2 Kings 5

Baoule (NYANMIƐN NDƐ'N 1998)

← Chapter 4 Jump to: Chapter 6 →

1Naaman b'ɔ ti Siri lɔ famiɛn'n i sonja'm be su kpɛn'n, i wun yo i min'n i fɛ kpa, yɛ ɔ lɛ nyrun i sa nun, yɛlɛ kɛ i yɛ man Anannganman deli Sirifuɛ mun-ɔn. Sanngɛ sran dan sɔ'n b'ɔ ti safunyrɛn'n, ɔ ti kokowefuɛ.

2Kɛ Siri sonja'm be nin Izraɛlfuɛ'm be ko kunnin alɛ bɔ be ´ba'n, be trali Izraɛl lɔ talua kaan kun i lomuɛn be nin i bali. Naaman i yi'n fɛli i yoli i talua.

3Ɔ seli i min bla'n kɛ: «Sɛ ɔ ti kɛ min min bian'n ɔ o Samari lɔ Nyanmiɛn i nuan ijɔfuɛ i wun lɔ'n, wuun ɔ ´yo man i kokowe'n ´wie.»

4Ndɛ nga talua kan'n b'ɔ fin Izraɛl'n kannin'n, Naaman ko kan kleli famiɛn'n.

5Siri famiɛn'n seli i kɛ: «Kɔ Samari, m ´man wɔ fluwa a ´ko fa man lɔ famiɛn'n.» Yɛ Naaman ɔli-ɔ. Kɛ ɔ ´kɔ'n, ɔ fali jɛtɛ ufue kilo ya nsan, nin sika ɔkwlɛ kilo ablesiɛn, ɔ nin bé wun kacilɛ tralɛ blu.

6Ɔ fali fluwa'n ko mannin Izraɛl famiɛn'n. Siri famiɛn'n klɛli nun kɛ: «Sɛ a kanngan fluwa nga nun'n, a wa wun sa nga ti yɛ n fa Naaman b'ɔ ti min sufuɛ'n m blɛli wɔ'n. Min waan a yo man i kokowe'n wie.»

7Blɛ bɔ Izraɛl famiɛn'n kanngannin fluwa'n nun cɛ'n, ɔ titili i wun tralɛ'm be nun. Yɛ i waan: «?Nyanmiɛn yɛlɛ min bɔ n yo man sran wu annzɛ ɔ nyan nguan-an, bɔ i ti yɛ ɔ se min kɛ n yo man i sran'n i kokowe'n wie-ɔ? Amun `nian, utre bɔ cɛ yɛ ɔ su fa wla min sin lɛ-ɔ.»

8Kɛ Elize b'ɔ ti Nyanmiɛn i sran'n tili i kɛ Izraɛl famiɛn'n ɔ'a titi i wun tralɛ'm be nun'n, ɔ sunmannin sran kɛ ɔ ko se i kɛ: «?Ɔ yo sɛ ti yɛ a titili ɔ́ wun tralɛ'm be nun-ɔn? Se i man ɔ bla ń sin. Ɔ wa wun i kɛ Nyanmiɛn i nuan ijɔfuɛ kun wo Izraɛl mɛn'n nun wa sakpa.»

9Naaman fɛli i kakaklolo'n, ɔ nin i nnɛn kpanngɔ mun, nan ɔ'a ba. Ɔ wa jrannin Elize i sua'n i anuan'n nun.

10Elize yili sran kɛ ɔ ko se i kɛ: «Ko wunnzin Zurdɛn'n nun kpɛ nso, yɛ a ´yo juejue, kpɛkuun a ´yo saun.»

11Naaman fali ya kpa, ɔ su kɔ, ɔ ijɔli kpa. I waan: «Kɛ m ´ba'n, n bu i kɛ Nyanmiɛn i nuan ijɔfuɛ'n ´fite ba min wun wa, nan ɔ ´bo Anannganman i Nyanmiɛn'n i dunman, nan ɔ ´fɛ i sa ´sie n tukpacɛ'n su, yɛ ɔ ´yo man kokowe'n ´wie.

12?I kpa'n, nzue ba nga be o Damas lɔ'n, Abana'n, ɔ nin Parpar'n, be ti-man kpa tra-man nzue ba nga be o Izraɛl mɛn'n nun wa'n be kwlaa? N kwla wunnzin-man nzue sɔ'm be nun nan n yo-man juejue?» Ɔ fali ya kpa. Ɔ su sɛ i sin kɔ.

13Yɛ i sran'm be wunngeli i wun lɔ-ɔ. Be seli i kɛ: «?Nannan, sɛ like kekle wie yɛ Nyanmiɛn i nuan ijɔfuɛ'n waan a yo'n, a su yo-man? I sɔ'n ti, like ng'ɔ seli wɔ kɛ a yo'n, mian ɔ nyin yo. Ɔ ti bɔ like saa kaan sa, i waan a ko wlu nzue'n nun, nan a yo saun.»

14Naaman ɔli Zurdɛn'n su lɔ, ɔ jrali nun kpɛ nso ɔ wunnzinnin kɛ Nyanmiɛn i nuan ijɔfuɛ'n seli i kɛ ɔ yo'n sa. Yɛ i wunnɛn'n yoli weiin, ɔ kacili kɛ bakan wunnɛn sa.

15Naaman nin i sran nga be bali'n be sali bé sin Nyanmiɛn i nuan ijɔfuɛ'n wun lɔ. Kɛ be juli lɔ'n, Naaman ko jrɛnnin i nyrun lɛ, nan ɔ'a se i kɛ: «Siɛn'n, m'an wun i wlɛ kɛ asiɛ wunmuan'n su'n, Nyanmiɛn fi nun-man lɛ san Izraɛl wa yɛ Nyanmiɛn wo-ɔ. I sɔ'n ti, n nin like kan bali kɛ n ´fa man wɔ, yɛ ɔ o yɛ'n. N ´srɛ wɔ, sɔ nun.»

16Elize tɛli i su kɛ: «N kan Anannganman bɔ n su i'n i ti! N su sɔ-man nun.» Naaman jrannin su kpa kɛ ɔ `fa, sanngɛ ɔ'a sɔ-man nun.

17Kpɛkuun Naaman seli i kɛ: «Sɛ ɔ waan a fa-man'n, sanngɛ kplin su man n fa wa fa'n wie. N ´fa nga milɛ nnyɔn be kwla sua'n n ´fa kɔ, afin tɛ nga be yrɛ i nnɛn'n kɔlikɔli'n, ɔ nin tɛ uflɛ bɔbɔ, n klo-man kɛ n yi wie fi m man amuɛn mun kun. San Anannganman yɛ n ´yi mɛn i-ɔ.

18N ´srɛ Anannganman kɛ ɔ yaci sa kun cɛ min. Sa sɔ'n yɛlɛ kɛ, kɛ min min'n wlu i amuɛn bɔ be flɛ i Rimɔn'n i sua'n nun b'ɔ ´koto'n, n kusu n koto wie, afin ɔ kisa min sa'n su. Sɛ n ko koto Rimɔn i sua'n nun sɔ'n, man Anannganman yaci cɛ min.»

19Elize seli i kɛ: «Kɔ, man ɔ wun jɔ wɔ!» Yɛ ɔ ɔli-ɔ. Naaman ɔ'a ɔ ɔ'a ju i nyrun bɔ kpa.

20Kpɛkuun Geazi b'ɔ ti Nyanmiɛn i nuan ijɔfuɛ Elize i gbanflɛn'n seli i klun lɔ kɛ: «Kpaa, min min'n ɔ'a yaci Naaman b'ɔ ti Sirifuɛ'n i nun ɔ'a ɔ. Ɔ'a sɔ-man like ng'ɔ fa bali kɛ ɔ ´fa man'n nun. N kan Anannganman ti! N ´wanndi n ´su i su, nan n ´se i kɛ ɔ man min like.»

21Yɛ Geazi wanndi suli Naaman su-ɔ. Kɛ Naaman wunnin kɛ ɔ wanndi su i su'n, ɔ fin i kakaklolo'n nun jrali. Ɔ ɔli i atin kpalɛ. Yɛ ɔ usɛli i kɛ: «?Nguɛ sa kan-an?»

22Yɛ Geazi tɛli i su kɛ: «Sa fi! Min min'n yɛ ɔ sunmannin min-ɔn. I waan n wa se wɔ kɛ Nyanmiɛn i nuan ijɔfuɛ'm bé nun sran nnyɔn be fin Efraim oka'n su lɔ b'a ju i wun lɛ icra'n. I ti i waan n wa to wɔ, nan n srɛ wɔ kɛ a mɛn i jɛtɛ ufue kilo ablasan, ɔ nin bé wun kacilɛ tralɛ nnyɔn, nan ɔ `fa man be.»

23Naaman seli i kɛ: «M ´man jɛtɛ ufue kilo ablesiɛn. Kplin su nan fa.» Naaman jrannin su kpa kɛ ɔ `fa. Ɔ man ɔ fali jɛtɛ ufue kilo ablesiɛn'n, ɔ wlɛli i bajɛ nnyɔn nun fa mɛnnin i. Ɔ fali tralɛ bɔ be fa kaci bé wun'n sɔ nnyɔn mɛnnin i ekun. Ɔ fali ninnge sɔ mun mɛnnin i sufuɛ nnyɔn kɛ be fa ko sunmɛn i. Be sua dunnin mmua Geazi nyrun be ɔli.

24Kɛ be juli kpɔlɛ'n su'n, Geazi fali ninnge'n ko sieli i bɔbɔ sua lɔ. Nan ɔ man sran sɔ'n b'a sa be sin.

25Yɛ Geazi ɔli i min'n i wun lɔ-ɔ. Elize usɛli i kɛ: «?Geazi, a fin nin?» Ɔ tɛli i su kɛ: «Min min, m'an ɔ-man lika fi!»

26Elize seli i kɛ: «?Kɛ bian'n ´fin i kakaklolo'n nun ´jra, b'ɔ ´ko kpa wɔ atin'n, be waan min wawɛ'n nun-man lɔ? ?Tralɛ'n i falɛ wafa nga a ko fɛli i lɛ'n, i su-ɔ? Yɛ sika nga a ´fa to olivie fie, nin vinyi fie, nin bua, nin nannin, nin kanga yasua, ɔ nin kanga mmla mun'n, i falɛ wafa nga a ko fɛli i lɛ'n, ɔ ti kpa?

27Nian, Naaman i kokowe'n, ɔ ´yo wɔ nin wɔ osu'n nunfuɛ mun, yɛ ɔ ´ka amún wun sɔ tititi.» Yɛ Geazi fiteli-ɔ. Kɛ ɔ fɛ i Elize wun lɛ b'ɔ ´kɔ'n, kokowe'n ɔ'a yo i. I wunnɛn'n yoli ufue fuaii.

← Chapter 4 Jump to: Chapter 6 →