2 Chronicles 32

Edo ((E Baibol Ẹdo) Version 1996)

← Chapter 31 Jump to: Chapter 33 →

1Vbe iyeke avbe emwi na hia, ne Hẹzekaia na ya ekhọe ne ọ mudia ẹse ga e Nọyaẹnmwa, e Senakẹrib ne Ọgbaisi Asiria keghi mu okuọ gha die Juda. Ọ keghi ghae ga avbe ẹvbo ne a gba odin gaa, ọ na we ne ivbiyokuo ẹre guọghọ ekẹn gberra.

2E Hẹzekaia ghi miẹn wẹ te Senakẹrib vbe ho ne ọ mu okuọ la e Jerusalẹm.

3Rẹn vbe ekhaẹmwẹ ọnrẹn na wẹ te iran gha khiọ amẹ ne ọ lẹ ke Jerusalẹm ladian vbe iyeke ẹvbo ne ivbi Asiria ghẹ miẹn amẹ wọn vbe iran a sikẹ e Jerusalẹm nẹ. Avbe ekhaẹmwẹ keghi viọ emwa ni bun ba egbe, iran na ya khiọ ivbi ẹzẹ ni rrọ ne amẹ ghẹ ghi lẹ ladian.

5Ọba na dọlegbe dọlọ emwi ikhẹgbe ẹvbo nii yi, ọ na dọlọ ekẹn ne a gbe lẹga ẹre yi, ọ keghi bọlọ owa ọkhẹ ne gelete lele ẹe, ọ keghi vbe gbe ekẹn ne ọ ke ore. Vbe deba eni, ọ keghi vbe dọlọ emwi ikhẹ egbe ne a bọlọ ye uvun ne a ranrẹn ne ọ rre obọ ne ọ laghe ahọ vbe odẹ e Jerusalẹm nẹdẹ. Ọ keghi vbe dunmwu asoro kevbe asa ni bun.

6Ọ keghi ghae ikpia hia ni rre ẹvbo viọ ye ototọ avbe ọkaokuo ọ na wẹ ne a viọ iran do si koko ye agba nọkhua ne ọ rre ehe ne a la la ẹvbo nii, ọ keghi tama iran wẹẹ,

7“Wa sikhua, vbe ne a i na fian afianma, wa ghẹ gie ohan Ọgbaisi Asiria ra ivbiyokuo ne ọ viọ khian mu uwa. Ẹtin ne ima mwẹ ọ re ọ sẹ ne irẹn mwẹ.

8Ẹtin ọmwa ne agbọn kẹkan ọ re irẹn mwẹ sokpan, ma mwẹ, ẹtin ọghe Nọyaẹnmwa ne Osanobua mwẹ ne ọ gha gu ima khọn okuọ mwa.” Ẹmwẹ ne ọba iran tae na keghi rhie igiẹdu ne emwa nii.

9Ọ ghi kpee kherhe vbe iyeke ọnii, vbe Senakẹrib kevbe ivbiyokuo ẹre he ye rre Lakis, ọ keghi gie uhunmwu ne a tama e Hẹzekaia kevbe ivbi e Juda ni gu ẹe rre Jerusalẹm wẹẹ,

10“Mẹ ne Senakẹrib ne Ọgbaisi ọghe Asiria wẹẹ, de emwi ne uwa mu ẹtin yan ne uwa na ye gha rre uwu e Jerusalẹm ne a ghae ga nẹ.

11E Hẹzekaia ne ọba uwa tama uwa wẹ e Nọyaẹnmwa ne Osanobua uwa gha miẹn uwa fan vbe obọ ẹtin ima. Sokpan te Hẹzekaia rẹrẹ uwa, te ọ ra ya ohanmwẹ kevbe ovbamẹ gbele uwa a.

12Rẹn ọ re ọ guọghọ ivbi owa kevbe Ogiukpo ọghe Nọyaẹnmwa, ọ na tama ivbi e Juda kevbe Jerusalẹm wẹ ne iran gha ru ugamwẹ kevbe ne iran vbe gha giẹn eturari vbe Ogiukpo ọkpa kẹkan.

13Wa ma he họn emwi ne avbe erha mwẹ odede kevbe imẹ he ye agbọn ẹvbo ọvbehe aro miẹn? A miẹn ẹbọ ẹvbo ọkpa ne ọ he sẹtin miẹn avbe ẹvbo nii fan vbe obọ Ọgbaisi Asiria ra?

14Wa he họn wẹ ẹbọ avbe ẹvbo ni miẹn iran fan vbe obọ mwa ra. Vbe uwa ghi na ro hẹ ighẹ ẹbọ uwa gha miẹn uwa fan?

15Wa ghẹ gie Hẹzekaia rẹrẹ uwa ra ne ọ bibi uwa odẹ vberriọ. Wa ghẹ yae yi. A ma he miẹn ẹbọ ne ọ he sẹtin miẹn ivbi ẹre fan vbe obọ Ọgbaisi Asiria ẹdẹ. Erriọ wa vbe ye, ẹbọ uwa i sẹtin miẹn uwa fan!”

16Avbe irriegie Asiria talọ ẹmwẹ ni bun ni khọrhiọn sẹ ena vbe ekpa e Nọyaẹnmwa Osanobua kevbe Hẹzekaia ne ọguọmwadia e Nọyaẹnmwa.

17Ebe ne ọgbaisi gbẹn wa yagha e Nọyaẹnmwa ne Osanobua Izrẹl, ọ wẹẹ, “Ẹbọ avbe agbọn ẹvbo nekpa ma he sẹtin miẹn emwa iran fan vbe obọ mwẹ a ma wẹ ẹbọ e Hẹzekaia gha vbe sẹtin miẹn emwa rẹn fan vbe obọ mwẹ.”

18Avbe irriegie nii keghi kakabọ gha ya urhu ne ọ la ta ẹmwẹ na vbe Hibru, ne iran miẹn ehe na runran kevbe ne iran vbe ya egbe wọ emwa ni rre Jerusalẹm ni mudia lele uhunmwu ekẹn ne a gbe ga ẹvbo ni, ne ẹvbo ni miẹn ehe na khuẹrhẹ ne iran mu.

19Iran kegha ta ẹmwẹ Osanobua ọghe Jerusalẹm zẹ vbe ne iran ta ẹmwẹ avbe ẹbọ ẹvbo ọvbehe, avbe amazẹ ne emwa ya obọ mannọ.

20Ẹre Hẹzekaia ne ọba kevbe Aizaia ne akhasẹ ne ovbi Amọz na na erhunmwu ghe Osanobua iran na datu tie ẹre ne ọ yi iran obọ.

21E Nọyaẹnmwa keghi gie odibo Osa, ọ na ya gbele avbe ivbiyokuo kevbe avbe ekaokuo ivbiyokuo Asiria. Ẹre ọgbaisi Asiria na rhie ukpọn efa rhuan werriegbe gha rrie Asiria. Ẹdẹ ọkpa, ọ ghi rre aro ẹbọ ẹre, eso vbe uwu avbe ivbi ẹre ni ikpia keghi ya umozo gbe ẹe rua.

22Odẹ vbenian ọ re Nọyaẹnmwa ya miẹn Hẹzekaia kevbe ivbi e Jerusalẹm fan vbe obọ e Senakẹrib ne Ọgbaisi Asiria, kevbe vbe obọ avbe eghian iran ọvbehe. Ọ keghi gie emwa nii gha rrọọ vbe ọfumwegbe deba avbe ẹvbo ni lẹga iran.

23Emwa ni bun kegha rrie Jerusalẹm, iran kegha ya imuohan gie Nọyaẹnmwa, iran na vbe gha zẹ ọhẹ gie Hẹzekaia sẹrriọ we ke ẹghẹ ni kpa, emwa hia keghi wa gha ghe Hẹzekaia gidii.

24Vbe odẹ ẹghẹ na, e Hẹzekaia ne ọba kegha khuọnmwi te ọ ghi te ra wu; ọ keghi na erhunmwu, e Nọyaẹnmwa keghi rhie ama ma rẹn wẹ ọ gha fe.

25Sokpan, e Hẹzekaia keghi hio sẹrriọ wẹ ọ ma sẹtin kpọnmwẹ ye ẹse ne Nọyaẹnmwa ru ne ẹẹn, e Juda kevbe Jerusalẹm keghi rrioya ye emwi na ẹsẹse.

26Sokpan, vbe okiekie, e Hẹzekaia kevbe ivbi e Jerusalẹm keghi mu egberriotọ rhunmwuda ọnii, e Nọyaẹnmwa ma ghi rri emwa ni oya a te do miẹn wẹ Hẹzekaia wu.

27E Hẹzekaia ne ọba keghi do fe ẹsẹse, emwa hia na gha ya ọghọ nẹẹn. Ọ kegha bọlọ aza ne ọ hẹ emwi ẹnrẹn yi; igoru, esiliva, ikpẹrọnmwọ, emwi ni winhin, asa kevbe avbe emwi ighobioye ọvbehe ne ọ mwẹ hia.

28Ye vbe sẹ ọnii, ọ kevbe bọlọ aza ne ọ viọ avbe oka yi, kevbe ayọn kevbe ofigbọn oliv owa ne ọ viọ avbe ẹmila yi, kevbe ehe ne ọ viọ avbe ohuan yi.

29Deba ena hia, Osanobua keghi viọ ẹmila kevbe ohuan ne ẹẹn kevbe avbe ẹfe ọvbehe ni bun sẹrriọ wẹ ọ keghi bu okpẹvbo ni bun ẹsẹse.

30E Hẹzekaia ne ọba ọ re ọ khiọ ehe ne Ẹzẹ Gihọn na lẹ ladian, ọ na dia amẹ ọnrẹn ne ọ lẹ la uroramẹ ya gha ye ihọkpa vbe uwu ehe ne a gbe ekẹn ga vbe Jerusalẹm. Emwi hia ne Hẹzekaia ru keghi gha dinna odẹ.

31Uhin ẹghẹ ne emwa ne a gie ke Babilọn rre na do nọ ọta vbe ekpa ogiemwi eso ne ọ sunu vbe otọe ni, Osanobua keghi gie Hẹzekaia khian vbene ọ khọn rẹn, ne ọ miẹn ehe na ghe vbene uyinmwẹ ọnrẹn ye hẹ.

32Emwi ọvbehe hia fẹẹrẹ ne Hẹzekaia ghi ru kevbe vbene ọ rhie egbe mu e Nọyaẹnmwa hẹ, a gbẹnnẹ ọẹn ye ebe Umian Aizaia Ne Akhasẹ Ne Ovbi Amọz kevbe Ebe Okha Avbe Ọba e Juda kevbe Izrẹl.

33E Hẹzekaia keghi wu, a na re ẹre ye obọ ne ọ ke uwu idin avbe ọba. Ivbi e Juda kevbe ivbi e Jerusalẹm hia keghi ru ne ẹẹn ẹsẹse vbe ọ wu. E Manasẹ ne ovbi ẹre keghi rriọba lele ẹe.

← Chapter 31 Jump to: Chapter 33 →