Psalms 90

Amharic Dawro DFBE (ጌሻ ማጻፋ) No Year

← Chapter 89 Jump to: Chapter 91 →

1ጎዳዉ፥ ኔን የለታ ኡባን፥ ኑን ደእያ ሳኣ ግዳዳ።

2ደረቱ መታናፐ ካሰ፥ ዎይ ኔን ሳኣ ኦናፐ ካሰ፥ መናፐ መና ጋካናዉካ ኔን ጾሳ።

3ኔን አሳ ናናቱዋ፥ “አሳ ናቶ፥ ጉየ ቢታዉ ስምተ” ያጋደ፥ ኡንቱንታ ጉየ ኡንቱንቱ መቴዳ ቢታዉ ዛራሳ።

4ሻኡ ላይይ ነዉ ዝን አ ጋላሳ ማላ፤ ዎይ ቃማ ግዶፐ እት ሳትያ ማላ።

5ኔን አሳ ቆፐናን ድኡዋዳን አፋሳ። ኡንቱንቱ አኩሙዋ ማላ፤ ዎንታ ዎንታ ዶልያ ማታ ማላ።

6ሄ ማታይካ ዎንታ ዎደ ድጪደ ጪሼ፤ ኦማርስያ ዎደ ሹል መሌ።

7ኑን ነ ይሉዋን ዉሬዶ፤ ነ ሀንቁዋ ሱሉዋን ዳጋሜዶ።

8ኔን ኑ ኢታ ኦሱዋ ነ ስንን ዎዳ፤ ቃይ ኑ ጌሜዳ ናጋራ ነ ስን ፖኡዋኮ አዳ።

9ኑ ጋላሳ ኡባይ ነ ሀንቁዋን አዳ፤ ኑ ላይ እት ኦልያዳን ዉርሴዶ።

10ኑ ደኡዋ ላይይ ላፑን ታማ፤ ዎይ ምኖፐ፥ ሆስፑን ታማ፤ ሄዌካ መቱዋነ ቱጋ። ኑ ላይይ ኤለካ አ፤ ኑንካ ኤለካ ክቼቶ።

11ነ ሀንቁዋ ዎልቃ ኤርያዌ ኦኔ? ነ ሀንቁዋ ሱሉ ያሽያዋ።

12ሄዋ ድራዉ፥ ኑ ላይ በስያዋዳን፥ ጎኤታና ማላ አዳ ኤራ ኑና ታማርሳ።

13አቤት መና ጎዳዉ፥ ነ ሀንቁ አዉደ ጋካናሴ? ሀያና፤ ነ ቆማቶ ቃረታ!

14ኑ ላይ ኡባን ኑን ናሸታናዳንነ የጻናዳን፥ ዎንታ ዎንታ አገና ነ ሲቁዋን ኑና ካልሳ።

15ኔን ኑና መቶዬዳ ጋላሳቱዋ ኬሻነ ኑን ቱጋ በኤዳ ላይቱዋ ኬሻ፥ ኑና ናሸቻ።

16ኑዉ ነ ቆማቶ ነ ኦሱ ቆንጮ፤ ነ ቦንቾ ዎልቃይ ኡንቱንቱ ናናቶ ቤቶ።

17ጎዳ ኑ ጾሳ ኬካተይ ኑ ቦላን ግዶ፤ ኑ ኩሽያ ኦሱዋ ኑዉ ሱርሳ። ኤ፥ ኑ ኩሽያ ኦሱዋ ሱርሳ።

← Chapter 89 Jump to: Chapter 91 →