2 Chronicles 16

Edo ((E Baibol Ẹdo) Version 1996)

← Chapter 15 Jump to: Chapter 17 →

1Vbe ukpo ne ogie ehan yan ọgban ne Asa ne ọba e Juda kegha rre ẹkete, e Baasia ne ọba Izrẹl keghi mu okuọ gha die Juda, ọ na suẹn gha gba odin ga Rama ne ọ miẹn ehe na khui odẹ e Juda, ne a ghẹ lao ra ne a ladian vbọ.

2Rhunmwuda ọnii, Asa keghi viọ esiliva kevbe igoru vbe aza ni rre Ọgua Osa kevbe ẹguae, ọ na viọ gie Benhadad ne ọba e Siria vbe Damaskọs, ọ na gie ne a tama rẹn wẹẹ,

3“Gie ima gba gha ru emwi kugbe zẹ vbene avbe erha ima gha ru. Te I ya avbe esiliva kevbe igoru na ha okọ guẹ Banbanna nian, fian ugbẹn ne ọ te mu uwẹ vbe Baasia ne ọba Izrẹl fua, ne ọ miẹn ehe na viọ ivbiyokuo ẹre hin mwẹ ẹvbo rre.”

4E Benhadad keghi gele kue yọ zẹ vbene Asa tama rẹn, ọ na gie avbe ekaokuo ẹre kevbe ivbiyokuo iran, ne iran ya khọn avbe ẹvbo ni rre Izrẹl. Iran keghi khọn mu Ijọn, Dan, Ebel Bẹt Maaka, kevbe avbe okpẹvbo ni rre Naftali ehe ne iran viọ evbare yi.

5E Baasia ne ọba ghi họn emwi ne ọ sunu ọ keghi dobọ odin ne ọ gbe ga Rama yi, ọ ma ghi ru ẹe.

6Ẹre Asa ne ọba na si emwa koko ke otọ e Juda hia rre, ọ na wẹ ne iran la okuta ke erhan ne Baasia te gha lo vbe Rama hinrre, iran keghi ya ẹe gba odin ga e Geba kevbe Mizpa.

7Vbe ẹghẹ nii, e Hanani ne akhasẹ keghi bu Asa ne ọba gha khian, ọ tama rẹn wẹẹ, “Rhunmwuda ne u na mu ẹtin ya ivbiyokuo e Siria vbe ne u gha na te mu ẹtin yan e Nọyaẹnmwa, ivbiyokuo ọba Izrẹl lẹ ruẹ fe nẹ.

8Avbe ivbi e Sudan kevbe Libya ma gha mwẹ ivbiyokuo ni bun ra deba ikẹkẹ okuọ ni bun kevbe avbe emwa ni hin ẹsin? Sokpan, rhunmwuda ne u na mu ẹtin yan e Nọyaẹnmwa, ọ keghi gie obọ ruẹ ke ukhunmwu ne ọghe iran.

9Te Nọyaẹnmwa wa rhie aro sẹ otọ vbe agbọn na hia ne ọ miẹn ehe na rhie ẹtin ne iran ne ekhọe ẹre mudia ẹse vbe ehe ne ọ ye. Emwi ukọnmwẹ ọ re u wa ru ni rhunmwuda ọnii nian, ke eban kpao, okuọ ọ re u ghi ra gha khọn ẹghẹ hia.”

10Ọna keghi ya ohu akhasẹ nii mu Asa sẹrriọ ne a na wẹ ne a ya ọgiọrọ rrọ ẹre. Ẹghẹ na ọ re Asa na suẹn gha ru emwa eso vbe uwu emwa ni emwi ne ọ wegbe.

11Emwi hia ni sunu vbe Asa rre ẹkete ke omuhẹn ya sẹ ufomwẹ, a gbẹnnẹ ọẹn ye Ebe Okha Avbe Ọba e Juda ke Izrẹl.

12Vbe ukpo ne ọ gbae vbe ọkpa irrọ vbe iyeva ne Asa ya ẹe vbe ẹkete emianmwẹ owẹ dan keghi kun ẹnrẹn use ye otọ, uhin ọ rhe ye vberriọ, ọ ma bu e Nọyaẹnmwa gha dee do nọ iyobọ, ọ kegha lele ukpọbo khian.

13Vbe iyeke ukpo eva, ọ keghi wu.

14A na re ẹre ye idin ne ọ fian ye uwu okuta ne egbe ẹre vbe Ẹvbo e Devid. Iran keghi ya avbe ọmọ erhan kevbe ori ni winhin wo ẹre egbe wa ẹre ye ukpo, iran keghi hie ogidi erhẹn nọkhua ya ru akhiẹ ne ẹẹn.

← Chapter 15 Jump to: Chapter 17 →