1 Chronicles 18

Awadhi

← Chapter 17 Jump to: Chapter 19 →

1पाछे दाऊद पलिस्ती लोगन पइ हमला किहस। उ ओनका हराएस। उ गत नगर अउर ओकरे चाहिहुँ कइँती क नगरन क पलिस्ती लोगन स जीत लिहस।

2तब दाऊद मोआब देस क हराएस। मोआबी लोग दाऊद क गुलाम बन गएन अउर ओकर लगे नज़राना लाएन।

3दाऊद हददेज़ेर क सेना क बिरुद्ध भी लड़ा। हददेज़ेर सेबा क राजा रहा। दाऊद उ सेना क संग लगातार हमात नगर तलक लड़ा। दाऊद इ एह बरे किहस कि हददेज़ेर अपने राज्ज क परात नदी तलक फइलावाइ क कोसिस किहस।

4दाऊद हददेज़ेर एक हजार रथ, सात हजार सारथी अउर बीस हजार फउजी लिहेस। दाऊद हददेज़ेर क जियादातर घोड़न अंग-अंग कइ दिहस जउन रथ हींचत रहेन। मुला दाऊद सौ रथन क हींचइ बरे काफी घोड़न क बचाइ लिहस।

5दमिस्क नगर स अरामी लोग हददेज़ेर क मदद करइ बरे आएन हददेज़ेर सोबा क राजा रहा। मुला दाऊद बाईस हजार अरामी फउजियन क पराजित किहेस अउ मार डाएस।

6तब दाऊद दमिस्क नगर मँ राज्जपालन क राखेस। अरामी लोग दाऊद क प्रजा बन गएन अउ ओकरे लगे नज़राना लइके आएन। एह बरे यहोवा दाऊद क, जहाँ कहूँ उ गवा, बिजइ दिहस।

7दाऊद हददेज़ेर क सेनापतियन क सोना क ढालन लिहस अउर ओनका यरूसलेम लइ आवा।

8दाऊद तिभत अउ कून नगरन स बहोत जियादा काँसा प्राप्त किहस। उ पचे नगर हददेज़ेर क रहेन। पाछे, सुलैमान इ काँसे क उपयोग काँसे क हौदन, काँसे क खम्भा अउर सबइ दूसर चिजियन बनावइ मँ किहस जउन मन्दिर क बरे काँसे स बनी रहिन।

9तोऊ हमात नगर क राजा रहा। हददेज़ेर सोबा क राजा रहा। तोउ सुनेस कि दाऊद हददेज़ेर क सारी सेना क हराइ दिहस।

10एह बरे तोउ अपने पूत हदोराम क राजा दाऊद क लगे सान्ति क याचना करइ अउ जीत क मुबारकबाद देइ बरे पठएस। उ इ किहेस काहेकि दाऊद हददेज़ेर क खिलाफ जुद्ध किहे रहा अउर ओका हराए रहा। पहिले हददेज़ेर तोउ स जुद्ध किहे रहा। हदोराम दाऊद क हर एक तरह क सोना, चाँदी अउर काँसा स बनी चिजियन दिहस।

11राजा दाऊद ओन चिजियन क पवित्तर बनाएस अउर यहोवा क दिहस। दाऊद अइसा उ सारे चाँदी, सोना क संग किहेस जेका उ एदोमी, मोआबी, अम्मोनी पलिस्ती अउर अमालेकी लोगन स प्राप्त किहे रहा।

12सरूयाह क पूत अबीसै नून क घाटी मँ अट्ठारह हजार एदोमी लोगन क मारेस।

13अबीसै एदोमी मँ राज्जपाल क राखेन अउर सबहिं एदोमी लोग दाऊद क गुलाम होइ गएन। दाऊद जहाँ कहूँ भी गवा, यहोवा ओका बिजइ दिहस।

14दाऊद पूरे इस्राएल क राजा रहा। उ उहइ किहस जउन सब क बरे उचित अउ निआवपूर्ण रहा।

15सरूयाह क पूत योआब, दाऊद क सेना क सेनापति रहा। अहीलूद क पूत यहोसापात ओन कामन क बारे मँ लिखेस जउन दाऊद किहेस।

16सादोक अउ अबीमेलेक याजक रहेन। सादोक अहीतूब क पूत रहा अउर अबीमेलेक एब्यातार क पूत रहा। सबसा लिपिक रहा।

17यहोयदा क पूत बनायाह करेतियन अउ पलेती लोगन क मार्गदर्सन क उत्तरदायी रहा। अउर दाऊद क पूतन बिसेस अधिकारी रहेन। उ पचे राजा दाऊद क संग सेवारत रहेन।

← Chapter 17 Jump to: Chapter 19 →