Psalms 69

Amharic Dawro DFBE (ጌሻ ማጻፋ) No Year

← Chapter 68 Jump to: Chapter 70 →

1አቤት ጾሳዉ፥ ታና አሻ፤ አያዉ ጎፐ፥ ሃይ ታዉ ቆያ ጋኬዳ።

2ገዲ ኤቂያ ሳአይ ባይና ጫርያን ሙከታድ፤ ጪሞ ሃ ግዶ ገላድ፤ ሃ ዙሉ ታ ቦላ ባና ሀኔ።

3ማዶ ዋሳደ ዳቡራይ፤ ታ ኮቶኒካ መሌዳ። ታ ጾሳይ አሌ ጋደ ጼልሽን፥ ታ አይፊ ጋልጄዳ።

4ታና ጮ እጽያዋንቱ፥ ታ ሁጲያ ብናናፐ ዳራ። ዎርዱዋን ታና ሞርክያዋንቱነ፥ ይሳናዉ ኮይያዋንቱ ዳሬድኖ። ታን ዎልቃን አካቤና ሚሻ ታና ጭግሲኖ።

5አቤት ጾሳዉ፥ ታ ባይዙዋ ኤያተ ኔን ኤራሳ፤ ታን ኦዳ ናጋራይ ኔፐ ቆሰተና።

6አቤት ጎዳዉ፥ ኡባፐ ዎልቃማ መና ጎዳዉ፥ ኔና ህዶታን ናግያዋንቱ፥ ታ ጋሱዋን ዬላቶፕኖ። አቤት እስራኤልያ ጾሳዉ፥ ኔኮ ሺቅያዋንቱ ታ ጋሱዋን ካዉሾፕኖ።

7ታን ቦርያ ዳንዳዬዳዌነ ታ ሶምኢ ዬላ ማዬዳዌ ነ ድራሳ።

8ታን ታ እሻቶ እማ፥ ቃይ ታ አት ናናቶ አላጋ ግዳድ።

9ታን ነ ጎልያዉ ሴለትያ ሴላይ፥ ታና ታማዳን ጉዴ፤ ኔና ቦርያዋንቱ ቦሪ ታ ቦላ ዎዳ።

10ታን ጾማደ፥ ታ ሁጲያ ካዉሼዳዌ፥ ታዉ ቅሊጩዋ ግዴዳ።

11ታን ካዩዋ ማዩዋ ማዬዳ ዎደ፥ ኡንቱንቶ ቶሳዉ ግዳድ።

12ካታማ ፐንግያን ኡትያዋንቱ ታና ቅሊጪኖ፤ ማትያዋንቱ ታባ የ ከሲኖ።

13ሽን አቤት መና ጎዳዉ፥ ታና ግዶፐ፥ ታን ኔና ዎሳይ። አቤት ጾሳዉ፥ ነ ዶስያ ዎድያን፥ አገና ነ ሲቁዋ ዳሩዋን፥ ኔን አሻና ጌዳዋዳን ታዉ ዛሩዋ እማ።

14ጫርያን ሙከተናዳን ታና አሻ። ታና እጽያዋንቱፐ፥ ጪሞ ሃቱዋፐ ኔን ከሳ አካ።

15ሃ ድኡዋን ታና አፍሶፓ፤ ዎይ ጪሞ ኦላን ታና ምትሶፓ፤ ዎይ ዱፉዋ ዶና ታ ቦላ ጎርድሶፓ።

16አቤት መና ጎዳዉ፥ አገና ነ ሲቁዋ ኬካተዳን፥ ታዉ ዛሩዋ እማ። ነ ቃረታ ዳሩዋዳን ታኮ ስማ።

17ታፐ ነ ቆማፐ ነ ሶምኡዋ ገንፓ፤ ታን ዋየትያ ድራዉ፥ ታዉ ኤለ ዛሩዋ እማ።

18ኔን ታኮ ሺቃ፤ ታና ዎዛ፤ ታ ሞርከቱዋፐ ታና ላአ ከሳ።

19ታን ቦርያ፥ ዬላነ፥ ካዉሻ አኬዳዋ ኔን ኤራሳ። አያዉ ጎፐ፥ ታ ሞርከቱዋ ኡባ ኔን በኣሳ።

20ቦሪ ታ ዎዛና ፓጸናዳን መን ድራዉ፤ ህዶታ ቃንጻድ። ታዉ ቃረትያዋ ኮያድ። ሽን እቱነ ባዋ፤ ታና ምንያ አሳ ጼላድ፤ ሽን ደማበይከ።

21ታን ኮሻቴዳ ዎደ፥ ታዉ ጫምያ ቁማ አድኖ። ታን ሳመቴዳ ዎደ፥ ታዉ ጫላ ዎይንያ ኤሳ እሜድኖ።

22ኡንቱንቱ ምያ ሳምፓይ ኡንቱንቶ ጲረ ግዶ። ኡንቱንቱ ያርሹዋ ያርሺደ፥ ምያ ግብራይ ኡንቱንቶ ግትያ ግዶ።

23ጼለናዳን ኡንቱንቱ አይፊ ጎዘቶ፤ ኡንቱንቱ ጋዱዋ ኡባ ገደ ኮኮርሳ።

24ነ ሀንቁዋ ኡንቱንቱ ቦላ ትጋ፤ ነ ሱሎ ሀንቁ ኡንቱንታ የደርሲደ ኦይቆ።

25ኡንቱንቱ ካምቡ መላ ደኦ፤ ኡንቱንቱ ዱንካንያን ኦንነ ደኦፖ።

26አያዉ ጎፐ፥ ኡንቱንቱ፥ ኔን ሙሬዳዋንታ የደርሲኖ፤ ቃይ ኔን ደቼዳዋንቱ ቱጋባ ደንደ ሃሳዪኖ።

27ኔን ኡንቱንቱ ናጋራ ቦላ ናጋራ ጉጃናዳን አጋ፤ ነ ማሮተፐ ኡንቱንታ አያይነ ጋኮፖ።

28ኡንቱንቱ ደኡዋ ማጻፋፐ ቁጨትኖ፤ ጽሎ አሳና ማዝጋበቶፕኖ።

29ታን ሳከታደነ ቱጋታደ ደአይ። አቤት ጾሳዉ፥ ታና አሻደ፥ ሳሮ ሳኣን ዎ።

30ታን ጾሳ ሱን የን ጋላታና፤ ጋላታ እሙዋን አ ዳርሳና።

31ሄዌካ፥ ቦራ ያርሽያዋፐ ዎይ ካጫማ ኮሩማ ያርሽያዋፐ አደ፥ መና ጎዳ ናሸቻና።

32ናቀቴዳዋንቱ ታና ጾሳይ፥ አሼዳዋ በኢደ ናሸትኖ። ህንተኖ ጾሳኮ ሺቅያዋንቶ፥ ህንተ ዎዛናይ ምነቶ።

33አያዉ ጎፐ፥ መና ጎዳይ ህዬሳቱዋ ስሴ፤ ቃሾ ጎልያን ደእያ ባረ አሳካ ካና።

34ሳሉነ ሳአይ፥ ቃይ አባይነ አ ግዶን ዎጽ ቃጽያ ኡባቱ ጾሳ ጋላትኖ።

35አያዉ ጎፐ፥ ጾሳይ ጽዮነ አሻና፤ ይሁዳ ካታማቱዋ ዛሪደ ኬጻና። አ አሳይ ያን ደአናነ ሄ ቢታይ ኡንቱንቱሳ ግዳናዋ።

36አ ቆማቱዋ ናናቱ ሄ ቢታ ላታና፤ አ ሱን ሲቅያዋንቱ ያን ደአና።

← Chapter 68 Jump to: Chapter 70 →