Psalms 71

Amharic Dawro DFBE (ጌሻ ማጻፋ) No Year

← Chapter 70 Jump to: Chapter 72 →

1አቤት መና ጎዳዉ፥ ታን ኔኮ ባቃታይ፤ አዉደነ ታና ዬላዮፓ።

2ነ ጽሎተን ታና ዎ አካ፤ ነ ሀይ ታኮ የጋደ፥ ታና አሻ።

3ኔን ታዉ ኡባ ዎደ ጌምያ ምኖ ዛላነ፥ ታና አሽያ ምኖ ጌሱዋ ግዳ። ታ አታና ማላ ነ አዛዛ። ኤ፥ ኔን ታ ዛላነ ታ ጌሱዋ።

4አቤት ታ ጾሳዉ፥ ኢታቱዋ ኩሽያፐ፥ ኢታ ኦያዋንቱፐነ ቃረት ባይና አሳቱዋ ዎልቃፐ ታና አሻ።

5አያዉ ጎፐ፥ አቤት ኡባ ሞድያ መና ጎዳዉ፥ ኔን ታን ህዶታን ናግያዋነ ታ ያላጋተ ዎድያፐ ዶማደ፥ ታን አማነትያዋ ግዳዳ።

6ታን የለትያ ዎድያፐ ዶማደ ኔናን ዘምፓድ፤ ታ አት ኡሉዋፐ ዎደፐ ዶማደ፥ ኔን ታና ናጋዳ። ኡባ ገደካ ታ ጋላታይ ኔሳ።

7ኔን ታዉ ባቃታ አትያ ዎልቃማ ሳኣ ግዴዳ ድራዉ፥ ታ ደኡ ዳሮ አሳዉ ሌምሶ ግዴዳ።

8ጋላሳ ኡባን ታ ዶናይ፥ ነ ጋላታንነ ነ ቦንቹዋን ኩሜዳ።

9ታን ጭሜዳ ዎድያን ታና ኦሎፓ፤ ታ ዎልቃይ እጼዳ ዎድያን ታና አጎፓ።

10አያዉ ጎፐ፥ ታ ሞርከቱ ታ ቦላ ሃሳዪኖ፥ ታና ዎናዉ ኮይያዋንቱ እትፐ ሺቂደ ማቀቲኖ።

11ኡንቱንቱ፥ “ጾሳይ አ አጌዳ፤ የደርሲደ አ ኦይቄቶ። አያዉ ጎፐ፥ አ አሻናዌ ኦንነ ባዋ” ያጊኖ።

12አቤት ጾሳዉ፥ ታፐ ኔን ሃኮፓ። አቤት ታ ጾሳዉ፥ ታና ማዳናዉ ኤሌላ።

13ታና ሞትያዋንቱ ዬላቲደ ይኖ። ታና ቆሀናዉ ኮይያዋንቱ፥ ዬላነ ካዉሻ ማይኖ።

14ሽን ታና ግዶፐ፥ ኡባ ገደ ኔና ህዶታን ናጋና። ታን ጉጃ ጉጃደ ኔና ጋላታና።

15ዎይሰንቶ ልክያ ኤራና ዮፐካ፥ ታ ዶናይ ጋላሳ ኡባን ነ ጽሎተባነ አሽያ ነ ኦሱዋባ ኦዳና።

16ታን ኡባ ሞድያ መና ጎዳ ዎልቃን ያና፤ ነ ጻላላይ ጽሎ ግድያዋ አዋያና።

17አቤት ጾሳዉ፥ ኔን፥ ታ ያላጋተፐ ዶማደ ታና ታማርሳዳ። ሀእ ጋካናዉ ታን ነ ማላልስያ ኦሱዋባ ኦዳይ።

18አቤት ጾሳዉ፥ ነ ዎልቃነ ነ ምኖተ፥ ይያ የለታ ኡባዉ ኦዳና ጋካናዉ፥ ታን ጭማደ ፑሉሞፐካ ታና አጎፓ።

19አቤት ጾሳዉ፥ ነ ጽሎተይ፥ ቦላ ሳሉዋ ጋኬዳ። አቤት ዎልቃማባ ኦዳ ጾሳዉ፥ ነ ማል ኦንነ ባዋ።

20ኔን ታ ቦላ ዳሮ መቱዋ አሃዳ፤ ግዶፐነ፥ ኔን ታ ደኡዋ ዛራደ ኦራጽሳና፤ ኔን ታና ቢታ ግዶ ጪሞ ኦላ ገለናዳን ናጋና።

21ኔን ታ ቦንቹዋ ካሰዋፐ ዳርሳና፤ ኔን ታና ዛረደካ ምንና።

22አቤት ታ ጾሳዉ፥ ነ ቱማተ ድራዉ፥ ታን ኔና ዲን ጋላታና። አቤት እስራኤልያ ጌሻዉ፥ ታን ማስንቁዋን ኔና ሳባና።

23ታን ዲጻደ፥ ናሸቻዉ ታ ቃላ ቁ ኦደ የጻና፤ ኔን ታና አሼዳ ድራዉ፥ ታን ኔና ሳባና።

24ታ እንጻርሳይ ነ ጽሎ ኦሱዋባ ኡባ ጋላስ ኦዳና፤ አያዉ ጎፐ፥ ታና ቆሀናዉ ኮይያዋንቱ፥ ዬላቴድኖነ ካዉሼድኖ።

← Chapter 70 Jump to: Chapter 72 →