Galatians 3

Ahirani (आहिराणी नवा करार) - No Year

← Chapter 2 Jump to: Chapter 4 →

1ओ बिगर बुद्धीस्ना गलती शहर ना राहाणारा विश्वासीसहोण, कोणी तुमना डोया वर परदा टाकी दिधा? मनी तुमले स्पष्ट रूप कण येशु ख्रिस्त ना क्रूस वर मराणा कारण ले सांग.

2मले तुमना पासून फक्त हईच समजी लेन शे, कि तुमले जो पवित्र आत्मा भेटणा तो काय मोशे ना नियम ना पालन करा मुळे भेटणा, कि सुवार्ता ले आयका मुळे आणि तेनावर विश्वास करा मुळे भेटणा?

3काय तुमी असा बिगर बुद्धी ना शेतस, कि आत्मा नि रीत वर सुरुवात करीसन आते शरीर ना रीत वर समाप्ती करशात?

4काय तुमी जो इतला दुख उचलनात तो व्यर्थ शे? मी आशा करस कि ते व्यर्थ नई होत.

5परमेश्वर नि तुमले पवित्र आत्मा विपुलता कण दिधा आणि तुमना मधमा चिन्ह-चमत्कार करात. पण काय तेनी हय सर्व एनासाठे कर कारण कि तुमी मोशे ना नियम ना पालन करतस? व एनासाठे कि तुमनी ख्रिस्त ना बारामा आयक आणि तेनावर विश्वास कर?

6आते अब्राहाम नाच उदाहरण ले लिल्या, “अब्राहाम नि त परमेश्वर वर विश्वास कर आणि हय तेना साठे धार्मिकता मोजामा उणी.”

7त तुमी हय समजी ल्या, कि ज्या लोक अब्राहाम ना सारखा परमेश्वर वर विश्वास करतस, त्या अब्राहाम ना पोर शेतस.

8आणि परमेश्वर ना पुस्तक मा गैरा टाईम पहिले हय लिखामा एयेल होत कि परमेश्वर बिगर यहुदीस्ले विश्वास कण धर्मी ठराईन, आणि पवित्र शास्त्र ना द्वारे अब्राहाम ले पहिलेच हय सुवार्ता देवामा उणी, कि “तुना मा सर्वा जातीस्ले आशीर्वाद भेटीन.”

9त ज्या अब्राहाम ना सारखा परमेश्वर वर विश्वास करतस, त्या विश्वासीस्ले अब्राहाम ना संगे आशीर्वाद भेटस.

10एनासाठे जीतला लोक मोशे ना नियम ना कामस्वर विश्वास ठेवतस, त्या सर्वा परमेश्वर ना श्राप ना आधीन मा शेतस, कारण कि लिखेल शे, “जो कोणी मोशे ना नियम नि पुस्तक मा लिखेल सर्व्या गोष्टीस्ले करामा स्थिर नई राहत, तो श्रापित शे.”

11पण हय स्पष्ट शे, कि मोशे ना नियम ना व्दारे परमेश्वर समोर कोणी धर्मी नई ठरत कारण कि धर्मी झन विश्वास कण जित्ता राहीन.

12पण मोशे ना नियम ना विश्वास संगे काहीच संबंध नई, पण “जो तेस्ले मानीन, तो तेस्ना मुळे जित्ता राहीन.”

13पण ख्रिस्त नि आमले मोशे ना नियम ना श्रापस पासून सोळाई लीयेल शे. जव ख्रिस्त क्रूस वर मरणा, त तेनी आमना पापस्ना श्रापस्ले आपला वर लीलीधा. कारण कि पवित्र शास्त्र मा लिखेल शे, “जो कोणी झाळ वर लटकावा मा येस तो श्रापित शे.”

14ख्रिस्त नि हय एनासाठे कर, कि अब्राहाम ना आशीर्वाद ख्रिस्त येशु मा बिगर यहुदी लगून भीळो, आणि आमी विश्वास ना व्दारे त्या आत्मा ले प्राप्त करोत, जेना करार हुयेल शे.

15ओ विश्वासी भावूसहोण, मी साधारण जीवन ना उदाहरण ले दि ऱ्हायनु, कि माणसस्ना करार बी जो पक्का हुई जास, त नईत कोणी तेले टाइ सकस आणि नईत तेनामा काही वाळावस.

16ह्याच प्रमाणे, करार अब्राहाम ले, आणि तेना वंश ले देवामा उणी, पवित्र शास्त्र मा हय नई लिख, कि “तुना वंशज ले,” जस गैरास्ना बारामा सांगेल शे, पण जस एक ना बारामा कि “तुना वंश ले,” आणि तो ख्रिस्त शे.

17पण जे मी सांगी ऱ्हायनु तेना अर्थ हय शे, कि जो करार परमेश्वर नि पहिले पासून पक्का करेल होता, तेले मोशे ना नियम चार शे तीस साल नंतर ईसन नई टाइ सकत, जेना कण कि प्रतिज्ञा व्यर्थ ठरो.

18जर मिरास ना आधार मोशे ना नियम शे त मिरास करार ना आधार वर होवूच नई सकत. पण परमेश्वर नि अब्राहाम ले हय मिरास फुकट मा दि टाक जो परमेश्वर नि तेले देवानी प्रतिज्ञा करेल होता.

19त मंग मोशे ना नियम ना उद्देश काय ऱ्हायना? मोशे ना नियम त एनासाठे देवामा उना कि लोकस्ले माहिती पळो कि त्या कितला पापी शेतस. पण नियम त त्या वंश ले येवा लगूनच प्रभावशाली ऱ्हायनी, जेले करार देवामा एयेल होता, आणि परमेश्वर नि आपला नियम स्वर्गदूतस्ना द्वारे मोशे ले दिधा जो परमेश्वर आणि लोकस्ना मधमा मध्यस्थ होता.

20मध्यस्थ नि गरज तव पळस जव एक व दोन तून जास्त लोकस्ना मधमा करार करामा येस. परमेश्वर जो एकच शे, तेनी अब्राहाम ना संगे करार करतांना कोलेच मध्यस्थ नई ठेव.

21त काय मोशे ना नियम परमेश्वर ना करार ना विरुद्ध मा शे? कदीच नई. कारण कि कदी मोशे ना नियम आमले कायम ना जीवन देवू सकत होता, त आमी मोशे ना नियम ना पालन करीसन धर्मी ठरतस.

22पण पवित्र शास्त्र सांगस कि सर्वा जग ना लोक पाप ना आधीन शेतस, आणि एनासाठे तो नवा करार जेना आधार येशु ख्रिस्त वर विश्वास करान शे, परमेश्वर नि विश्वास करणारस्ले दियेल शे.

23ख्रिस्त ना येवाना पयले, आमी यहुदीस्ले कैद मा ठेवामा एयेल होत आणि मोशे ना नियम आमनी रक्षा करत होता आणि त्या विश्वास ले येता लोंग जो प्रगट होणार होता, आमी तेनाच बंधन मा ऱ्हायनूत.

24एनासाठे मोशे ना नियम ख्रिस्त ना येवा लगून आमना मार्गदर्शन करासाठे आणि आमनी देखरेख करासाठे देवामा एयेल होता, एनासाठे कि आमी ख्रिस्त वर विश्वास कराना द्वारे परमेश्वर ना समोर धर्मी ठरी सकुत.

25आते जव कि आमनी ख्रिस्त वर विश्वास करेल शेतस त आते आमले मदत साठे आणि मार्गदर्शन साठे मोशे ना नियम नि गरज नई शे.

26एनासाठे तुमी सर्वा येशु ख्रिस्त वर विश्वास कराना द्वारे परमेश्वर ना पोर शेतस.

27कारण कि तुमना मधून जीतलास्नी ख्रिस्त मा बाप्तिस्मा लीयेल शेतस, तेस्नी ख्रिस्त येशु ना स्वभाव ले नवा कपळा ना सारखा घाली लीयेल शे.

28एनासाठे आते नईत यहुदीस्मा आणि नईत बिगर यहुदीस्मा भेद ऱ्हायना, नईत गुलाम मा आणि स्वातंत्र मा भेद ऱ्हायना, नईत नर मा आणि नईत नारी मा भेद ऱ्हायना, कारण कि तुमी सर्वा ख्रिस्त येशु मा एक शेतस.

29आणि कदी तुमी ख्रिस्त संगे एकत्र शेतस, त तुमी अब्राहाम ना परिवार ना हिस्सा शेतस, आणि त्या आशीर्वाद तुमले भेटतीन जेस्ले देवाना करार परमेश्वर नि करेल शे.

← Chapter 2 Jump to: Chapter 4 →