2 Samuel 5

Edo ((E Baibol Ẹdo) Version 1996)

← Chapter 4 Jump to: Chapter 6 →

1Ewae ni rre Izrẹl hia keghi bu e Devid gha die Hibrọn, iran tama rẹn wẹẹ, “Esagiẹn ọkpa ma khin.

2Ẹghẹ ne ọ gberra, vbe Sọl he re ọba ima, wẹ ọ re ọ gha viọ ivbi Izrẹl yo okuo, e Nọyaẹnmwa keghi vbe tama ruẹn wẹẹ, ‘U gha su emwa mwẹ, u ghi vbe gha re ne ọ khaemwisẹ yan iran.’ ”

3Rhunmwuda ọnii, avbe ọkaolotu ivbi Izrẹl hia keghi hu e Devid ne ọba gha die Hibrọn. Ọ keghi ye egbe ye ulamwẹ ba iran, iran keghi ma ẹre ọba ọghe Izrẹl.

4Ọmọ ukpo ọgban ọre Devid gha khin vbe a ma ẹre ọba Izrẹl, ọ keghi ya ukpo iyeva vbe ẹkete.

5Ọ keghi ya ukpo ihinrọn vbe ukhiọnmwẹ rriọba yan Juda vbe Hibrọn, ọ keghi vbe ya ukpo eha-yan ọgban rriọba yan ivbi Izrẹl vbe Jerusalẹm.

6E Devid ne Ọba ke ẹe kevbe emwa rẹn keghi mu okuo gha rrie Jerusalẹm. Emwa ne a tie ẹre ivbi e Jebus ni yin ẹvbo na, keghi te gha ro ighẹ e Devid i ra sẹtin khọn ẹvbo nii, iran keghi rhunmwuda ọnii tama rẹn wẹẹ, “U i sẹtin sẹ emwa na ẹdẹ, avbe arhuaro kevbe avbe uke gha sẹtin khu uẹ ladian degbe ruẹ odẹ.”

7(Sokpan e Devid keghi ye khọn odin ọghe Zaiọn, ọna do khian “Ẹvbo e Devid.”)

8Ẹdẹ ne ẹdẹrriọ, e Devid keghi tama iran wẹẹ, “De ọmwa ne ohu emwa Jebus vbe mu vbene ọ mu mwẹ vbe uwu uwa yi? Ne ohu mu sẹrriọ ne ọ gha na gbele iran an? We ne ọ lele uroramẹ gha khian ne ọ ya kinmwi avbe uke kevbe arhuaro ne emwa oya.” (Ọna ọ si ẹe ne a na ta ẹe wẹẹ, “Avbe arhuaro kevbe avbe uke i sẹtin la owa e Nọyaẹnmwa.”)

9E Devid keghi di odin ẹvbo nii ya, ọ kegha tie ẹre “Ẹvbo e Devid” Ọ keghi gba ogba ikhẹ igbinna lẹga ẹre ke Iya ne a tie ẹre Mila yasẹ ẹguae.

10Ọ kegha dọlegbe wegbe yọ khian ẹghẹ hia rhunmwuda e Nọyaẹnmwa Osanobua ne Oghodua keghi yaba ẹre.

11E Hiram ne Ọba e Taia keghi gie avbe ukọ ẹvbo mu ẹki bu e Devid, ọ na viọ erhan igẹdu gie ẹe, kevbe avbe owinna, kevbe igbokuta, ne iran ya bọ ẹguae ẹre ne ẹẹn.

12Ẹre e Devid na do rẹn wẹ te Nọyaẹnmwa gele ka irẹn uhe ye ukpo zẹ vbe ọba Izrẹl, ọ kevbe gie arriọba irẹn gha ma rhunmwuda emwa rẹn.

13Ọ ghi si kpao vbe Hibrọn rre nẹ, e Devid keghi ye vbe zẹ egbakhian ni bun, ọ kevbe viọ ikhuo ni bun vbe Jerusalẹm, ọ na ye vbe biẹlẹ emọ ikpia kevbe emọ ikhuo ni bun.

14Emọ ne ọ biẹlẹe vbe Jerusalẹm kegha re Siamua, Siobab, Natan, e Solomọn,

15Ibha, Elisiua, Nẹfẹg, Jafia,

16Ẹlisiama, Eliada kevbe Ẹlifẹlẹt.

17Ivbi e Filistin keghi họn ighẹ a ma e Devid ọba Izrẹl, iran hia keghi ladian ne iran ya mu ẹre oghunmwu. E Devid ghi họn, ọ na gha rrie odin ẹvbo.

18Avbe Filistin kegha die Iya Refeim, iran na mu evba mwẹ.

19E Devid keghi nọ e Nọyaẹnmwa wẹẹ, “Ne I ya gu ivbi e Filistin gbinna ra? U gha rhie akhọnmiotọ mẹ ra?” E Nọyaẹnmwa keghi tama rẹn wẹẹ, “Gha khian, I gha rhie akhọnmiotọ nuẹn.”

20Ẹre Devid na gha rrie Baal Pẹrazim, ọ na khọn ivbi e Filistin muotọ vbe evba. Rẹn keghi kha wẹẹ, “E Nọyaẹnmwa lẹ avbe eghian mwẹ gha rrie zẹ vbe orogho.” Ọnii ọ zẹe ne a na tie eni evba nii e Baal Pẹrazim.

21Ivbi e Filistia keghi lẹ sẹ avbe ẹbọ iran rae ye evba, e Devid kevbe emwa rẹn keghi viọ gha rrie.

22Avbe ivbi e Filistin keghi werriegbe gha rrie Iya Refeim, iran na vbe ya dọlegbe mu ẹẹn mwẹ.

23E Devid keghi vbe dọlegbe nọ e Nọyaẹnmwa, ọ keghi tama rẹn wẹẹ, “Ghẹ ue ke emwa mu igbinna bu iran, sokpan, khian lẹga iran, ne u ya ke odẹ iyeke iran suẹn gu iran gha gbinna: vbe ọkpẹn erhan balsam.

24Ugha họn igiawẹ vbe uhunmwu avbe erhan nii, u ghi mu egbe ne u ya suẹn igbinna rhunmwuda, ọnii rhie maa wẹ, mẹ ke odaro ne uẹn nẹ, I ya khọn ivbiyokuo e Filistin hia.”

25E Devid keghi ru zẹ vbene Nọyaẹnmwa tama rẹn. O keghi sẹtin khulo ivbi e Filistia werriegbe ke Geba kpao rhinrin yasẹ Gẹza.

← Chapter 4 Jump to: Chapter 6 →