2 Samuel 6

Edo ((E Baibol Ẹdo) Version 1996)

← Chapter 5 Jump to: Chapter 7 →

1E Devid keghi vbe dọlegbe si ivbiyokuo ni ghi maa sẹẹ vbe Izrẹl koko, ehia keghi do gha re arriaisẹn ọgban (30,000).

2Ọ keghi viọ iran gha rrie Baala vbe Juda, ne ọ ya mu ẹẹn rre ighẹ Ẹkpẹti Ile Osanobua ne a he ẹre eni Nọyaẹnmwa ne Oghodua, ne ọ tota ye Ẹkpẹti ẹnrẹn vbe adesẹneva emwi ne a yi ni mwẹ ifuẹn nii.

3Iran keghi mu ẹẹn yan okotọ ọgbọn, iran keghi ya mu ẹẹn ke owa Abinadab ne ọ rre uhunmwu oke gha dee. Uzza kevbe Ahio ne ivbi Abinadab ọ re ọ dia nene okotọ.

4Ne ọ mu Ẹkpẹti Ile dee, Ahio kegha rre odaro.

5E Devid kevbe ivbi Izrẹl hia keghi wa gha ya ẹtin iran hia ku iran na gha so ihuan ne iran ya rho e Nọyaẹnmwa. Iran kegha kpe akpata, ẹgiọn, e ma, ẹgogo kevbe ukusẹ.

6Iran ghi sẹ otọe ne Nakọn na khuọn ọka, ẹmila keghi rrua owẹ, ẹre Uzza na niẹn obọ ya da Ẹkpẹti Ile nii yi.

7Vbe ọwarọkpa nii, ohu Uzza keghi mu e Nọyaẹnmwa, Ọ keghi gbe ẹe rua rhunmwuda, udinmwẹ amiọmwafo ọghe ọe, ẹre Uzza na wu ye evba, vbe ọkpẹn Ẹkpẹti Ile nii.

8Ọnii ọzẹe ne a na tie evba nii Pẹrẹs Uzza do sẹ ẹdẹnẹrẹ na. Ohu keghi kakabọ mu e Devid ye ne Nọyaẹnmwa na ya ohu rri Uzza oya vberriọ.

9Ohan e Nọyaẹnmwa kegha mu e Devid, ọ keghi kha wẹẹ, “Ohan gha ye gun mwẹ mu Ẹkpẹti Ile gha khian nian?”

10Rhunmwuda ọnii, ọ na wẹ rẹn ighi mu rri e Jerusalẹm ne ẹvbo ẹre, ọ na ghi fi egbe werriẹ, ọ na mu ẹẹn gha rrie owa Obẹd Idọm ne ọ ke ẹvbo Gat rre.

11Ọ keghi gbe uki eha vbe evba, e Nọyaẹnmwa keghi fiangbe Obẹd Idọm ke ẹe kevbe ẹgbẹe ọre.

12E Devid ne ọba keghi do họn wẹẹ, e Nọyaẹnmwa wa fiangbe ẹgbẹe Obẹd Idọm kevbe emwi ne ọ mwẹ hia, rhunmwuda Ẹkpẹti Ile ọ keghi rhunmwuda ọnii ya mu ẹẹn vbe owa Obẹd rre ne ọ do kpee mu ẹẹn gha rrie Jerusalẹm.

13Iran ni mu Ẹkpẹti Ile nii ghẹ ghi vbe zẹ owẹ ehan, e Devid ghi ya ẹkhuia ẹmila kevbe ohuan ne ọ tii zọ ese ghe Nọyaẹnmwa.

14Ukpọn eto ovbiohuẹ ọkpa ọ re Devid rra mu ẹkun, ọ kegha ya ẹtin ẹnrẹn hia kuu ne ọ ya ya ọghọ ne Nọyaẹnmwa.

15Rẹn kevbe ivbi Izrẹl hia keghi gba mu Ẹkpẹti Ile nii gha die Jerusalẹm kevbe uwemwẹ oghọghọ kevbe urhu okpe.

16A ghi wa mu Ẹkpẹti ni sẹ ore ẹvbo, e Mikal ne ovbi e Sọl ne okhuo keghi yọn urhu la ewindo ladian, ọ keghi ya bẹghe Devid ne ọba vbe ọ kuu, ọ gha fi obodo, ọ keghi wa sọnnọ ẹẹn ruan vbe aro.

17Iran keghi mu Ẹkpẹti ni rre, iran keghi mu ẹẹn ye ihe ẹre vbe ehe ne Devid mwamwa khẹ ọre. Ọ keghi zẹ ese, ọ na si isara ghe Nọyaẹnmwa.

18Ọ ghi zọ ese fo nẹ ọ keghi ya eni e Nọyaẹnmwa ne Oghodua fiangbe emwa nii.

19Ọ keghi mu ebrẹd ọkpọkpa ne dọmwadẹ ikpia kevbe ikhuo ni rre Izrẹl kevbe emiowo ne aranmwẹn deba ọmọ erhan eso ne a re. Ẹre dọmwadẹ ọghọe na gha rrie owa.

20E Devid keghi dọlegbe gha rrie owa ya tuẹ emwa rẹn. E Mikal ne ovbi e Sọl nokhuo keghi ya khian vba ẹre, ọ tama rẹn wẹẹ, “Ọba Izrẹl wa vbe mu eni ne ọ hin usi ne egbe ẹre ẹrẹna. Ọ na wa bannọ egbe ua ye otọ zẹ vbe ọzuọ vbe odaro eguọmwadia ni ikhuo ọghe avbe emwa ni rre asẹ vbe ototọ ẹre.”

21E Devid keghi wanniẹn wẹẹ, “Te I gha kuu ne I ya ya ọghọ ne Nọyaẹnmwa ne ọ rhie obọ gberra erhaa kevbe ẹgbẹe ruẹ ọ na do zẹ mwẹ ne ọ ya mwẹ ru ọkaolotu ivbi Izrẹl ne emwa rẹn. Ẹn ẹn te I khian ye gha ku khian, ne I ya ya ọghọ ne Nọyaẹnmwa.

22Ne I ya dọlegbe fa egbe mwẹ uan sẹẹ ayọ. Wẹ sẹtin gha ro wẹ mẹ i re ọmwa, sokpan te avbe emọ ikhuo ni khian gha ghe mwẹ gẹdẹgbẹẹ.”

23E Mikal ne ovbi e Sọl ne okhuo ma miẹn ọmọ biẹ.

← Chapter 5 Jump to: Chapter 7 →