Genesis 40

Zande

← Chapter 39 Jump to: Chapter 41 →

1Fuo agi apai re, ga bakindo Ezipeta bafuriahe na gako bagbindiriahe azingi kuti bairayo nangia bakindo Ezipeta.

2Faro ki zingi kuti gako abarumbatayo ue, kuti baira abafuriahe na kuti baira abagbindiriahe.

3Ko ki ba yo ku rogo gu vuru bambu yo nangia ga barutiri ababandarago, ku rogo gu bambukisa yo Yosefa adu ni ni kisikisi ko.

4Gu barutiri ababandarago re ki fu yo ku be Yosefa, ko ki nimangi pa yo; i ki ima ngbutuko ku bambukisa yo.

5Ga bakindo Ezipeta bafuriahe na gako bagbindiriahe nadu ni kisikisi yo ku bambukisa yo, i ki mongo rari musumo wa du yo ue ― ni kina gu yuru sa ― sangba gayo musumo ki du ni ba sa sa a.

6Ho Yosefa aye ni fuo yo wiso ko ki bi yo, i nirungo arungo.

7Ko ki sana ga Faro abarumbatayo nadu na ko bambukisa yo, rogo ga bairako bambu, ki ya, “Tipagine oni arungo arungo ti ni areme?”

8I ki ya fu ko. “Ani nirari musumo, a nga boro ho sa ka yugu sangbaha fu rani te.” Yosefa ki ya fu yo, “A nga kina ga Mbori pai nga yugo sangba musumo te? Mi nazungadi roni oni gúmba nga pa ha fere.”

9Baira abafuriahe ki gumba gako musumo fu Yosefa, ki ya fu ko, “Mo ngére, rogo gi musumo, bakakue nidu bara bangire.

10Ti bakakue behe nidu ti ni biata; si ki wiri wa si funa, mbumbudaha ki zara, kpuraha ki kusi zamba zuzu bakakue.

11Ga Faro inga ki du be re; mi ki di gu zuzu bakakue re ki piri he ku rogo ga Faro inga, mi ki fu he ku be Faro.”

12Yosefa ki ya fu ko, “Gere nga sangbaha: gu behe nidu biata si nga rame biata;

13rame koyo biata Faro ki kusi ro, ki karaga ro ku pati ga sunge; mo ki nifu ga Faro inga ku be ko, wa si nidu mbata ho mo adu ni ni gako bafuriahe.

14Ono mo tíngidi pa re, ho pai ka ngba ni foro, mi nazungadi ro, mo yúgu inapai fere, ki tingidi pa re fu Faro, ki kusi re rogo gi bambu re.

15Bambiko i atuka re atuka ni rengo rogo gu ringara nga ga aEbere. Mi amanga nga pai no i aba re ti ni ku bambukisa no a te.”

16Ho baira abagbindiriahe abi he ni ya ngba sangbaha angba, ko ki ya fu Yosefa, “Mi nirari musumo a wo: Mo ngére, abaga nidu rire biata na ngbatunga kpokuta rogo ho,

17rogo gu baga nidu ku ari dungu ngbatunga zozo riahe nidu yo tipa Faro. Azire ki niri he rogo baga ku rire.”

18Yosefa ki karaga ha ki ya, “Gere nga sangbaha: agu abaga nidu biata si nga rame biata;

19rame koyo biata Faro ki kusi ro ― ka asi ro ti ngua; azire ki riti pasioro ti ro.”

20Fuo gere ti biata rame nga gu nangia rago tingida pa rago batika Faro, ko ki mangi pumbo fu avuruko dunduko. Ko ki kusi baira abafuriahe na baira abagbindiriahe ku dagba gako amoyambu yo.

21Ko ki karaga baira abafuriahe sa gako sunge berewe, ko ki nifu inga ku be Faro.

22Ono ko aasi baira abagbindiriahe a wa Yosefa ayugu pa ha fu yo.

23Ono baira abafuriahe atingida nga pa Yosefa te, bangiriko ago ti ko.

← Chapter 39 Jump to: Chapter 41 →