Psalms 83

Amharic Dawro DFBE (ጌሻ ማጻፋ) No Year

← Chapter 82 Jump to: Chapter 84 →

1አቤት ጾሳዉ፥ ጮኡ ጎፓ፤ ስርጵ ጎፓ፤ አቤት ጾሳዉ፥ ሙሞፓ።

2በአ! ነ ሞርከቱ ነ ቦላ ደንዲኖ፤ ኔና እጽያዋንቱ ነ ቦላ ማካሊኖ።

3ኡንቱንቱ ነ አሳ ቦላን ጌማን ያኢኖ፤ ኔን ሲቅያ አሳቱዋ ቦላ ማቀቲኖ።

4ኡንቱንቱ፥ “ሃይተ፥ ኡንቱንቱ ካዉተ ይሶይቴ፤ እስራኤልያ ግያ ሱን፥ መናዉ ሀሳየተናዳን ኦይተ” ያጊኖ።

5ኡንቱንቱ እት ዎዛና ግዲደ፥ እትፐ ማቀቲኖነ፥ ነ ቦላ ጫቁዋ ጫቀቲኖ።

6ጫቀትያዋንቱነ ኤዶማነ እስማኤላ አሳቱዋ፥ ሞኣባ ዛራቱዋነ አጋር ዛራቱዋ፤

7ገባላ አሳቱዋ፥ አሞና አሳቱዋ፥ አማሌቃ አሳቱዋ፥ ፕልስጼማ አሳቱዋነ ጺሮሳ አሳቱዋ።

8አሶረ አሳቱካ ኡንቱንቱና እትፐ ጋከቴድኖ፤ አሶራቱካ ሎጸ ዛረቶ ዎልቃማ ማዱዋ ግዴድኖ።

9ኔን ምድያማ አሳቱዋ ቦላነ ስሳራነ ያብና ቦላ፥ ቂሾና ሻፋን ኦዳዋዳን ኡንቱንቱ ቦላ ኦ።

10ኡንቱንቱ ኤንዶረን ዬድኖ፤ ኡንቱንቱ አሃይ ሞገተናን ቢታን ዎቄዳ።

11ኡንቱንቱ ካፖቱዋ፥ ኔን ኦሬባነ ዛኤባ ኦዳዋዳን ኦ፤ ኡንቱንታ ሞድያዋንታ ኔን ዘባሀነ ጻልሙናአ ይሴዳዋዳን ይሳ።

12ሄዋንቱነ፥ “ኑን ጾሳ አሳ ቢታ ኑዉ ቡዞታና” ያጌዳዋንታ።

13አቤት ታ ጾሳዉ፥ ኡንቱንታ ባናዳን ላላ፤ ጫርኩ አፍያ ሱላዳን ኦ።

14ጻራጋይ ዎራ ሚደ ዉርስያዋዳን፥ ታማ ላጩ ደርያ ማይያዋዳን፥

15ሄዋዳንካ ነ ኡሹዋን ኡንቱንታ የደርሳ፤ ነ ጎትያን ኡንቱንታ ዳጋን።

16አቤት መና ጎዳዉ፥ አሳይ ነ ሱን ኮያና ማላ፥ ኔን ኡንቱንቱ ሶምኡዋ ዬላ ማይዛ።

17ኡንቱንቱ መናዉ ዬላትኖነ ህርግኖ፤ ካዉሺደ ይኖ።

18ነ ሱንይካ መና ጎዳ ግድያዋ፥ ነ ጻላላይ ኡባፐ ቃ ጾሳ፥ ሳኣ ኡባ ሞድያዋ ኡንቱንቱ ኤርኖ።

← Chapter 82 Jump to: Chapter 84 →