2 Chronicles 36

Edo ((E Baibol Ẹdo) Version 1996)

← Chapter 35 Jump to:

1Ivbi e Juda keghi zẹ Joahaz ne ovbi e Josaia, iran na ma ẹre ọba vbe Jerusalẹm.

2Ukpo ehayan ugie ọ re Joahaz gha ye vbe ọ rriọba e Juda, ọ keghi ya uki eha vbe ẹkete vbe Jerusalẹm.

3E Nẹko ne Ọba Igipt keghi mu ẹre oghunmwu, ọ na miẹn e Juda uwan esiliva iyisẹn isẹn yan arriaisẹn ihinrọn (7,500) kevbe uwan igoru isẹn irrọvbe iyenẹ (75) zẹ vbe emwi imuohan.

4E Nẹko keghi ma Eliaikim ne ọtẹn Joahaz ne okpia ọba e Juda. Ọ na fi ẹre eni werriẹ gha tie ẹre Jehoiakim. E Nẹko keghi mu e Joahaz gha rrie Igipt.

5Ukpo isẹn yan ugie ọre Jehoiakim gha ye vbe ọ rriọba vbe Juda ọ keghi ya ukpo owọrọ vbe ẹkete vbe Jerusalẹm. Ọ keghi sẹmwẹ e Nọyaẹnmwa ne Osanobua ẹre.

6E Nebukiadneza ne ọba e Babilọn keghi mu okuọ gha die Juda, ọ na khọn mu e Jehoiakim, ọ keghi ye ọgiọrọ rrọ ẹre, ọ na mu ẹẹn gha rrie Babilọn.

7E Nebukiadneza keghi vbe viọ eso vbe uwu emwi ẹwe ni rre Ọgua Osa, ọ na ya viọ ẹre ye ẹguae ẹre vbe Babilọn.

8Emwi ne Jehoiakim ru hia, ya sẹ egbe uyinmwẹ ẹwobi, kevbe avbe emwi dan hia ne ọ ru, a gbẹnnẹ ọẹn ye Ebe Okha avbe Ọba ọghe Izrẹl kevbe Juda. E Jehoiakin ne ovbi ẹre keghi rriọba lele ẹe.

9Ukpo evairrọvbugie ọ re Jehoiakin gha ye vbe ọ rriọba e Juda, ọ keghi ya uki eha vbe ikpẹdẹ igbe vbe ẹkete vbe Jerusalẹm. Rẹn keghi vbe sẹmwẹ e Nọyaẹnmwa.

10Ọ ghi sẹ omuhẹn orhọ, e Nebukiadneza ne ọba keghi mu e Jehoiakin oghunmwu gha rrie Babilọn, ọ na vbe viọ emwi ẹwe ni rre Ọgua Osa gha rrie. Ẹre Nebukiadneza na ya ovbi erha e Jehoiakin ighẹ Zedekaia ma ọba e Juda kevbe Jerusalẹm.

11Ukpo ọkpa yan ugie ọre Zedekaia gha ye vbe ọ rriọba e Juda. Ọ keghi ya ukpo owọrọ vbe ẹkete vbe Jerusalẹm.

12Ọ keghi sẹmwẹ e Nọyaẹnmwa ọ ma ya amuegberriotọ danmwehọ e Jerimaia ne Akhasẹ ne ọ gha ta ẹmwẹ e Nọyaẹnmwa ma rẹn.

13E Zedekaia keghi sọtẹ e Nebukiadneza ne ọba ne ọ ka ya ẹe vẹn Osanobua nẹ wẹ rẹn gha ya ẹkoata gha ga ẹe. Ọ keghi wa ya izevbudu he ne ọ roiro fi ekhọe werriẹ, ne ọ bu e Nọyaẹnmwa ne Osanobua Izrẹl gha dee.

14Deba ena hia avbe ọkaolotu e Juda avbe ohẹn kevbe avbe emwa nii, keghi wa gha yin zẹ vbe emwa ni rre ẹvbo ni lẹga iran, iran na gha gho ẹbọ, iran keghi la ekpa ọnii mu awua ye Ọgua Osa ne Nọyaẹnmwa tobọ ẹre ya khian ne ọ huanrẹn nẹ.

15E Nọyaẹnmwa ne Osanobua avbe erha iran odede kegha gie avbe akhasẹ rre ne ọ do gha bu iran ude, rhunmwuda, rẹn te gha ho ne ọ sẹ iran kevbe Ọgua Osa rae.

16Sokpan, iran kegha ya emwa ne Osanobua gie ẹre uhunmwu gbogiẹ, iran ma zẹ ye ẹmwẹ ne iran ta, iran na vbe gha giẹ avbe akhasẹ ọre, rhinrin a ke do miẹn wẹ ohu Osanobua ghe emwa rẹn kpọlọ sẹrriọ wẹ, emwi ne a gha ya rhanmwẹ ọẹn re, ẹ i ghi rrọ.

17Rhunmwuda ọnii, e Nọyaẹnmwa keghi gie ọba e Babilọn ne ọ mu okuọ gie iran. Ọba nii keghi gbele avbe igbama ni rre Juda, uhin ighẹ te ọ gbele iran vbe uwu Ọgua Osa, ọ ma vbe tohan ọmwa rhọkpa, ibiẹka kevbe ni khian ọmaẹn, ikpia kevbe ikhuo iran ne egbe rranrẹn kevbe iran nikhuọnmwi, Osanobua keghi wa filo iran hia ku ẹre obọ.

18Ọba e Babilọn keghi fu emwi ni rre Ọgua Osa viọ, ke asa Ọgua Osa kevbe ẹfe ne ọba mwẹ kevbe ne avbe irriegie ẹre vbe mwẹ, ọ na viọ ehia gha rrie Babilọn.

19Ọ keghi giẹn Ọgua Osa kevbe ẹvbo ni sẹ otọ.

20Ọ keghi viọ iran ni miẹn uhunmwu vbọ hia gha rrie Babilọn, iran na ya gha ga ẹe kevbe uniẹn ivbi ẹre zẹ vbe eviẹn ọ te do sẹ ẹghẹ ne Arriọba e Pẹsia na la ukpo.

21Erriọ ọre a na miẹn wẹ ẹmwẹ ne Nọyaẹnmwa la unu e Jerimaia ne akhasẹ ta ye otọ do sunu wẹẹ, “Otọe ni gha dihoi rua la ukpo ekigbesiyenẹ ne ọ gha rre ihẹ uhẹwẹmwẹ Ẹdẹ Ikẹtin ne iran ma ghi zẹ yi.”

22Vbe ukpo ne okaro ne Sairọs khian ọgbaisi e Pẹsia, e Nọyaẹnmwa keghi ruẹe ne ẹmwẹ ne ọ la unu e Jerimaia ne akhasẹ ta, do sẹ. Ọ keghi rhie ye Sairọs ekhọe ne ọ ta ẹmwẹ na ladian, ne ọ gbẹnnẹ ọẹn ye ebe ne a vbe tie ẹre ladian vbe ehe ne otọ arriọba ẹre sẹe ehe ne ọ rhanmwẹ wẹẹ:

23“Vbenian ọre Sairọs ne Nọgbaisi e Pẹsia khare. E Nọyaẹnmwa ne Osanobua ọghe Ẹrinmwi, ọ re ọ ya mwẹ ma ọba yan otọe agbọn hia, ọ na vbe ya ẹe fian okhuo mẹ wẹ ne I bọ Ọgua Osa ne irẹn vbe Jerusalẹm vbe otọe e Juda. Rhunmwuda ọnii nian, wa hia ni re emwa Osanobua, wa gha rrie odọ nii, te Nọyaẹnmwa ne Osanobua uwa gha deba uwa.”

← Chapter 35 Jump to: