Psalms 73

Amharic Dawro DFBE (ጌሻ ማጻፋ) No Year

← Chapter 72 Jump to: Chapter 74 →

1ጾሳይ እስራኤልያዉ ቱሙዋፐ ሎአ፤ ዎዛና ጌሻቶ እ ኬካ።

2ሽን ታና ግዶፐ፥ ታ ገዲ፥ በታናዉ ጉ አቴዳ፤ ታ ገዲ ሀልጻናዉ ማቴዳ።

3አያዉ ጎፐ፥ ኢታ አሳቶ ሳሮተይ ደእያዋ በኣደ፥ ሄ ኦቶራንቻቱዋ ዱረተን ታን ቃናታድ።

4ኡንቱንቶ ቱግ ባዋ። ኡንቱንቱ ቦላይ ፓጻነ ምና።

5ኡንቱንቱ ሀራ አሳይ ቱጋትያዋዳን ቱጋትክኖ፤ ኡንቱንቱ ሀራ አሳዋዳን መቱዋን ሾጨትበይክኖ።

6ሄዋ ድራዉ፥ ኡንቱንቱ ኦቶሩዋ፥ አሌቁዋዳን ቆያን አኖ፤ ማካላ አፍላዳን ማዪኖ።

7ኡንቱንቱ ዎዛናይ ኢታባ ፑልቴ። ኡንቱንቱ ቆፋይ ኢታ ሀልቹዋ ኩሜዳ።

8ኡንቱንቱ ቅሊጪኖነ ኢታባ ሃሳዪኖ፤ ኡንቱንቱ ባረንቱ ኦቶሩዋን፥ ሀራቱዋ ኡንኤናዉ ናሲኖ።

9ኡንቱንቱ ሳሉዋን ደእያ ጾሳ፥ ባረንቱ ዶናን ጫሺኖ። ሳኣን ደእያ አሳ ቦላካ፥ ባረንቱ እንጻርሳን ኦቶሩዋ ሃሳዪኖ።

10ሀራይ አቶ፥ ጾሳ አሳይካ ኡንቱንቱኮ ስማና፤ ኡንቱንቱ ኦድያዋካ ኤለ አማናና።

11ኡንቱንቱ፥ “ጾሳይ ኑባ አይነ ኤረና፤ ኡባፐ ቂያ ጾሳይ አይነ በኤና” ያጊኖ።

12ስም ኢታቱ ሀዋ ማላ፤ ኡንቱንቱ ኡባ ገደካ እንጀትና ደኢኖ፤ ኡንቱንቱ ጉጅ ጉጅ ዱረቲኖ።

13ያቶፐ፥ ታን ታ ዎዛና ጌሻ ኦዳዌነ ታን ታ ጽሎተ በሳናዉ፥ ታ ኩሽያ ሜጨቴዳዌ ቱሙዋፐ መላ።

14ጋላሳ ኩመንን ታን መቱዋን ሾጨታድ፤ ዎንታን ዎንታን ሙረታድ።

15ታን ኢታቱዋዳን፥ ኡንቱንቱ ግያዋ ጌደንቶ፥ ታን ነ አሳዉ አማነተናዋ ግዳና።

16ታን ሀ ኡባ የዉዋ ኤራናዉ ቆፕያ ዎደ፥ ታዉ ኤረተና ዴጾባ ግዴዳ።

17ሽን ታን ጾሳ ጌሻ ሳኣ ገሌዳ ዎደ፥ ኢታቱዋ ዉርሰ ካጫ አኬካድ።

18ኡንቱንታ ኔን ቱሙዋፐ ሀልጽያ ሳኣን ኡትሳሳ፤ ኔን ኡንቱንታ ኩንድሳሳነ ባይዛሳ።

19ኡንቱንቱ አኬከናን ዬድኖ፤ ዳጋማን እቱ አተናን ሙለ ዉሬድኖ።

20እት አሳይ ቤጎትያ ዎደ፥ እ አኩሙዋን በኤዳባይ ዶገትያዋዳን፥ አቤት ጎዳዉ፥ ኔን ደንድያ ዎደ፥ ኡንቱንቱ ዶገታና።

21ታን ይሎቴዳ ዎደነ ታ ዎዛናን ሴለቴዳ ዎደ፥

22አይነ አኬከናን ዶንጭላድ፤ ታን ነ ስንን ሚዛ ማላ ግዳድ።

23ሽን ታን ኡባ ገደካ ኔናና ደአይ፤ ታ ኡሸቻ ኩሽያ ኔን ኦይቃዳ።

24ነ ዞርያን ታና ካለሳ፤ ሄዋፐ ጉይያን ኔን ታና ቦንቾ አፋና።

25ታዉ ሳሉዋን ኔፐ አትና፥ ሀራይ ኦን ደኢ? ታን ኔፐ አትና፥ ሳኣን ሀራባ አያነ አሞትከ።

26ታ ዎልቃይነ ታ ዎዛናይ ዳቡራናዉ ዳንዳዬ፤ ሽን ጾሳይ ታ ዎዛና ምንስያዋነ፥ መናዉ ታና ጋኬዳ ሳማ።

27ኔፐ ሃክያዋንቱ ያና፤ ኔና አማነተናዋንታ ኡባ ኔን ዉርሳና።

28ሽን ታና ግዶፐ፥ ታን ጾሳ ማታን ደእያዌ ታዉ ሎአ። ታን ኡባ ሞድያ መና ጎዳ፥ ታዉ ባቃታ አትያ ሳኣ ኦድ። ሄዋ ድራዉ፥ አ ኦሱዋ ኡባ ታን ኦዳና።

← Chapter 72 Jump to: Chapter 74 →