1 Chronicles 12

Awadhi

1इ ओन मनईयन क सूची अहइ जउन दाऊद क लगे आएन जब दाऊद सिकलग नगर मँ रहा। दाऊद तब भी कीस क पूत साऊल स अपने क छुपाए रहत रहा। इ मनईयन दाऊद क जुद्ध मँ मदद दिहे रहेन।

2इ सबइ मनई अपने दाएँ या बाएँ हाथ स धनुस क बाण क जरिये बेध सकत रहेन। अपनी गुलेल स दाएँ या बाँए हाथ स पाथर लोकाइ सकत रहेन। उ पचे बिन्यामीन परिवार समूह क साऊल क सम्बंधी रहेन। ओनकर नाउँ इ सबइ रहेन:

3ओनकर प्रमुख अहीएजेर अउ योआज रहा। (उ पचे समाआ क पूत रहेन। समाआ गिबावासी लोगन मँ स रहा); यजीएल अउर पेलेत (उ पचे अजमावेत क पूत रहेन), अनातोनी नगर क बराका अउर येहू।

4गिबोनी नगर क यिसमायाह, (यिसमायाह एक बीर रहा अउर उ तीस बीरन क प्रमुख भी रहा।) गदेरा लोगन मँ स: यिर्मयाह, यहजीएल, योहानान अउर योजाबाद,

5एलूजै, यरीमोत बाल्याह, अउर समर्याह, हारूपी स सपत्याह,

6कोरह परिवार समूह स एल्काना, यिसिय्याह, अजरेल, योएजेर अउर यासोबाम सबहिं,

7गदोर स यरोहाम क पूत योएला अउर जबद्याह।

8गाद क परिवार समूह क एक हींसा रेगिस्तान मँ दाऊद स ओकरे किले मँ आइ मिला। उ पचे जुद्ध बरे प्रसिच्छित फउजी रहेन। उ पचे भालन अउ ढाल क उपयोग मँ कुसल रहेन। उ पचे सेर क तहर खौफनाक देखात रहेन अउर उ पचे हिरइ क नाईं पहाड़न मँ दउड़ सकत रहेन।

9गाद क परिवार समूह क सेना क प्रमुख एजेर रहा। ओबद्याह अधिकार मँ दूसर रहा। एलीआब अधिकार मँ तीसरा रहा।

10मिसमन्ना अधिकार मँ चउथा रहा। यिर्मयाह अधिकार मँ पाँचवा रहा।

11अत्तै अधिकार मँ छठा रहा। एलीएल अधिकार मँ सातवाँ रहा।

12योहानान अधिकार मा आठवाँ रहा। एलजाबाद अधिकार मँ नवाँ रहा।

13यिर्मयाह अधिकार मँ दसवाँ रहा। मकबन्नै अधिकार मँ गियारहवाँ रहा।

14उ सबइ लोग गादी सेना क प्रमुख रहेन। उ समूह क सब स कमजोर फउजी भी दुस्मन क सौ फउजियन स जुद्ध कइ सकत रहा। उ समूह क सब स जियादा बलिस्ठ फउजी दुस्मन क एक हजार फउजियन स जुद्ध कइ सकत रहा।

15गाद क परिवार समूह क उ सबइ फउजी रहेन जउन बरिस क पहिले महीने मँ यरदन नदी क उ पार गएन। इ बरिस क उ समइ रहा, जब यरदन नदी मँ बाढ़ आई रही। उ पचे घाटियन मँ रहइवाले सबहिं लोगन क पाछा कइके भगाएन। उ पचे ओन लगोन क पूरब अउ पच्छिम मँ पाछा कइके भगाएन।

16बिन्यामीन अउ यहूदा क परिवार समूह क दूसर लोगन भी दाऊद क लगे किला मँ आएन।

17दाऊद ओनसे भेंटइ बाहेर निकरा। दाऊद ओनसे कहेस, “जदि तू लोग सान्ति क संग मोर सहायता करइ आए हो, तउ मइँ तू लोगन क सुआगत करत हउँ। मोरे संग राह। किन्तु जदि तू मोका मोर दुस्मनन क हाथ मँ देइ बरे आवा अहा, जब कि मइँ तोहार कछू भी बुरा नाहीं किहे अहउँ, तउ हमरे पुरखन क परमेस्सर लखी कि तू का किहा अउर तोहका दण्ड देइ।”

18अमसै तीस बीरन क प्रमुख रहा। तब अमासै पइ आतिमा उतरी। अमासै कहेस, “दाऊद हम तोहार अही। यिसै क पूत, हम तोहार संग अही। सान्ति होइ तोहारे संग। सान्ति ओन लोगन क जउन तोहार मदद करइँ। काहकि तोहार परमेस्सर, तोहार मदद करत ह।” तब दाऊद एन लोगन क सुआगत किहस। उ ओनका आपन सैनिकन क प्रमुखन बनाएस।

19मनस्से क परिवार क समूह क कछू लोग भी दाऊद क संग होइ गएन। उ पचे दाऊद क संग तब होइ गएन जब ओका पलिस्तियन क संग साऊल क खिलाफ जुद्ध करइ बरे जाइ क रहा। मुला असल मँ दाऊद अउ ओकर लोग पलिस्तियन क मदद नाहीं किहन। एह बरे पलिस्तियन क प्रमुख सलाह क बाद दाऊद क बाहेर पठइ देइ क निर्णय लिहन। ओन सासकन कहेन, “जदि दाऊद अपने सुआमी साऊल क लगे जाइ, तउ हमार मूँड़ि काट डाइ जइहीं।”

20इ सबइ मन्ससे क लोग रहेन जउन दाऊद क संग उ समइ मिलेन जब उ सिकलग: अदना, योजाबाद, यदीएल, मीकाएल, योजाबाद, एलीहू अउर सिल्लतै नगर क गवा। उ पचे सबहिं मनस्से क परिवार समूह क सेनाध्यच्छ रहेन।

21उ पचे दाऊद क मदद डाकूअन क गिरोह क खिलाफ जुद्ध करइ मँ करत रहेन। उ पचे मनस्से क बीर जोधन रहेन। उ पचे दाऊद क सेना क प्रमुख रहेन।

22दाऊद क मदद बरे रोजाना जियादा स जियादा मनई आवत रहेन। इ तरह दाऊद क लगे बिसाल अउ ताकतवर फउज होइ गइ।

23हेब्रोन नगर मँ जउन लोग दाऊद क लगे आएन, ओनकर गनती इ अहइ। इ सबइ मनई जुद्ध बरे तइयार रहेन। उ पचे साऊल क राज्ज क, दाऊद क देइ आएन। इहइ उ बात रही जेका यहोवा कहे रहा कि होइ। इ ओनकर गनती अहइ:

24यहूदा क परिवार समूह स छ: हजार आठ सौ मनई जुद्ध बरे तइयार रहेन। उ पचे भालन अउ ढाल रखत रहेन।

25सिमोन क परिवार समूह स सात हजार एक सौ मनई रहेन। उ पचे जुद्ध बरे तइयार बीर सैनिक रहेन।

26लेवी क परिवार समूह स चार हजार छ: सौ मनई रहेन।

27यहोयादा उ समूह मँ रहा। उ हारून क परिवार स प्रमुख रहा। यहोयादा क संग तीन हजार सात सौ मनई रहेन।

28सादोक भी उ समूह मँ रहा। उ बीर जवान फउजी रहा। उ अपने परिवार स बाईस अधिकारियन क संग आवा।

29बिन्यामीन क परिवार समूह स तीन हजार मनइयन रहेन। उ सबइ साऊल क सम्बन्धी रहेन। उ समइ तलक, ओनके जियादातर मनई साऊल परिवार क भगत रहेन।

30एप्रैम परिवार समूह स बीस हजार आठ सौ मनई रहेन। उ पचे बीर जोधा रहेन। उ पचे अपने परिवार क मसहूर मनईरहेन।

31मनस्से क आधे परिवार समूह स अटठारह हजार मनईरहेन। ओनका नाउँ लइके आवइ क बोलावा गवा अउर दाऊद क राजा बनाइ क कहा गवा।

32इस्सकार क परिवार स दुइ सौ बुद्धिमान प्रमुख रहेन। उ पचे इस्राएल बरे उचित समइ पइ ठीक काम करब जानत रहेन। ओनकर सम्बन्धी ओनके संग रहेन अउर ओनकर आदेस क पालन करत रहेन।

33जबूलून क परिवार समूह स पचास हजार मनइयन रहेन। उ सबइ प्रसिच्छित फउजी रहेन। उ पचे हर तरह क अस्त्र-सस्त्र स जुद्ध बरे प्रसिच्छित रहेन। उ पचे दाऊद क मदद पूरी वफ़ादारी क संग किहस।

34नप्ताली क परिवार समूह स एक हजार अधिकारी रहेन। ओनके संग सैंतीस हजार मनई रहेन। उ सबइ मनई भालन अउ ढालन लइके चलव रहेन।

35दान क परिवार समूह स जुद्ध बरे तइयार अटठाईस हजार छ: सौ मनई रहेन।

36आसेर क परिवार समूह स जुद्ध बरे तइयार चालीस हजार प्रसिच्छित फउजी रहेन।

37यरदन नदी क पूरब स रूबेन, गादी अउ मनस्से क आधे परिवारन स एक लाख बीस जहार मनई रहेन। ओन लोगन क लगे हर तरह क अस्त्र-सस्त्र रहेन।

38उ पचे सबहिं मनई बीर जोधा रहेन। उ पचे हेब्रोन नगर स दाऊद क सारे इस्राएल क राजा बनावइ क पूरी सलाह कइके आए रहेन। इस्राएल क दूसर लोग भी सलाह किहेन कि दाऊद राजा होइ।

39ओन लोग दाऊद क संग हेब्रोन मँ तीन दिन बिताएन। उ पचे खाएन अउ पीएन, काहेकि ओनकर सम्बन्धियन ओनके बरे भोजन बनाए रहेन।

40जहाँ इस्साकार, जबूलून अउर नप्ताली क समूह रहत रहेन, उ छेत्र स भी ओनकर पड़ोसी गदहन, ऊँट खच्चर अउर गइया पइ भोजन लइके आए रहेन। उ पचे बहोत सा आटा, अंजीर पूड़ा, रेसिन, दाखरस, तेल, गाय-बर्धा अउर भेड़िन लिआएन। इस्राएल मँ लोग बहोत खुस रहेन।

← Chapter 11 Jump to: Chapter 13 →