Psalms 68

Amharic Dawro DFBE (ጌሻ ማጻፋ) No Year

← Chapter 67 Jump to: Chapter 69 →

1ጾሳይ ደንዶ፤ አ ሞርከቱ ላለትኖ። አ እጽያዋንቱ አ ስንፐ ባቃትኖ።

2ጩዋይ ጫርኩዋን ፑነትያዋዳን፥ ኔን ኡንቱንታ ፑና ይሳ። ሙቃዳይ ታማን ሙሽያዋዳን፥ ኢታቱ ጾሳ ስንፐ ይኖ።

3ሽን ጽሎቱ ሀሹ ጊኖ፤ ጾሳ ስንን ናሸትኖ፤ ናሸቻን እልልኖ።

4ጾሳዉ የጽተ፤ አ ሱን ሳቢተ። ሻርያ ቦላን ጋልፍያዋ ቁ ቁ ኦተ ከስተ፤ አ ሱንይ መና ጎዳ፤ አ ስንን ናሸትተ።

5ጾሳይ ባረ ደእያ ጌሻ ሳኣን፥ አዉ ባይና ናናቶ አዉዋ፤ ቃይ አስናይ ሀይቄዳ ማጫ አሳቶ ዳና።

6ጾሳይ ባረካ ደእያዋንቶ ጎለ አሳ እሜ። ቃሾ ጎልያን ደእያዋንታ ብሊደ፥ ኡንቱንታ እሻሉዋን ዎ። ሽን ማካላንቻቱ መሌዳ ቢታን ደኢኖ።

7አቤት ጾሳዉ፥ ኔን ነ አሳ ካለዳ ዎደ፥ ኔን ኡንቱንቱና መላ ባዙዋ ቤዳ ዎደ፥

8ሲና ደርያን ቆንጬዳ ጾሳ ስንን፥ እስራኤልያ ጾሳ ስንን ቢታይ ቃጼዳ፤ ሳሎቱ እራ ዱገ ትጌድኖ።

9አቤት ጾሳዉ፥ ኔን እራ ዳርሳደ ቡክሳዳ፤ መላ ቢታ ዛራደ ኦራዳ።

10ነ አሳይካ ያን ኡቴዳ። አቤት ጾሳዉ፥ ነ ኬካተን፥ ህዬሳቶ ኮሽያባ ጊግሳደ እማዳ።

11ጎዳይ ኪታ ኪቴዳ፤ ሄ ኪታ አፌዳ ማጫ አሳቱ ዳራ።

12ኡንቱንቱ፥ “ሞርከ ካተቱነ ኡንቱንቱ ቶራንቻቱ ጉየ ባቃቴድኖ፤ ሶን አቴዳ ማጫ አሳቱ ኦሞዱዋ ሻከቴድኖ።

13ኡንቱንቱ፥ ጶልያ ዎርቃ ቀፍያና ደእያ፥ ብራፐ መቴዳ ሀራጵያ ምስልያ፥ ኦሞዱዋ ደሞደ፥ ህንተንቱ፥ ዶርሳ ስኩዋ ግዶን አያዉ ግሴድቴ?” ያጌድኖ።

14ኡባ ዳንዳይያ ጾሳይ፥ ካተቱዋ ላሌዳ ዎደ፥ ጻልሞና አሳ ቦላ ሻቻ ቡክሴዳ።

15ባሳነ ደረቱ ዎጋ ዎልቃማ ደረቱዋ፤ ባሳነ ደረቱ ዳሮ ጼራቱ ደእያዋንታ።

16ዳሮ ጼራቱ ደእያ ደረቶ፥ ጾሳይ ባረሳ ኦናዉ ዶሬዳ አሳ፥ ህንተ አያዉ ቃናቲደ ጼሊቴ? መና ጎዳይ አን መናዉ ደአናዋ።

17ጾሳ ኦላ ፓራ ጋረቱ ታሙ ሻኣንነ ሻኡ ገደ ሻአን ፓይደትያዋንታ፤ ጎዳይ ሲና ደርያፐ ባረ ጌሻ ሳኣ ዬዳ።

18ኦሞደቴዳ ዳሮቱዋ አኪደ፥ እ ፑደ ቃ ከሴዳ። አሳፐ፥ ሀራይ አቶ ማካላንቻ አሳፐካ እሙዋ አኬዳ። መታ ኡባ ጎዳይ ያን ደአና።

19ጋላሳን ጋላሳን ኑ ቶኩዋ ቶክያ ጎዳይ፥ ኑና አሽያ ጾሳይ ጋላተቶ።

20ኤ፥ ኑ ጾሳይ ኑና አሽያ ጾሳቴ! ሀይቁዋፐ አትያዌ፥ ኡባ ሞድያ መና ጎዳይ አሽናዳ።

21ጾሳይ ቱሙዋፐ ባረ ሞርከቱዋ፥ ጉግያ ክንቻና፤ ናጋራ ኦግያን ሀመትያ፥ ጎፋራንቻቱዋ ሁጲያ ጳልቃና።

22ጎዳይ ያጌዳ፤ “ታን ህንተ ሞርከቱዋ፥ ባሳነፐ ዛራደ አሀና፤ ታን ኡንቱንታ ጪሞ አባ ግዶፐ ከሳደ ጉየ አሀና።

23ሄዌነ፥ ኔን ነ ሞርከቱዋ፥ ሱ ግዱዋና ጮልባያ የደ ሀመታናሳነ፤ ነ ካናቱካ ሞርክያ ሱፐ፥ ባረንቱ ግሹዋ እንጻርሳን ላጫናሳ” ያጌዳ።

24አቤት ጾሳዉ፥ ነ ሳልፒ፥ ታ ጾሳ ታ ካትያ ሳልፒ፥ ጌሻ ጎልያ ገልያ ዎደ ኡባዉ ቤቴ።

25የጽያዋንቱ ስንና፤ ዲጽያዋንቱ ጉየና፤ ቃይ ካራቡዋ ባቂያ ዎዶሮቱ ግዱዋና።

26ኡንቱንቱ፥ “ጾሳ ኩንዳ ሺቁዋን ጋላትተ፤ ህንተኖ፥ እስራኤልያ ዘረቶ፥ መና ጎዳ ጋላትተ” ያጊኖ።

27ሄ ሳልፕያን ኡባፐ ቴፋትያ፥ ቢንያማ ዛራቱ ኮይሮ ቤቲኖ። ካሊደ ይሁዳ ካፓቱ ባረንቱ ጭታና ደኢኖ፤ ዉርሰን ዛብሎና ካፓቱነ ንፍታሌማ ካፓቱ ቤቲኖ።

28አቤት ጾሳዉ፥ ነ ዎልቃ ቆንጭሳ። አቤት ኑዉ ኦዳ ጾሳዉ፥ ነ ምኖተ በሳ።

29ሄዋ ድራዉ፥ የሩሳላመን ደእያ ነ ጌሻ ጎልያ ካተቱ ዪደ፥ ነዉ እሞታ እማና።

30ዶኣዳን ማቃ ግዶን ደእያ ግብጼ አሳቱዋ ኔን ሴራ። ቦራቱዋነ ማራቱዋ ዉድያ፥ ማላትያ ካዉተቱዋ ኔን የደርሳ። ኡንቱንቱ ጉልባቲደ፥ ባረንቱ ብራ ነዉ እማና ጋካናዉ፥ ኔን ኡንቱንታ ሴራ። ኦለታናዉ ዬሞትያ አሳቱዋ ላላ።

31ኪተቴዳ ካፓቱ ግብጼፐ ያና፤ ቶጳታ ባረ ኩሽያ ኤለ ጾሳኮ ምጫና።

32ህንተኖ፥ ሳኣ ካዉተቶ፥ ጾሳዉ የጽተ፤

33ሳሎቱዋን፥ በንፐ ደእያ ሳሎቱዋን ብያ ጎዳ ሳቢተ። ስስተ! እ ባረ ኮሻ፥ ባረ ዎልቃማ ጉን ኪቴ።

34ጾሳ ዎልቃባ አዋይተ፤ አ አንጋይ እስራኤልያ ቦላና፤ አ ዎልቃይካ ሳሉዋና።

35ጾሳይ ባረ ጌሻ ጎልያፐ ቆንጮደ፥ ማላልሴ። እስራኤልያ ጾሳይ ባረ አሳዉ ምኖተነ ዎልቃ እሜ። መና ጎዳይ ጋላተቶ።

← Chapter 67 Jump to: Chapter 69 →