Proverbs 1

Amharic Tigrinya (መፅሓፍ ቅዱስ)

Jump to: Chapter 2 →

1ምስላታት ሰሎሞን ወዲ ዳዊት ንጉስ እስራኤል፦

2ጥበብን ምኽርን ንምፍላጥ፥ ናይ ፍልጠት ቃላት ንምስትውዓል፥

3ዘለብም ምዕዳንን ሓቅን፥ ፍትሕን ቅንዕናን ንምቕባል፥

4ንገርህታት ጥበብ ዝህብ፥ ንመንእሰያት ድማ ፍልጠትን ጥንቃቐን ዝህብ እዩ።

5ጠቢብ ነዚኣተን ብምስማዕ፥ ፍልጠት ይውስኽ፤ ለባም ከዓ ፅቡቕ ምኽሪ የጥሪ።

6በዙይ ከዓ ንሳቶም ንምስላን፥ ትርጉምን፥ ንዘረባ ጠቢባንን ዓሚቝ ሓሳባቶምን፥ ከስተውዕልዎ ይኽእሉ።

7ንእግዚኣብሄር ምፍራሕ፥ ናይ ጥበብ መጀመርታ እዩ፤ ሰነፋት ግና ንጥበብን ንተግሳፅን ይንዕቕዎ።

8ወደይ፥ ንምዕዳን ኣቦኻ ስምዓዮ፤ ንትምህርቲ ወላዲትካ ድማ ኣይትሕደጎ።

9እዙይ ንርእስኻ ኣኽሊል፥ ንኽሳድካ ኸዓ ድሪ እዩ።

10ወደይ፥ ሓጥኣን እንተ ሓባበሉኻ፥ ሕራይ ኣይትበሎም።

11ንሳቶም፦ “ምሳና ነዓ፤ ኣድቢና ደም ነፍስስ፤ ንንፁህውን ብዘይ ምኽንያት፥ መፃወድያ ነፃውደሉ እንተ በሉ፥

12“ናብ ጕድጓድ ከም ዝወርዱውን፥ ብህይወቶም እንተለዉ፥ ከም ሲኦል ኴንና ንውሓጦም፤

13“ክቡር ዝኾነ ዅሉ ኽንረክብ፥ ነአባይትና ኸዓ በቲ ዝዘመትናዮ ኽንመልኦ ኢና፥

14“ነዓ፥ ዕፃኻ ምሳና ኣውድቕ፤ ናይ ኵልና ኸረጢት፥ ሓደ ይኹን እንተ በሉኻ”

15ወደይ፥ ምስ ከምዚኣቶም ዝበሉ፥ መንገዲ ኣይትኺድ፤ ካብኣቶም ረሓቕ፤

16ንሳቶም ክፉእ ንምግባር ይጐዩ፤ ኣእጋሮም ከዓ ደም ንምፍሳስ፥ ቅልጡፋት እየን።

17ኣብ ቅድሚ ኣዒንቲ ዅለን እተን ኣኽናፍ ዘለወን ኣዕዋፍ፥ መፈንጠር ብኸንቱ ኣይፃወድን እዩሞ።

18ንሳቶም ኣብ ልዕሊ ደሞም የድብዩ፤ ኣብ ልዕሊ ነፍሶምውን የሻርዉ።

19ኵሉ መንገዲ ህሩፍ ከምዙይ እዩ፤ ንነፍሲ ዋናኡ የጥፍኣ።

20ጥበብ ኣብ ጐደናታት ትፅውዕ፤ ኣብ ኣደባባያት ድምፃ ዓው ኣቢላ ተስምዕ።

21ህዝቢ ኣብ ዘለዎ ጐደና ትፃዋዕ፤ ኣብ ኣፍ ደገታት እታ ኸተማ ኸዓ ቓላ ተስምዕ፤

22“ኣቱም ዓያሹ፥ ክሳዕ መኣዝ ኢኹም ዕሽነት እትፈትዉ? መላገፅቲኸ ክሳዕ መኣዝ እዩ ላግፂ? ሰነፋትከ ኽሳዕ መኣዝ እዮም ፍልጠት ዝፀልኡ?”

23ናብ ተግሳፀይ ተመለሱ፤ እንሆ መንፈሰይ ከፍስሰልኩም፥ ቃላተይ ከፍልጠኩም እየ።

24ክፅውዐኩም እንተለኹ እምቢ ስለ ዝበልኩም፥ ኢደይ ዘርጊሐውን ዘስተብሃለ ስለ ዘየለ፥

25ንዅሉ ምኽረይ ሸለል ስለ ዝበልኩም፥ ንተግሳፀይ ኣይተቐበልኩምዎን።

26ኣነውን፥ እቲ እትፈርሕዎ ኽመፅእ እንተሎ፥ እቲ እትፈርሕዎ ኸም ኣውሎ ንፋስ ክመፅእ፥ መከራ ኸም መሸምቦባ ኾይኑ ኽበፅሐኩም፥ ፀበባን ጭንቀትን ክወርደኩም እንተሎ፥ ብመከራኹም ክስሕቕን ከባጭወልኩምን እየ።

28ሽዑ ናባይ ክትምህለሉ ኢኹም፤ ኣነ ግና ኣይምልሰልኩምን እየ፤ ኣንጊህኹም ክትደልዩኒ ኢኹም፤ ግና ኣይትረኽቡንን፥

29ፍልጠት ስለ ዝፀላእኹም፥ ፍርሓት እግዚኣብሄር ስለ ዘይመረፅኩም፥

30ንምኽረይ ስለ ዘይፈተኹምዎን፥ ንተግሳፀይውን ስለ ዝነዓቕኩምዎ፥

31ፍረ መንገድኹም ክትበልዑ፥ ካብ ምኽርኹምውን ክትፀግቡ ኢኹም።

32ነቶም ዓያሹ፥ ካብ ጥበብ ምርሓቕ ክቐትሎም እዩ፤ ነቶም ደናቝር ከዓ፥ እቲ ሸለልትነቶም ከጥፍኦም እዩ።

33እቲ ዝሰምዐኒ ግና ብደሓን ይነብር፤ ንኽፉእ እንተይፈርሐ ድማ፥ ብዘይ ስግኣት ክነብር እዩ።

Jump to: Chapter 2 →