Proverbs 9

Amharic Tigrinya (መፅሓፍ ቅዱስ)

← Chapter 8 Jump to: Chapter 10 →

1ጥበብ ቤታ ሓነፀት፤ ሸውዓተ ኣዕማድውን ኣቖመትሉ።

2ሰባብሕታ ሓረደት፤ ወይና ፀመቘት፤ ማእዳውን ኣሰናደወት።

3ኣገልገልታ ናብቲ የመና ዝበረኸ ስፍራ ኸተማ ለኣኸት፤ ከምዙይ ኢላ ድማ ፀውዐት፦

4“ዘይለበመ እንተ ሃልዩ ናብዙይ ይምፃእ።” ኣእምሮ ንዝጐደሎም ከምዙይ በለት፦

5ንዑ፥ እንጀራይ ብልዑ፤ ዝፀመቝኩዎ ወይነይ ስተዩ።

6ብህይወት ክትነብሩስ ስንፍና ሕደጉ፤ ብመንገዲ ምስትውዓል ድማ ተመላለሱ።

7ንመላገፂ ዝምዕድ ንባዕሉ ፀርፊ ይቕበል፤ ንኽፉእ ዝግስፅ ከዓ ውርደት ይመፆ።

8ከይፀልአካስ፥ ንሰነፍ ኣይትገስፆ፤ ንለባም ገስፆ፥ ክፈትወካ እዩ።

9ንጥበበኛ መሃሮ፥ ጥበብ ክውስኽ እዩ፤ ንፃድቕ መሃሮ፤ ፍልጠት ክውስኽ እዩ።

10ናይ ጥበብ መጀመርታ ንእግዚኣብሄር ምፍራሕ እዩ፤ ነቲ ቕዱስ ምፍላጥውን ምስትውዓል እዩ።

11ዕለታትካ ብኣይ እየን ዝበዝሓ፤ ዓመታት ዕድሜኻውን ክውሰኻልካ እየን።

12ለባም እንተ ዄንካ፥ ንርእስኻ ትልብም፤ መላገፂ እንተ ዄንካ፥ በይንኻ ኢኻ እትሽከሞ።

13ሰነፍ ሰበይቲ ሁከተኛ እያ፤ ሓሳብ የብላን፥ ሓደኳ ዘይትፈልጥ እያ፤

14ንሳ ኣብ ደገ ቤታን፥ ኣብ በሪኽ ስፍራ ኸተማን፥ ኣብ መንበር ትቕመጥ።

15ነቶም ኣቕኒዖም ዝኸዱ ሓለፍቲ መንገዲ ኸዓ፥ ከምዙይ ኢላ ትፅውዖም፦

16“ኣቱም ዓያሹ፥ ንዑ እተዉ።” ነቲ ኣእምሮ ዘይብሉ ድማ፦

17“ናይ ስርቂ ማይ ጥዑም እዩ፤ ዝተሓብአ እንጀራውን ደስ የብል እዩ” ትብሎ።

18ንሱ ግና ምዉታት ኣብኡ ኸም ዘለዉ፥ ዕዱማታውን ኣብ መዓሙቕ ሲኦል ከም ዘለዉ ኣይፈልጥን እዩ።

← Chapter 8 Jump to: Chapter 10 →