2 Kings 22

Baoule (NYANMIƐN NDƐ'N 1998)

← Chapter 21 Jump to: Chapter 23 →

1Kɛ Zozias ´yo famiɛn'n, wuun ɔ lɛ afuɛ mɔcuɛ. Ɔ trannin Zerizalɛm afuɛ ablasan-nin-kun. I nin suan Zɛdida. Adaza ng'ɔ fin Bɔzkat'n i wa-a.

2Like nga Anannganman klo i'n yɛ ɔ yoli-ɔ. Ajalɛ klanman nga i nannan David fali'n i kunngba'n yɛ ɔ fali-ɔ, ɔ'a kaci-mɛn i.

3Kɛ Zozias yoli famiɛn'n, i afuɛ blu-nin-mɔcuɛ'n su'n, ɔ sunmannin i fluwa klɛfuɛ'n Nyanmiɛn i sua'n nun lɔ. Be flɛ i kɛ Safan, ɔ ti Mɛsilam i wa Azalia i klun ba. Kɛ ɔ ´sunmɛn i'n, ɔ seli i kɛ:

4«Kɔ ko to Nyanmiɛn nyrun jranfuɛ'm be su kpɛn'n bɔ be flɛ i Ilkiza'n. Se i kɛ ɔ `ka sika nga be yi i Anannganman i sua'n nun'n, bɔ Nyanmiɛn nyrun jranfuɛ nga be nian Nyanmiɛn i sua'n i anuan'n su'n be sɔ nun'n.

5Man be fa man be nga be ti Anannganman i sua'n nun junman difuɛ'm bé su kpɛn mun. Nan be kusu be fa man be nga be di junman Nyanmiɛn i sua'n nun'n, nan be `fa wlawla sua'n nun.

6Be `fa wie tannin sua'n su tufuɛ mun, nin sua kplanfuɛ mun, ɔ nin junman difuɛ kun nga mun be kalɛ. Yɛ be `fa wie to waka nin yɛbuɛ nga b'a sɛ'n, nan be `fa wlawla sua'n nun,

7sanngɛ nán be usa sika nga be fa mannin be'n i osu, afin be di nanwlɛ.»

8Kɛ Safan ko toli Ilkiza b'ɔ ti Nyanmiɛn nyrun jranfuɛ be su kpɛn'n lɔ'n, ɔ boli famiɛn'n i jasin'n kleli i. Ɔ seli Safan kɛ: «M'an wun mmla fluwa'n Anannganman i sua'n nun wa.» Ilkiza fa mɛnnin i nan ɔ'a kanngan.

9Safan sɛli i sin famiɛn'n wun lɔ, nan ɔ'a ko bo jasin ng'ɔ nyɛnnin i'n ɔ'a kle i. I waan: «Ɔ sufuɛ'm be yili sika ng'ɔ o Nyanmiɛn i sua'n nun lɔ'n be fa mannin be nga be di Anannganman i sua'n su junman'n bé su kpɛn mun.»

10Safan seli famiɛn'n ekun kɛ: «Ilkiza b'ɔ ti Nyanmiɛn nyrun jranfuɛ'n mannin min fluwa kun.» Yɛ ɔ kanngannin fluwa sɔ'n kleli famiɛn nin-ɔn.

11Kɛ famiɛn'n tili mmla fluwa'n i nun ndɛ'n, ɔ titili i wun tralɛ'm be nun.

12I sin ɔ flɛli Ilkiza b'ɔ ti Nyanmiɛn nyrun jranfuɛ'n, nin Safan i wa Asikam nin Mise i wa Akbɔr, ɔ nin Safan b'ɔ ti fluwa klɛfuɛ'n, ɔ nin Azaza b'ɔ ti i sufuɛ'm be nun kun'n. Ɔ seli be kɛ:

13«Amun `wɔ be ko wun Anannganman wun, man ɔ kan fluwa nga be wunnin i'n i wun ndɛ kle amun. Amun `wɔ min nin Zidafuɛ mun e dunman nun, afin kɛ n niɛn i sa'n, e nannan'm b'a fa-man fluwa nga nun ndɛ'm be su. B'a nian-man ndɛ sɔ'm be su b'a nanti-man. I ti Anannganman i ya nga ɔ'a fɛ i é wun'n ti-man blɛblɛ.»

14Ilkiza b'ɔ ti Nyanmiɛn nyrun jranfuɛ'n, nin Asikam, nin Akbɔr, nin Safan, ɔ nin Azaza be ɔli Nyanmiɛn nuan ijɔfuɛ bla nga be flɛ i kɛ Ilda'n i sin. Bla sɔ'n, i wun yɛlɛ Aras i wa Tikva i klun ba Salɔm b'ɔ nian Nyanmiɛn i sua'n nun tralɛ'm be su'n. Bla sɔ'n tran Zerizalɛm klɔ uflɛ'n su lɔ. Be kannin ndɛ'n be kleli i.

15Yɛ Ilda waan be ko se famiɛn'n kɛ yoo:

16«Anannganman b'ɔ ti Izraɛl Nyanmiɛn'n wan yoo: ‹N wa yo man nyrɛnnɛn nga be kɛn i ndɛ fluwa nga Zida famiɛn'n kanngannin nun'n i nun'n, ɔ ´tɔ lika ng'ɔ o yɛ'n ɔ nin i nunfuɛ'm bé su.

17Ya dan nga n fɛli i klɔ nga wun'n, ɔ ti kɛ sin kun bɔ ɔ'a jue bɔ be kwla nuɛn-mɛn i'n sa. Afin kɛ be kaci be sin sili min, be yrali ansans mannin amuɛn mun, ɔ man be kunnin min ya.

18Amun `ko se Zida famiɛn'n b'ɔ sunmannin amun mín sin'n kɛ min Anannganman bɔ n ti Izraɛl Nyanmiɛn'n min waan yoo: A tili ndɛ ng'ɔ o fluwa nga nun'n.

19A tili i kɛ min waan m ´bo klɔ nga nin i nun sran'm be sannzan nan n ´nunnun be. Ndɛ sɔ'n wluli ɔ́ wun, ɔ man a titili ɔ wun tralɛ'm be nun, a kannin ɔ́ wun ase min bo, a sunnin. I sɔ'n ti, m'an ti ndɛ nga a kannin'n. Min Anannganman yɛ n kan sɔ-ɔ.

20Nan yoo, a ´wu, sanngɛ ɔ nyanmiɛn su wie yɛ ɔ ´kun wɔ-ɔ. Be ´sie wɔ wɔ asieliɛ bɔ a dun mmua kpɛli'n kun nun. A ´la lɔ diin. Nyrɛnnɛn nga n wa fa yi i lika nga su'n su yo-man ɔ nyrun.› » Ilkiza b'ɔ ti Nyanmiɛn nyrun jranfuɛ nin be nga'm be ɔli ko boli i sɔ jasin'n kleli famiɛn'n.

← Chapter 21 Jump to: Chapter 23 →