2 Chronicles 25

Edo ((E Baibol Ẹdo) Version 1996)

← Chapter 24 Jump to: Chapter 26 →

1Ukpo ekesọgban ọ re Amezaia ye vbe ọ rriọba, ọ keghi ya ukpo ọkpairrọvbe ọgban vbe ẹkete vbe Jerusalẹm, Iye ẹe kegha re Jehoadin ne ovbi ẹvbo e Jerusalẹm.

2Ọ ru emwi ne ọ yẹ e Nọyaẹnmwa, sokpan omaro omaro ọ re ọ gbe ya ruẹe.

3Ọwarọkpa vbe owẹ ọre ghi sẹ otọ nẹ, ọ keghi gbele avbe ọkaokuo ni gbe erha ẹe rua.

4Sokpan, ọ ma gbele ivbi iran uan, ọ keghi lele iyi ne Nọyaẹnmwa mu ye uhi e Mosis wẹẹ, “A ghẹ gbe evbibiọmọ ye orukhọ ne ivbi iran ru, a ghẹ vbe gbe emọ ye orukhọ ne evbibiẹ iran ru, orukhọ ne ọmwa tobọ ẹre ru ọkpa ọ re a gha gbe ẹe rua ba.”

5Amezaia ne ọba keghi do ghae ikpia hia ni rre ẹwae Juda kevbe ni rre ẹwae Bẹnjamin ye oka ivbiyokuo zẹ vbe uniẹn ne dọmwadẹ ọghọe ke rre, ọ kevbe viọ ọkaokuo lele oka ne arhin arriaisẹn ye kevbe ne arhin iyisẹn ye, ena kegha re ikpia ni rre ukpo ugie gha rrie odukhunmwu, arriaisẹn, iyisẹn eha (300,000) ọ re ehia gha khin. Iran kegha re emwa ne a hannọ ẹn ni wa mu egbe khẹ okuọ, emwa ne asa kevbe asoro ne a lo gua ẹre obọ ro ẹsẹse.

6Ye vbe deba ena, ọ na ya vbu ivbiyokuo arriaisẹn arriaisẹn (100,000) viọ ke Izrẹl rre vbene igho ne ọ hae yọ na gha re omwa etọni esiliva enẹ.

7Sokpan akhasẹ keghi bu ọba gha khian, ọ tama rẹn wẹẹ, “Ghẹ viọ ivbiyokuo ivbi Izrẹl na ba egbe gha khian, e Nọyaẹnmwa i ho ẹmwẹ iran ni ke Arriọba Okuo rre na.

8U sẹtin gha ro nian wẹ iran ya ivbiyokuo ruẹ khian ne ọ wegbe sẹ ayọ, sokpan, e Nọyaẹnmwa ọ re ọ ru ẹe ne obọ ọmwa ke ukhunmwu ne emwa ọvbehe ra ne ọghe ọvbehe ke ukhunmwu, te ọ gie obọ eghian ruẹn ke ukhunmwu ne uẹn.”

9Amezaia keghi nọ akhasẹ ni wẹẹ, “Sokpan, esiliva ọrhẹnrhẹn ne I ya ha osa ne iran ghi vbọ?” Akhasẹ ni keghi wanniẹn wẹẹ, “E Nọyaẹnmwa gha sẹtin viọ ni bun sẹ ọnii ne uẹn.”

10Ẹre Amezaia ghi na wẹ ne ivbiyokuo ne ọ te vbu hẹ mwẹ gha rrie, ọ na viọ iran kpao. Iran keghi gele rhunmwuda ọnii gha rrie, vbene ohu e Juda na kakabọ gha mu iran ẹsẹse.

11Amezaia keghi ya ibaro okpia ye udinmwẹ viọ ivbiyokuo gha rrie Iya Umwẹ. Iran keghi khọn okuọ vbe evba,

12iran gbele ivbiyokuo Idọm arriaisẹn igbe (10,000). Iran keghi viọ iran ne obọ iran vba ya munọ ẹre ọviẹn vbọ gha rrie uhunmwu oke ne ọ zẹ ukpẹ fioro, ne ọ rre Sẹla, iran keghi ke odọ sua iran fua, iran na do dele wu ye okuta ni rre ototọ.

13Vbe uwu ẹghẹ na, avbe ivbiyokuo ivbi Izrẹl, ne Amezaia ma gie ẹe lele irẹn gha rrie okuọ keghi de yan avbe ẹvbo e Juda ni rre ẹkpo e Sameria kevbe Bẹt Horọn, iran keghi gbele ikpia arriaisẹn eha (3,000) iran na fu emwi ọrhẹnrhẹn viọ gha rrie.

14Ugbẹn vbe Amezaia ghi khọn ivbi Idọm muotọ nẹ ọ keghi viọ ẹbọ iran gha die owa, ọ keghi kọ iran, ọ na gha gho iran, ọ na gha giẹn eturari ne iran.

15Emwi na keghi ya ohu mu e Nọyaẹnmwa, ọ na gie akhasẹ ọkpa bu Amezaia gha khian. Akhasẹ nii keghi nọ wẹẹ, “Vbọzẹ yi ne u na gha gho ẹbọ ẹrrẹe ne ọ ma kue sẹtin miẹn emwa rẹn fan vbe obọ ruẹ?”

16Amezaia keghi gbe eta ye ọre unu wẹẹ, “De ẹdẹ ne ima ghi vbe zẹ uwẹ iguọbaziro yi? Gue unu uẹn vba ne u ghẹ ya ye uhunmwu tae.” Vbe akhasẹ ni ghi te gue unu ẹnrẹn, ọ tama rẹn wẹẹ, “I rẹnrẹn wẹ Osanobua tae nẹ ne irẹn fuẹn ruẹn uan, rhunmwuda ne u na ru avbe emwi na hia kevbe ne u ma na rhie ude ne I bu ruẹ re.”

17Amezaia ne ọba e Juda, kevbe iran ni gu ẹe zẹ iro keghi khuan khẹ Izrẹl. Ọ keghi rhunmwuda ọnii gie uhunmwu ne a khama e Jehoas ne Ọba Izrẹl ne ọ re ovbi Jehoahaz kevbe eyẹ Jehu wẹ ne ọ gie iran danmwẹ egbe ghe.

18E Jehoas keghi rhie ewanniẹn gie ẹe wẹẹ, “Ọ ghi do sẹ ẹghẹ ọkpa, ẹrrierrie ne Oke Lebanọn keghi gie ne a khama sida ọkpa wẹẹ, ‘Rhie ovbuẹ ne okhuo ne ovbi mwẹ rhie rọnmwẹ.’ Aranmwẹ oha ghi la evba gberra, ọ na ya owẹ rri ẹrrierrie ni ginna otọ.

19Banbanna nian Amezaia, ugha ya ẹe rhuọ wẹ u khọn ivbi Idọm muotọ, sokpan, ude ne imẹ gha bu ruẹ re ọre ne u do dia vbe owa ruẹ. Vbu a ghi ra gu ya obọ si ẹti ne ọ gha gba uwẹ vbe emwa ruẹn egbe hẹ yi?”

20Sokpan, Amezaia, ma zẹyọ. Iho ọghe Osanobua nọ wẹ ne a khọn Amezaia muotọ, rhunmwuda ne ọ na gha gho avbe ẹbọ Idọm.

21rhunmwuda ọnii, e Jehoas ne ọba Izrẹl keghi mu okuọ gie Amezaia ne ọba e Juda, iran keghi do vba egbe vbe Bẹt Siemẹs ne ọ rre Juda.

22Obọ keghi ke ukhunmwu ne iyokuo e Juda, ivbiyokuo iran keghi lẹkua gha rrie owa.

23Obọ e Jehoas keghi vba Amezaia, ọ na mu ẹẹn gha rrie Jerusalẹm. Ọ na dunmwu ekẹn ne a gbe ga ẹvbo nii sẹ otọ ke Onurho Ifreim ya sẹ Onurho Igọgọ, ọ kegha re ọmwa ibata uri eha.

24Ọ keghi fu igoru kevbe esiliva ni rre Ọgua Osa hẹ gha rrie Sameria, deba emwi ne a lo vbe uwu Ọgua Osa ne ivbi uniẹn Obẹd Idọm te gbe aro ghe, kevbe emwi ẹfe ni rre ẹguae, ọ keghi vbe viọ oghunmwu eso gha rrie.

25Ukpo ekesugie ọre Amezaia ne Ọba e Juda ya tọ sẹ Jehoas ne ọba Izrẹl.

26Avbe emwi ọvbehe hia ne Amezaia ru ke omuhẹn ya sẹ ufomwẹ ẹghẹ ne ọ ya ẹe vbe ẹkete, a gbẹnnẹ ọẹn ye Ebe Okha Avbe Ọba e Juda kevbe Izrẹl.

27Ke ẹghẹ ne ọ ya fidọn ghe e Nọyaẹnmwa kpao, ọre emwa kegha khuan khẹ ọre vbe Jerusalẹm. Vbe okiekie ọ keghi lẹ gha rrie Lakis, sokpan, avbe eghian keghi lele ẹe se evba iran na gbe ẹe rua.

28Iran keghi ye ẹsin mu ikun ẹnrẹn gha rrie Jerusalẹm, a na re ẹre ye idin avbe ọba vbe Ẹvbo e Devid.

← Chapter 24 Jump to: Chapter 26 →