2 Samuel 21

Edo ((E Baibol Ẹdo) Version 1996)

← Chapter 20 Jump to: Chapter 22 →

1Ukhunmwu nọkhua ọkpa keghi do fi vbe ẹghẹ ne Devid na gha rre ẹkete, ikpiia gbalaka ọ re ọ wa ya vbe otọ. Ẹre Devid na nọ otọ ẹre vbe obọ e Nọyaẹnmwa, e Nọyaẹnmwa keghi kha wẹẹ, “E Sọl kevbe ẹgbẹe ọre diyi izigha, ọ gbele ivbi e Gibiọn rua.”

2(Ivbi e Gibiọn i re ivbi Izrẹl, ibozẹghẹ vbe ivbi Izrẹl yan ma iran ighẹ iran gha tan ifuẹn ga iran, sokpan, e Sọl keghi te gha hia ne ọ wa fuẹn iran a rhunmwuda orhikhan kevbe ohawa ne ọ ye ba ẹmwẹ ivbi Izrẹl kevbe Juda.)

3Ẹre Devid ghi na tie ivbi e Gibiọn, ọ keghi tama iran wẹẹ, “De emwi ne I gha ru ne uwa yi? I ho ne i kpe uwa oya vbe emwi ne a ru uwa re, ne uwa miẹn ehe na na erhunmwu ne emwa Osanobua.”

4Iran keghi wanniẹn wẹẹ, “A i sẹtin ya esiliva ra igoru dọlọ ẹzọ ima kevbe ẹgbẹe Sọl, erriọ vbe nọ, ma i vbe ho ne a gbe ivbi Izrẹl rhọkpa.” E Devid keghi nọ iran wẹẹ, “De emwi ne uwa ghi ro nian ighẹ I gha sẹtin ru ne uwa khekherriọ?”

5Iran keghi wanniẹn wẹẹ, “Te Sọl te gha ho ne ọ wa fuẹn ima an fẹẹrẹ, vbe ne ẹ i na vbe sẹ ọkpa rae ye agbọn vbe ehe rhọkpa vbe otọ Izrẹl.

6Rhunmwuda ọnii, viọ ihinrọn ne ima vbe uwu avbe ivbi ẹre ni ikpia, ma ghi silo iran rrọ vbe odaro e Nọyaẹnmwa vbe Gibia ne ẹvbo e Sọl ne ọba ne Nọyaẹnmwa hannọ zẹ.” Ọba keghi wanniẹn wẹẹ, “I gha viọ iran ne uwa.”

7Sokpan, rhunmwuda ihẹn ne irẹn vbe Jonatan vẹn ne egbe, e Devid keghi sẹ Mẹfibosiẹt ne eyẹ e Sọl rae.

8Sokpan, ọ na rhie Amọn kevbe Mẹfibosiẹt, emọ ikpia eva ne Rizpa ne ovbi Aia ne okhuo biẹlẹ ne Sọl, ọ kevbe viọ emọ ikpia isẹn ne Mẹrab ne ovbi e Sọl ne okhuo biẹlẹe ne Adriẹl ne ovbi Bazilai ne ovbi ẹvbo ne a tie ẹre Mehola ne iran.

9E Devid keghi viọ iran ne ivbi e Gibiọn, iran na silo iran rrọ vbe uhunmwu oke ne ọ rre odaro e Nọyaẹnmwa. Iran ihinrọn nii keghi wulo kugbe. Ẹghẹ ahọ uyunmwu ọ re a na gbele iran an vbe ẹghẹ ne a ya suẹn ọka irhuarhua ne a fian.

10Ẹre Rizpa ne egbakhian e Sọl ne ọ vbe re ovbi Aia, na mu ẹkpo ivin, ọ na ya bọ okhogbo ne egbe ẹre vbe uhunmwu okuta ehe ne avbe ikun orinmwi nii ye, ọ na wa gha rre evba ke ẹghẹ ne a ya suẹn gha rhọ emwiorhọ kpao ya sẹ ẹghẹ ne amẹ ukpo ya rhọ. Ọ ma gie ahianmwẹ tin sẹ evba vbe avan, ra aranmwẹ akọn vbe asọn.

11Ugbẹn vbe Devid ghi họn emwi ne Rizpa ru, ọ kegha rrie Jabẹs ne Giliad,

12ọ na ya miẹn iran ugboloko e Sọl kevbe Jonatan ne ovbi ẹre. (Adesẹ ughe ọghe Bẹt-Sian ọ re iran na ya viọ ikun iran, vbe ehe ne emwa e Filistin silo iran rrọ yi vbe ẹdẹ ne iran gbe Sọl vbe uhunmwu oke Giboa.)

13E Devid keghi koko ugboloko e Sọl kevbe Jonatan, ọ kevbe koko ugboloko ọghe ikpia ihinrọn ne a silo rrọọ.

14Ẹre iran na viọ ugboloko e Sọl kevbe Jonatan ya re ẹre ye idin e Kis ne erha e Sọl vbe Zẹla vbe otọ emwa e Bẹnjamin, a keghi wa ru avbe emwi hia ne ọba rhirhi wẹ ne a ru vbe iyeke ọnii, Osanobua keghi họn erhunmwu ne ẹvbo nii na ghe ẹre.

15Okuo ọvbehe keghi vbe sa ne avbe Filistin kevbe ivbi Izrẹl. E Devid kevbe emwa rẹn keghi ladian, iran na ya gu avbe Filistin khọn. Egbe keghi wọ e Devid vbe ẹghẹ okuo na.

16Arhuanran ọkpa ne a tie ẹre Isbibenob, ne asoro ẹre si omwa uwan igbe, ne ọ vbe gha mwẹ umozo ọgbọn keghi te gha ro ighẹ rẹn gha sẹtin gbe Devid.

17Sokpan, Abisiai ne ovbi e Zeruaia keghi rhie iyobọ ne Devid, ọ keghi dekun arhuanran na, ọ na gbe ẹe rua. Emwa e Devid keghi wẹ ne ọ do yan ighẹ rẹn i ghi dọlegbe lele iran yo okuo ẹdẹ. Iran tama rẹn wẹẹ, “Wẹ ọrọre idaehọ ne Izrẹl mwẹ, ma i ho ne u wi mwa.”

18Vbe iyeke ọna, okuo e Filistin keghi vbe sa vbe Gob. E Sibekai ne ọ ke Husia rre, keghi gbe arhuanran ọkpa ne a tie ẹre Saf.

19Okuo e Filistin ọvbehe keghi vbe sa vbe Gob, ẹre Elhana ne ovbi e Jaẹl nọ ke Bẹtlẹhẹm rre na gbe e Golaiat ne ọ ke Gat rre, uze asoro ẹre keghi yevbe erhan ne a rro ido ọdukpọn yi.

20Okuo ọvbehe keghi vbe gha rre Gat, arhuanran ne igbinna wa yẹ keghi rre evba. Ọ kegha mwẹ ikpinhianbọ ehe-han vbe obọ ọkpọkpa, kevbe ikpinhia-nwẹ ehan vbe owẹ ọkpọkpa.

21Ọ keghi fa ivbi Izrẹl rua, ẹre Jonatan ne ovbi e Siama ne ọtiẹn Devid na gbe ẹe rua.

22Iran enenẹ na kegha re ivbi uniẹn avbe arhuanran ni rre Gat, e Devid kevbe emwa rẹn keghi gbele iran an.

← Chapter 20 Jump to: Chapter 22 →