Genesis 39

Zande

← Chapter 38 Jump to: Chapter 40 →

1I ki ye na Yosefa ku Ezipeta yo, Potifaro nangia boro Ezipeta, ga Faro barumbatayo nangia barutiri ababandarago ki ngbe ko be agu aYisamaere naye na ko koyo.

2Yekova adu na Yosefa, ko ki du ni uu boro; ko ki du rogo ga bairako bambu nangia boro Ezipeta.

3Bairako ki bi he ya Yekova du na ko, agu ahe dunduko ko anamanga ha Yekova nanausa ha ku be ko.

4Yosefa ki ngba angba bangiri bairako, ko ki nimangi pa ko, bairako ki sa ko ni babiapai ku ri gako aborokporo, na agu ahe nadu be ko ko aasia pa ha fu kina ko dunduko.

5Si ki ta du wa gere, fuo maa yo ko ni babiapai ku ri gako kporo na agu ahe nadu be ko dunduko ga Yekova maku ki du ku ri ga gu boro Ezipeta kporo re mbiko Yosefa ga Yekova maku ki du ku ri agu ahe dunduko nadu be ko, ku kporo yo na ku ati yo a.

6Ko ki mbu pa agu ahe dunduko nadu be ko ku be Yosefa; ka ko aberã nga pa agu ahe nadu be ko ya, kina pa gu riahe ko anari he. Yosefa adu adu mbuyumbuyu, ni betedi boro.

7Si ki ta du wa gere, fuo agi apai re, dia bairako ki ngana Yosefa ni sanza bangirise, ri ki ya, “Mo rá na mi.”

8Ono ko ki ka aka, ki ya fu dia bairako, “Mo ngére, bairare aberã nga pa agu ahe du dimo yo du mi ni te, ko ambu pa gako ahe dunduko ku be re;

9du nga ko ni bakere ko rogo gi kporo re ki susi re te; a nga he sa ko aka na ni be re te ono kina ro, bambiko mo nga diako; waĩ tie ka mi mangi gi bakere gbigbitapai re, ki ingi pai kuti Mbori?”

10Si ki ta du wa gere wa ri adarã Yosefa na uru na uru, ko aida nga gari pai ka ra na ri na ka du na ri a te.

11Ono ni gu uru, ho ko arimi ni ku dimo yo ka manga gako sunge, boro adu nga ho dagba aborokporo te,

12ri ki zi ko ti gako roko, ki ya. “Mo rá na mi.” Ko ki mbu gako roko ku be ri ki oro, ki gba ku zegi yo.

13Ho ri abi he ni ya ko mbu gako roko ku be ri ki gba ku zegi yo,

14ri ki yambu gari aborokporo ki ya fu yo. “Oni bí, Potifaro aye na boro nga Ebere kono du ani ni ko nisawia rani. Ko niye ka ra na mi, mi ki kpari ni bakere fugo.

15Ho ko nigi he ni ya mi poi ku ari ni bakere fugo, ko ki mbu gako roko ku be re ki gba ku zegi yo.”

16Ri ki ka kuti gako roko daho bairako ayega ni ku kporo yo.

17Ri ki peke pai fu ko kuti agi apai re, ki ya, “Gu moyambu nga boro Ebere, nga gu ko mo aye na ko fu rani, ko niye fuo re ka sawia re;

18si nidu wa gere, wa mi ni poi ku ari ni bakere fugo, ko ki mbu gako roko ku be re, ki gba ku zegi yo.”

19Fuo gere, ho bairako agi agi apai ni re ngba diako, nga gu ri ape he fu ko, niya, “Wo ga moyambu nimangi re re,” gako zinga ki rungudi.

20Baira Yosefa ki zi ko, ki ba ko ku bambukisa yo, ku ho i naakisa ga bakindo zizi aboro ku ho ni. Ko ki du yo bambukisa yo.

21Ono Yekova adu na Yosefa, ko ki yugu inapai fu ko, ki mbakadi pa gako pai ku bangiri babanda bambukisa.

22Babanda bambukisa ki asia pa bánda kisikisi aboro ku be Yosefa, nga agu yo nadu bambukisa yo dunduko. Agu apai i anamanga ha yo, kina ko nangia bamangi pa ha.

23Babanda bambukisa aberã nga pa agu ahe nadu tii be Yosefa wa sa te, bambiko Yekova adu na ko; agu apai dunduko ko anamanga ha, Yekova anausa ha.

← Chapter 38 Jump to: Chapter 40 →