1 Chronicles 14

Awadhi

← Chapter 13 Jump to: Chapter 15 →

1हीराम सूर नगर क राजा रहा। हीराम दाऊद क लगे सँदेस वाहक पठएस। हीराम देवदारु क लट्ठन, संगतरास अउ बढ़ई भी दाऊद क लगे पठएस। हीराम ओनका दाऊद बरे एक ठु महल बनावइ बरे पठएस।

2तब दाऊद समुझ सका कि यहोवा ओका फुरइ ही इस्राएल क राजा बनाएस ह। यहोवा दाऊद क राज्ज क बहोत विस्तृत अउ सक्तीसाली बनाएस। परमेस्सर इ एह बरे किहस कि उ दाऊद अउर इस्राएल क लोगन स पिरेम करत रहा।

3दाऊद यरूसलेम मँ बहोत सी मेहरारुअन क संग बियाह किहेस अउर ओकरे बहोत स बिटवा अउ बिटिया भइन।

4यरूसलेम मँ पइदा भइ दाऊद क सन्तानन क नाउँ इ सबइ अहइँ: सम्मू, सोबाब, नातान, सुलैमान,

5यिभार, एलीसू, एलपेलेत,

6नोगह, नेपेग, यापी,

7एलीसामा, बेल्यादा, अउर एलीपेलेद।

8पलिस्ती लोग सुनेन कि दाऊद क अभिसेक इस्राएल क राजा क रूप मँ भवा ह। एह बरे, सबहिं पलिस्ती लोग दाऊद क खोज मँ गएन। दाऊद एकरे बारे मँ सुनेस। एह बरे उ पलिस्ती लोगन स लड़इ गवा।

9पलिस्तियन रपाईम क घाटी मँ रहइवले लोगन पइ हमला किहेन अउर ओनकी चिजियन चुराएन।

10दाऊद परमेस्सर स पूछेस, “का ओका जानइ चाही अउर पलिस्ती लोगन स जुद्छ करइ चाही? क तू मोका ओनका हरावइ देब्या?” यहोवा दाऊद क जवाब दिहस, “जा! मइँ तोहका पलिस्ती लोगन क हरावइ देब।”

11तब दाऊद अउर ओकर लोग बालपरासीम नगर तलक गएन। हुवाँ दाऊद अउ ओकर लोग पलिस्ती लोगन क हराएन। दाऊद कहेस, “जिस तरह टूटहे बाँधे स पानी फूट पड़त ह उहइ तरह, परमेस्सर मोरे दुस्मनन पइ पूट पड़ा ह। परमेस्सर इ मोरे माध्यम स किहस ह।” इहइ कारण अहइ कि इ जगह बालपरासीम क नाउँ स जाना जात ह।

12पलिस्ती लोग अपनी मूरतियन क बालपरासीम मँ तजि दिहन। दाऊद ओन मूरतियन क बार देइ क आदेस दिहस।

13पलिस्तियन रपाईम घाटी मँ रहइवाले लोगन पइ फुन हमला किहन।

14दाऊद फुन परमेस्सर स पराथना किहस। परमेस्सर दाऊद क पराथना क जवाब दिहस। परमेस्सर कहेस, “दाऊद, जब तू हमला करा तउ पलिस्ती लोगन क पाछे पहाड़ी पइ जिन जा। एकरे बदले, ओनके चारिहुँ कइँती जा। हुवाँ छुपा, जहाँ मोखा क बृच्छ अहइ।

15एक ठू पहरेदार क बृच्छ क चोटी पइ चढ़इ क कहा। जइसे ही उ बृच्छन क चोटी स फउज क चलइ क आवाज क सुनी, उहइ समइ तू पलिस्तियन पइ हमला करा। परमेस्सर तोहरे समन्वा आइहीं अउ पलिस्ती फउज क हराइहीं।”

16दाऊद उहइ किहस जउन परमेस्सर करइ क कहेस एह बरे दाऊद अउ ओकर फउज पलिस्ती फउज क हराएस। उ पचे पलिस्ती फउजियन क लगातार गिबोन नगर स गेजेर नगर तलक मारेन।

17इ तरह दाऊद सबहिं देसन मँ मसहूर होइ गवा। यहोवा सबहिं रास्ट्रन क हिरदइ मँ ओकर डर बइठाइ दिहस।

← Chapter 13 Jump to: Chapter 15 →