbori amaraika ki gbia ko.

2Ho Yakoba abi yo ni ko ki ya, “Agi yo re nga ga Mbori rikavura!” Ko ki yambu rimo gu ba re nga Manaima.

3Yakoba ki kedi asunge ku mbata yo koyo du Esau ni nangia unvuruako, ku ringara Seira yo ku rogo gu rago nangia ga Edome.

4Ko ki ta ruga yo niya, “Oni yá fu Esau nga bairare wẽ: ‘Wo poi ga moyambu nga Yakoba, mi asungu ku Rabana yo daku awere;

5abaabagara ki du be re, na adongi, na rimbasa akandoro, na amoyambu nga akumba na amoyambu nga ade. Mi kedi asunge ka gumba ha fu bairare ya mi bí zereda be ro.’ ”

6Asunge ki karaga tiyo koyo du Yakoba ni, ki ya, “Ani da bi unvuruamo nga Esau, ko naye ka gbia ro, na aboro 400 fuo ko.”

7Yakoba ki nigunde agunde ki du na rungo gbe; ko ki kparaka agu aboro nadu na ko ku rogo rimbasa ue, na rimbasa akandoro, na rimbasa abagara, na akameri a.

8Ko ki ya. “Ka Esau gbia gu rimbasa sa ki so vura na yo, gu rimbasa ka nye ki bati.”

9Yakoba ki ya, “Ako Mbori, nga ga buba Mbori nga Abarayama, nga ga buba Mbori a nga Yisaka, Ako Yekova, nga gu ko naaya fere, ‘Mo káraga tiro ku rogo gaoni ringara yo, fuo agumero, mi amánga pa ro wenengaĩ,’

10mi arengba nga na kina gu toni he dagba gamo ainapai dunduko na gu rengbe dunduko yugu mo ho fu ga moyambu te, bambiko mi asi gi Yaradene re na kina gi ngbondo be re; awere mi wa rimbasa aboro ue.

11Mi nakpara foro mo bátasi re be Esau nga unvuruami, bambiko mi nagunde agunde be ko, ko ka ye ka so vura na mi ka imo rani na naagude na agude.

12Na wa mo aya, ‘Ni rengo mi amánga pa ro wenengaĩ, mi asá ngbatungaro wa kina ngume baime, nga gu ka i ageda nga ha mbiko nge he ya.’ ”

13Ko ki ra kina yo ni gu yuru re, ko ki rogodi bete agu ahe nadu be ko ni gamahe tipa unvuruako nangia Esau,

14nga anaameme 200, na abara 20, anaakandoro 200, na abara 20 a,

15na akameri nga agu ra nafu mamura 30 na awira a, anaabagara 40 na abara bawe, anaadongi 20 na abara bawe.

16Ko ki fuku ra ku be gako amoyambu ni arimbasara ni ba sa sa, ki ya fu gako amoyambu wẽ, “Oni súsi ku mbata yo fere, ki moi arimbasara na dagba.”

17Ko ki ta ruga barumbatayo, niya, “Ho Esau nga unvuruami ka ngbisa ro ni, ki sana ro niya, ‘Vuru da nga mo? Oni nandu ku wari? Ga da ra nga agu ra du barangba ro re?’

18Mo ki ya, ‘Ga gamo moyambu ra du nga Yakoba; kedi ko ra ni gamahe fu bairare nga Esau; mo ngére, ko du sa yo naye a.’ ”

19Were Yakoba ki ta ruga gu ue ni, na gu biata ni, na agu yo dunduko naapeka arimbasa anya, niya, “Gere nga gu pai oni ka gumba ha fu Esau ho oni ka ngbisa ko ni,

20oni ki ya a, ‘Mo ngére, ga moyambu nga Yakoba ko du sa yo naye.’ ” Bambiko ko niya wẽ, “Mi azéresa ngbaduko na gu gamahe ngbe fere mbata yo. Fuo gure mi abi kpakpuko; si ngia ko adía re ku gume.”

21Si du gamahe asusi ti ni ku mbata yo fu ko; ko tigako ki ra ni gu yuru re kina bataya yo.

22Yakoba ki guari ni kina gu yuru re, ki rogo adiako ue, na gako akanga ue nangia ade, na awiriko 11, ki si gu di nga Yaboka.

23Ko ki rogo yo, ko ki kedi yo i si di na gako ahe be yo.

24Yakoba ki du yo ni sa ko; kumba ki ta kpata na ko dati kina girarago.

25Ho ko abi he ni ya ko adia nga be Yakoba te, ko ki zadi gbungbuko. Gbungbu Yakoba ki wo, wa ko ata kpata na ko.

26Kumba ki ya, “Mo ídi he mi gá, bambiko rago nagira.” Ono Yakoba ki ya, “Mi aída nga mo gá te, kina gu ka mo fú maku fere mbata.”

27Ko ki ya fu ko, “Rimoro nga da?” Ko ki ya, “Yakoba.”

28Ko ki ya, “I ayámba nga rimoro nga Yakoba berewe te, ono Yisaraere, bambiko mo ata kpata na Mbori na aboro a, ki di be yo.”

29Yakoba ki sana ko, ki ya, “Mi nazungadi ro, mo yámbu nga rimoro fere.” Ono ko ki ya, “Mo nasana re tipa rimore tipagine?” Ko ki fu maku fu ko kina ho.

30Yakoba ki yambu rimo gu ba re nga Penuere, bambiko ko aya, “Mi bi kpakpu Mbori ni kina bangire, ki du ni ungare kindi.”

31Wa ko asusa Penuere uru ki nisikpa ku ari, ko ki niterenge aterenga mbiko gbungbuko.

32Si du awiri aYisaraere naari nga gu gbaga gbungbuse du ti mboso gbungbuse yo ti ni ya, daku awere, bambiko ko azadi gbungbu Yakoba ti gbaga mboso gbungbuko.

← Chapter 31 Jump to: Chapter 33 →