Galatians 1

Ahirani (आहिराणी नवा करार) - No Year

Jump to: Chapter 2 →

1मी प्रेषित पौल, गलतिया प्रांत नि मंडळीस्ले हय पत्र लिखस, आणि सर्वा भावू ज्या मना संगे शेतस तेस्ना कळून नमस्कार करस. मी पौल, नईत माणसस कळून आणि नईत माणसस्ना द्वारे प्रेषित बनेल शे, पण येशु ख्रिस्त आणि परमेश्वर बाप ना द्वारे, जेनी तेले मरेल मधून परत जित्ता करेल शे, प्रेषित बनेल शे.

3मी प्रार्थना करस कि, परमेश्वर बाप आणि आमना प्रभु येशु ख्रिस्त ना कळून तुमले कृपा आणि शांती भेटत राहो.

4ख्रिस्त येशु नि आमना पाप साठे आपला जीवन ले बलिदान करी टाक, एनासाठे कि आमना परमेश्वर आणि बाप नि ईच्छा नुसार आमले ह्या वर्तमान वाईट जग पासून सोळाईन.

5मी प्रार्थना करस कि तेनी स्तुती आणि बळाई युगानयुग होत राहो. आमेन.

6मी आश्चर्य चकित शे कि ज्या परमेश्वर नि तुमले ख्रिस्त नि कृपा ना द्वारे बलाव तेना कण तुमी इतला जल्दी फिरीसन एक आल्लग प्रकार नि शिक्षा ना अनुसरण कराले लागेल शेतस.

7फक्त एकच खरी सुवार्ता शे, पण काही लोक तुमना दिमाक ले भ्रम मा टाकीसन ख्रिस्त ना संदेश ले बीगाळाले देखतस.

8पण कदी आमना मधून कोणी एक व स्वर्ग मधून खाले उतरेल कोणता स्वर्गदूत बी तुमले त्या सुवार्ता ले सोळीसन जी आमनी तुमले आयकाळेल शे. कोणती दुसरीच प्रकार नि शिक्षा तुमले देस आणि त्या शिक्षा ना बारामा हवू दावा करस कि हईच सुवार्ता शे, त परमेश्वर तेले श्राप देवो.

9जस आमी पहिले सांगी दियेल शेतस, तसच मी आते परत सांगस, कि ती सुवार्ता ले सोळीसन जिले तुमी स्वीकार करेल शेतस. कदी कोणी दुसराच प्रकार नि शिक्षा तुमले देस आणि त्या शिक्षा ना बारामा हय दावा करस कि हईच सुवार्ता शे, त परमेश्वर तेले श्राप देवो.

10स्पष्ट रूप कण मनी माणसस्ले नई पण परमेश्वर ले खुश करानी ईच्छा शे. कारण कि जर मी आते लोंग लोकस्ले खुश करत ऱ्हातु, त मी ख्रिस्त ना दास बनेल नई ऱ्हातु.

11ओ विश्वासी भावूसहोण, मनी तुमले सांगानी ईच्छा शे, कि जी सुवार्ता मनी आयकाळेल शे, ती माणसस्ना विचारस्वर आधारित नई शे.

12कारण कि ती मले आजोबास पासून नई भेटणी आणि नईत कोणी धार्मिक शिक्षक नि मले शिकाळेल शे, पण येशु ख्रिस्त नि ती चांगली बातमी ले मनावर प्रगट करेल शे.

13तुमी आयकी लीयेल शेतस कि मी कोणत्या प्रकारे यहुदी ना नियम ना पालन कऱ्या करत होतु, आणि मी परमेश्वर नि मंडळीस्ना विश्वासीस्ले गैरा त्रास देत होतु आणि नाश कराना प्रयत्न करत होतु.

14आणि मी यहुदी धर्म मा आपला वय ना यहुदी जोळीदारस्तून जास्त आपला आजोबास्नि शिक्षास्ना अभ्यास कराले आणि तेस्नी आदन्यास्ले माना साठे गैरा उत्सुक राहात होतु.

15पण परमेश्वर नि आपली कृपा कण, मना जल्म होवाना पहिलेच मले निवाळी लीध आणि तेनी सेवा साठे मले बलाव. आणि जव तेनी निर्णय लीधा,

16कि आपला पोऱ्या ले मनावर प्रगट करो, एनासाठे कि मी बिगर यहुदीस्मा तेनी सुवार्ता ना प्रचार करू. त मी ह्या बारामा सल्ला लेवाले कोणा जोळे नई ग्यू.

17ज्या मले प्रेषित बनाना पहिले प्रेषित होतात, तेस्ले भेटासाठे मी यरूशलेम शहर ले नई ग्यू. पण मी लगेच अरब देश ले चालना ग्यू आणि नंतर दमिश्क नगर ले परती उनू.

18मंग तीन साल नंतर मी केफा (पेत्र) ले भेट करासाठे यरूशलेम शहर ले ग्यू, आणि तेना जोळे पंधरा दिन लगून ऱ्हायनु.

19पण तेना नंतर कदी मी कोणता प्रेषित ले भेटेल शे त फक्त प्रभु ना भावू याकोब संगे.

20परमेश्वर ले माहिती शे कि ज्या गोष्टी मी तुमले लिखी ऱ्हायनु त्या खऱ्या शेतस, खोट्या नईत.

21एना नंतर मी सिरीया प्रांत आणि किलकिया ना प्रांतस्मा उनू.

22पण यहूदीया प्रांत मा राहाणाऱ्या मंडळीस्ना लोकस्नी ज्या आते ख्रिस्त मा शेतस मले व्यक्तिगत रूप कण नई देखेल होतात.

23पण त्या मना बारामा हईच आयकत होतात, कि एक टाईम ले जो आमले त्रास देणार होता, एनातून पहिले तो लोकस्ले ख्रिस्त वर विश्वास कराले रोकाना प्रयत्न करत होता, आते तोच त्या विश्वास ना प्रचार करी ऱ्हायना.

24एनासाठे त्या मना बारमा परमेश्वर नि महिमा कऱ्या करत होतात कारण कि तेनी मले त्रास देणार पासून ख्रिस्त ना अनुसरण करणार ना रूप मा बदली दियेल होता.

Jump to: Chapter 2 →