1 Chronicles 17

Awadhi

← Chapter 16 Jump to: Chapter 18 →

1दाऊद अपने घरे चले जाइ क पाछे नातान नबी स कहेस, “लखा, मइँ देवदारु स बने घरे मँ रहत हउँ, मुला यहोवा क करार क सन्दूख तम्बू मँ धरा अहइ। मइँ परमेस्सर बरे एक मन्दिर बनावइ चाहत अहउँ।”

2नातान दाऊद क जवाब दिहस, “तू जउन कछू करइ चाहत अहा, कइ सकत अहा। परमेस्सर तोहरे संग अहइ।”

3मुला परमेस्सर क संदेसा उ रात नातान क मिला।

4परमेस्सर कहेस, “जा अउर मोर सेवक दाऊद स इ कहा: यहोवा इ कहत ह, ‘दाऊद, तू उ नाहीं अहइ जउन मोर बरे एक घर बनाइ।

5जब स मइँ इस्राएल क मिस्र स बाहेर लिआएउँ तब स अब तलक, मइँ घरे मँ नाहीं रहा हउँ। मइँ एक तम्बू स दूसर तम्बू क चरिहुँ कइँती घूमत रहा हउँ। जउने समइ मइँ इस्राएल मँ विभिन्न जगहन पइ चारिहुँ कइँती घूमत रहेउँ, मइँ कउनो प्रमुख स जेनका मइँ आपन लोगन क अगवाइ करइ बरे आदेस दिहेउँ रहा इ नाहीं कहेउँ: तू मोरे बरे देवदारु बृच्छ क काठे स घर काहे नाहीं बनाया ह?’

7“अब तू मोरे सेवक दाऊद स कहा: सर्वसक्तीमान यहोवा तोहसे कहत ह, ‘मइँ तोहका चरागाह स अउर भेड़िन क देखरेख करइ स लिएउँ। मइँ तोहका अपने इस्राएली लोगन क सासक बनाएउँ।

8तू जहाँ गवां, मइँ तोहारे संग रहेउँ। मइँ तोहरे अगवा-अगवा चलेउँ अउर मइँ तोहरे दुस्मनन क मारेउँ। अब मइँ तोहका पृथ्वी पइ सब स जियादा मसहूर मनइयन मँ स एक बना रहेउँ।

9मइँ इ जगह अपने इस्राएल क लोगन क दइ देत अहइँ। मइँ ओनका उ जगह पइ स्थापित करब, अउर उ पचे हुवाँ सान्तिपूवर्क रइहीं। उ पचे अब आगे अउर परेसान नाहीं कीन्ह जइहीं। बुरे लोग ओनका वइसे चोट नाहीं पहोंचाइही जइसा उ पचे पहिले पहोंचाए रहेन।

10उ समइ स जब मइँ आपन लोग इस्राएल क अगुवाइ अउ रच्छा करइ बरे निआवधीसन क नियुक्त किहा, मइँ तोहार सबइ दुस्मनन क हराएस हउँ। “‘मइँ तोहसे कहत हउँ कि यहोवा तोहार परिवार क एक सही परिवार बनाई।

11जब तू मरब्या अउर अपने पुरखन स जाइ भेंटब्या, तब मइँ तोहरे निज पूत क नवा राजा होइ देब। नवा राजा तोहरे पूतन मँ स एक होइ अउर मइँ ओकर राज्ज क सक्तीसाली बनाउब।

12तोहार पूत मोरे बरे एक ठु घर बनाई। मइँ तोहारे पूत क परिवार क सदा बरे सासक बनाउब।

13मइँ ओकर बाप बनब अउर उ मोर पूत होइ। साऊल तोहसे पहिले राजा रहा। मइँ ओह प स आपन पिरेम अउर मदद हटाइ लिएउँ। किन्तु मइँ तोहारे पूत स पिरेम क नाहीं हटाउब।

14मइँ ओका सदा बरे अपने घर अउर राज्ज क संरच्छक बनाउब। ओकर सासन सदा ही चलत रही।’”

15नातान अपने इ दर्सन अउर परमेस्सर जउन सबहिं बातन कहे रहा ओकरे बारे मँ दाऊद स कहेस।

16तब दाऊद पवित्तर तम्बू मँ गवा अउर यहोवा क समन्वा बइठा। दाऊद कहेस, “यहोवा परमेस्सर, तू मोरे बरे अउर मोरे परिवार बरे ऍतना जियादा किहा ह अउर मइँ नाहीं समुझत कि काहे

17अउर माना कि इ काफी नाहीं रहा, किन्तु, ओ परमेस्सर, तू मोका मोरे परिवार क भविस्स बताएस ह। तू मोरे बरे एक बहोत महत्वपूर्ण मनई जइसा बेउहार किहा ह।

18मइँ अउर जियादा का काहि सकत हउँ? तू मोरे बरे ऍतना जियादा किहा ह अउर तू मोका बहोत सम्मान दिहेस ह अउर मइँ सिरिफ तोहार सेवक हउँ। तू मोका जानत ह।

19यहोवा, तू इ अजूबा कार्य मोरे बरे किहा ह अउर इ तू किहा काहेकि तू इ महान कार्य क बतावइ चाहत ह।

20यहोवा, तोहरे समान अउर कउनो नाहीं अहइ। तोहरे अलावा कउनो परमेस्सर नाहीं अहइ। हम लोग कबहुँ कउनो देवता क अइसे अजूबा कार्य करत नाहीं सुना ह।

21का इस्राएल क समान दूसर कउनो रास्ट्र अहइ? इस्राएल ही पृथ्वी पइ एकमात्र रास्ट्र अहइ जेकरे बरे तू इ अजूबा कार्य किहा। तू हम क महान अउर चमत्कारवाला अद्भुत कार्य कइ के मिस्र स बाहेर निकार्या अउर हमक आजाद किहा। तू अपने लोगन क समन्वा गया अउर दूसर लोगन क हमरे बरे भुइँया छोड़ेइ क मजबूर किहा। अउर इ महान कार्य कइके तू मसहूर होइ गवा।

22तू इस्राएल क सदा बरे आपन लोग बनाया अउर यहोवा तू ओकर परमेस्सर भया।

23“यहोवा, तू इ प्रतिग्या मोहसे अउर मोरे परिवार स किहा ह। अब स तू सदा बरे इ प्रतिग्या क बनाए राखा। उ करा जउन तू करइ कहया।

24अपनी प्रतिग्या क पूरा करा, जेहसे लोग तोहरे नाउँ क सम्मान सदा बरे कइ सकइँ। तब लोग कहिहीं, ‘सर्वसक्तीसाली यहोवा इस्राएल क परमेस्सर अहइ।’ मइँ तोहार सेवक अहउँ। कृपा कइके मोरे परिवार क सक्तीसाली होइ द्या अउर उ तोहार सेवा सदा करत रहइ।

25“मोरे परमेस्सर, तू मोहसे, अपने सेवक कहया, कि तू मोरे परिवार क एक ठु राजपरिवार बनउब्या। एह बरे मइँ तोहारे समन्वा ऍतना निडर होत हउँ, एह बरे मइँ तोहसे इ सबइ चिजियन करइ बरे कहत हउँ।

26यहोवा तू परमेस्सर अहा अउर परमेस्सर तू एन नीक चिजियन क वचन मोरे, आपन सेवक बरे किहा ह।

27यहोवा, तू मोरे परिवार क आसीस देइ मँ ऍतना जियादा दयालु रहा ह। तू प्रतिग्या किहा, कि मोरे परिवार तोहार सेवा सदा सदा ही करत रही। यहोवा तू मोर परिवार क आसीस दिहा ह, एह बरे मोरे परिवार सदा आसीस पाई।”

← Chapter 16 Jump to: Chapter 18 →