bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Bodo
/
Bodo BDVNT (ବ୍ଡ଼୍ ହ୍ର୍ଜା ବାଇବଲ)
/
John 6
John 6
Bodo BDVNT (ବ୍ଡ଼୍ ହ୍ର୍ଜା ବାଇବଲ)
← Chapter 5
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 7 →
1
ତାର୍ ହ୍ଚେ ଯୀଶୁ ଗାଲିଲୀ ଜିଲା ସ୍ମ୍ଦୁର୍ ବ୍ଲେକ୍ ତିବିରୀଆ ସ୍ମ୍ଦୁର୍ କ୍ଣ୍ତି ସେହାଟିକେ ଗ୍ଲା।
2
ଆର୍ ସ୍ବୁ ଲକ୍ମ୍ନ୍ ତାର୍ ହ୍ଚେ ହ୍ଚେ ଜାତିରିଲାଇ, କାଇତାକ୍ ଯୀଶୁ ତାର୍ ଶ୍କ୍ତି ସ୍ଙ୍ଗ୍ ଜୁଇସ୍ବୁ ଚ୍ମ୍ତ୍କାର୍ କାମ୍ କ୍ରିରିଲା, ସେସ୍ବୁ ସେମ୍ନ୍ ଦ୍କି ରିଲାଇ।
3
ସେତାକ୍ ଯୀଶୁ ଗଟେକ୍ ଡଙ୍ଗ୍ରେ ଜାଇକ୍ରି ତାର୍ ଚେଲାମ୍ନ୍କାର୍ ସ୍ଙ୍ଗ୍ ସେତି ବ୍ସ୍ଲା।
4
ସେଡେବ୍ଳ୍ ଯିହୁଦିମ୍ନ୍କାର୍ ନିସ୍ତାର୍ ହ୍ର୍ବ୍ ଲ୍ଗେ ଅଇ ଆସିରିଲି।
5
ଆରେକ୍ ଯୀଶୁର୍ ଲ୍ଗେ ବେସିଲକ୍ ଆସ୍ତାର୍ ଦ୍କ୍ଲା, ଆର୍ ଫିଲିପ୍ପକେ ପରିକ୍ୟା କ୍ରୁକେ ହ୍ଚାର୍ଲା, “ଅତେକ୍ ଲକ୍ କାତାର୍ ଗିନେ ଅମିମ୍ନ୍ କୁଇତିହ୍ଣି ରୁଟି ଗେନି ଆଣୁମା?”
6
ଫିଲିପ୍ ଉତର୍ଦିଲା, “ସ୍ବୁ ଲକ୍ମ୍ନ୍କେ ଅଳ୍କ୍ ଅଳ୍କ୍ ରୁଟି ଦୁଇ ଶହ୍ ରୁହାଟ୍କା ତ୍ଇହ୍ଣି ଅଦିକ୍ ଟ୍କାର୍ ରୁଟି ଗେନୁକେ ଲଡା।”
7
ଫିଲିପ୍ପ ଯୀଶୁକେ କଇଲା, “ସ୍ବୁ ଲକ୍ମ୍ନ୍କେ ଅଳ୍କ୍ ଅଳ୍କ୍ ରୁଟି ଦେମ୍କେ ଦୁଇ ଶହ୍ ରୁହାଟ୍କା ତ୍ଇହ୍ଣି ଅଦିକ୍ ଟ୍କାର୍ ରୁଟି ଗେନୁକେ ଅଇଦେ।”
8
ଯୀଶୁର୍ ଆରେକ୍ ଗଟେକ୍ ଚେଲା ଶିମୋନ୍ ପିତରାର୍ ବାଇସି ଆନ୍ଦ୍ରିୟ କଇଲା, ଇତି ଗଟେକ୍ ହିଲା ଆଚେ,
9
“ମ୍ତର୍ ଅତେକ୍ ଲକାର୍ ଗିନେ ହାଁଚ୍ଗଟ୍ ରୁଟି, ଆର୍ ଜଳେକ୍ ବାଜ୍ଲା ମାଚ୍ ଆଚେ, ହାତେକ୍ ଲକାର୍ ଗିନେ କାଇରି ଅଇଦେ?”
10
ଯୀଶୁ ଲକ୍ମ୍ନ୍କେ ବ୍ସାଉଆ ବ୍ଲି ଚେଲାମ୍ନ୍କେ କଇଲା। “ସେତି ର୍ନ୍ ବ୍ର୍ତି ଅଇରିଲି। ତ୍ବେ ସେତି ହାଁଚ୍ ହ୍ଜାର୍ ଅଣ୍ଡ୍ରାହିଲା ବ୍ସ୍ଲାଇ।”
11
ଯୀଶୁ ରୁଟିଦ୍ରି ଇଶ୍ଵର୍କେ ଦନ୍ୟବାଦ୍ ଦିଲା, ଆର୍ ସେତି ବ୍ସିରିଲା ଲକ୍ମ୍ନ୍କେ ବାଟାକ୍ରି ଦିଲାଇ, ଆର୍ ଜଳେକ୍ ମାଚ୍ ହେଁ ସେନ୍କ୍ରି ବାଟାକ୍ରି ଦିଲାଇ। ସେତିରିଲା ଲକ୍ମ୍ନ୍ ହେଟ୍ ହୁର୍ନେ କାଇଲାଇ।
12
ଆର୍ ସ୍ବୁ ଲକ୍ମ୍ନ୍ ହେଟ୍ ହୁର୍ନେ କାଇଲା ହ୍ଚେ ଯୀଶୁ ଚେଲାମ୍ନ୍କେ କଇଲା, “ଜ୍ତେକ୍ ଉବୁରି ଆଚେ ସ୍ବୁ ଗଟେତ୍ଇ ଆରାଉଆ ଜ୍ନ୍କ୍ରି କ୍ଣ୍ତେକ୍ ହେଁ ନ୍ଷ୍ଟନଇ।”
13
ସେ ହାଁଚ୍ଗଟ୍ ରୁଟିକେ ସବୁଲକ୍ କାଇଲା ହ୍ଚେ, ଜ୍ତେକ୍ ଉବୁର୍ଲି, ସେରି ଚେଲାମ୍ନ୍ ସେତିହ୍ଣି ବାର ଡ୍ଲା ରୁଟି ବେଟ୍ଲାଇ।
14
ଯୀଶୁର୍ ଇ ସ୍ବୁ ଚମ୍ତ୍କାର୍ କାମ୍ ଦ୍କି ସ୍ବୁ ଲକ୍ମ୍ନ୍କେ କଇଲାଇ, “ଜୁଇ ବବିଶତ୍ କ୍ତା କ୍ଉତାଲକ୍ ହୁର୍ତିବିକେ ଆସ୍ତାର୍ ରିଲି ସ୍ତ୍କ୍ରି ସେ ହ୍କା ଇ ମାନାଇ।”
15
ଲକ୍ମ୍ନ୍ ତାକେ ବ୍ଡ୍ମ୍ତ୍ କ୍ରି ର୍ଜା କ୍ରୁକେ ଜ୍ମ୍ଲାଇ ବ୍ଲି ଯୀଶୁ ଜାନ୍ଲା, ଆର୍ ସେ ଏକ୍ଲା ଲ୍ଗେରିଲା ଡଙ୍ଗ୍ରେ ବାରିଗ୍ଲା?
16
ଯୀଶୁର୍ ଚେଲାମ୍ନ୍ ସେଦିନ୍ ସ୍ଞ୍ବେଳା ସ୍ମ୍ଦୁର୍ କ୍ଣ୍ତିଲ୍ଗେ ଗ୍ଲାଇ,
17
ବେଳ୍ ବୁଡି ରାତି ଅଇ ଆସ୍ତିରିଲି, ସେଡେବ୍ଳ୍ ହ୍ତେକ୍ ଯୀଶୁ ସେମ୍ନ୍କାର୍ ଲ୍ଗେ ଆସି ନ୍ରିଲା, ସେତାର୍ଗିନେ ସେମ୍ନ୍ ଡଙ୍ଗାଇ ଚ୍ଗି ସ୍ମ୍ଦୁରାର୍ ସେହାଟିର୍ କପର୍ନାହୁମ୍ ସ୍ହର୍କେ ଜ୍ମ୍କେ ଆରମ୍ କ୍ଲାଇ।
18
ସେଡେବ୍ଳ୍ ହ୍ବନ୍ ବେସି ଅଉତିରିଲା ଲାଗି ସ୍ମ୍ନ୍ଦୁରେ ଲ୍ଉଡି ଉଟ୍ତି ରିଲି।
19
ସେତାର୍ଗିନେ ଚେଲାମ୍ନ୍ ସ୍ମ୍ଦୁରେ ହାଁଚ୍ ଚଅ କିଲମିଟର୍ ଡଙ୍ଗା ଚ୍ଗି ଗ୍ଲାହ୍ଚେ, ଯୀଶୁ ହାଣି ଉହ୍ରେ ଇଣ୍ତି ତାକାର୍ ଲ୍ଗେ ଆସ୍ତାର୍ ସେମ୍ନ୍ ଦ୍କ୍ଲାଇ, ଆର୍ ବେସି ଡିର୍ଲାଇ।
20
ମ୍ତର୍ ଯୀଶୁ ସେମ୍ନ୍କେ କଇଲା, “ଇରି ତ ମୁଇ ନିଜେ।”
21
ସେମ୍ନ୍ ସ୍ର୍ଦା ଅଇଲାଇ, ଆର୍ ଯୀଶୁକେ ଡଙ୍ଗା ବିତ୍ରେ କୁଦ୍ଲାଇ, ଆରେକ୍ ସେମ୍ନ୍ ଜୁଇ ଜାଗାଇ ଜାତିରିଲାଇ ସେ ଦାହ୍ରେ ଡଙ୍ଗା ସେ ଜାଗାଇ କେଟ୍ଲି।
22
ତାର୍ ଆରେଗଟ୍ ଦିନ୍ ସେହାଟି ରିଲା ଲକ୍ମ୍ନ୍ ଜାନ୍ଲାଇ, ଯେ ସେତି ଗଟେକ୍ ସେ ଡଙ୍ଗାରିଲି, ଆର୍ ଚେଲାମ୍ନ୍ ଯୀଶୁକେ ଚାଡି ସ୍ମ୍ଦୁର୍ ବିତ୍ରେ ବାରି ଜାଇରିଲାଇ।
23
ଯୀଶୁ ଜୁଇ ଜାଗାଇ ମାପ୍ରୁକେ ଦନ୍ୟବାଦ୍ ଦ୍ଇକ୍ରି ଲକ୍ମ୍ନ୍କେ ରୁଟି କାମ୍କେ ଦ୍ଇରିଲା, ସେ ଜାଗାଇ ତିବିରୀଆ ଜିଲାଇ ହ୍ଣି କ୍ତେକ୍ ଡଙ୍ଗା ଆସି ହ୍ଚ୍ଲି।
24
ଲକ୍ମ୍ନ୍ ଯୀଶୁ କି ତାର୍ ଚେଲାମ୍ନ୍କେ ସେତି ନାହାଇକ୍ରି, ଯୀଶୁକେ କଜୁକ୍ ଡଙ୍ଗା ଚ୍ଗି କପର୍ନାହୁମ୍ ସ୍ହର୍କେ ଗ୍ଲାଇ।
25
ଲକ୍ମ୍ନ୍ ଯୀଶୁକେ ସ୍ମ୍ଦୁରାର୍ ସେହାଟି ଦ୍କିକ୍ରି ହ୍ଚାର୍ଲାଇ, “ଏଗୁରୁ ତୁଇ କ୍ଡେବ୍ଳ୍ ଇତି ଆସିକ୍ରି ହ୍ଚ୍ଲିସ୍?”
26
ଯୀଶୁ ସେମ୍ନ୍କେ କଇଲା, “ମୁଇ ତୁମୁକ୍ମ୍ନ୍ ସ୍ତ୍ କ୍ମ୍ଲେ, ତୁମିମ୍ନ୍ ମର୍ ଚାନିଆକାମ୍ ସ୍ବୁ ଦ୍କିକ୍ରି ମକେ ଇତିକେ କ୍ଜୁକେ ଆସି ନ୍କେରାସ୍, ମ୍ତର୍ ରୁଟି ହେଟ୍ ହୁର୍ନେ କାଇ ଆଚାସ୍ ଲାଗି ମକେ କଜୁକେ ଆସିଆଚାସ୍।
27
ଜୁଇ କାଦି ନ୍ଷ୍ଟ ଅଇଦ୍, ତାର୍ ଗିନେ କ୍ଷ୍ଟ କ୍ରାନାଇ, ମ୍ତର୍ ଜୁଇ କାଦି ନ୍ଷ୍ଟ ନଇଦ୍ ଆର୍ ନ୍ସେର୍ତା ଜୀବନ୍ ଦ୍ଇଦ୍, ସେ କାଦିର୍ ଗିନେ କ୍ଷ୍ଟ କ୍ରା। କାଇତାକ୍ ସେ କାଦି ମୁଇ ମାନାଇ ହିଲା ଦ୍ଇନ୍ଦ୍, କାଇତାକ୍ ଉବା ଇଶ୍ୱର୍ ସେତାର୍ଗିନେ ମକେ ଅଦିକାର୍ ଦିଲାଆଚେ।”
28
ସେମ୍ନ୍ ଯୀଶୁକେ ହ୍ଚାର୍ଲାଇ, “ଇଶ୍ଵରାର୍ ଇଚା ହ୍ର୍ କାମ୍ କ୍ରୁକେ ଅମିମ୍ନ୍ କାଇରି କ୍ରୁନ୍ଦ୍?”
29
ଯୀଶୁ ସେମ୍ନ୍କେ କଇଲା, “ଜାକେ ଇଶ୍ୱର୍ ହ୍ଟାଇଲା ଆଚେ, ତାକେ ବିଶ୍ବାସ୍ କ୍ଲେକ୍, ତୁମିମ୍ନ୍ ତାର୍ ଇଚା ହୁରା କ୍ରୁହାରାସ୍।”
30
ସେମ୍ନ୍ ଯୀଶୁକେ ହ୍ଚାର୍ଲାଇ, “ଅମିମ୍ନ୍ ତ୍ର୍ ଲ୍ଗେ ଜ୍ନ୍କ୍ରି ବିଶ୍ବାସ୍ କ୍ରୁନ୍ଦ୍, ସେତାର୍ଗିନେ ତୁଇ ଗଟେକ୍ ଚାନିଆକାମ୍କ୍ରି ଦ୍କାଉ, ତୁଇ କ୍ଉ, କାଇରି ଦ୍କାମ୍ ହାର୍ସି କି?
31
ଅମାର୍ ଦାଦିବାବୁମ୍ନ୍ ଶୁନ୍ସାନ୍ ଜାଗାଲ୍ଗେ ମାନ୍ନା କାଇ ରିଲାଇ, ଆର୍ ଅମାର୍ ଦ୍ର୍ମ୍ ଶାସ୍ତର୍ ହର୍, ଇଶ୍ୱର୍ ସେମ୍ନ୍କେ ସ୍ର୍ଗେ ହ୍ଣି ଇ କାଦି ଦ୍ଇରିଲା।”
32
ସେତାକ୍ ଯୀଶୁ ସେମ୍ନ୍କେ କଇଲା, “ମୁଇ ତୁମୁକ୍ମ୍ନ୍ ସ୍ତ୍ କ୍ମ୍ଲେ, ଜୁଇ ମାନ୍ନା ମୋଶା ତୁମୁକ୍ମ୍ନ୍ ଦ୍ଇରିଲା, ସେରି ସ୍ର୍ଗେ ହ୍ଣି ଆସିରିଲା କାଦି ନଇ।
33
କାଇତାକ୍ ମର୍ ଉବା ଇଶ୍ୱର୍ ତୁମୁକେ ସ୍ତ୍କ୍ରି ସ୍ର୍ଗାର୍ କାଦି ଜାଗାମ୍ଲା, କାଇତାକ୍ ଯେ ସ୍ର୍ଗେ ହ୍ଣି ଆସିକ୍ରି ହୁର୍ତିବିର୍ ଲକ୍ମ୍ନ୍କେ ଜୀବନ୍ ଦ୍ଇଦ୍, ସେ ହ୍କା ଅମ୍ଲା ଇଶ୍ୱର୍ ଦିଲା କାଦି।”
34
ସେମ୍ନ୍ ତାକେ କଇଲାଇ, “ମାପ୍ରୁ ସ୍ବୁବ୍ଳ୍ ଅମୁକ୍ମ୍ନ୍ ଇ କାଦି ଦେ।”
35
ଯୀଶୁ କଇଲା, “ମୁଇ ନ୍ସେର୍ତା ଜୀବନ୍ ଦେତା କାଦି। ଯେ ମର୍ଲ୍ଗେ ଆସେଦ୍, ସେ ଆରେକ୍ ବୁକ୍ ନ୍ଇ ଆର୍ ଯେ ମକେ ବିଶ୍ବାସ୍ କ୍ରେଦ୍, ତାକେ ଆରେକ୍ ଶସ୍ ନଇ।
36
ମ୍ତର୍ ମୁଇ ତୁମୁକ୍ମ୍ନ୍ କ୍ମ୍ଲେ, ତୁମିମ୍ନ୍ ମକେ ଦ୍କିକ୍ରି ହେଁ ବିଶ୍ବାସ୍ ନ୍କେରୁଲାସ୍।
37
ଜୁଇ ଲକ୍ମ୍ନ୍କେ ମର୍ ଉବା ମକେ ଦିଲାଆଚେ, ସେସ୍ବୁ ଲକ୍ମ୍ନ୍ ମର୍ଲ୍ଗେ ଆସ୍ତି, ଯେ ମର୍ଲ୍ଗେ ଆସେଦ୍, ମୁଇ କ୍ବେହେଁ ତାକେ ବାଉଳାଇ ନ୍କେରି।
38
କାଇତାକ୍ ମୁଇ ମର୍ ନିଜାର୍ ଇଚା ହୁରାକ୍ରୁକେ ଆସି ନ୍କେରି, ମ୍ତର୍ ମର୍ ହ୍ଟାଇରିଲା ଉବାର୍ ଇଚା ହୁରାକ୍ରୁକେ ସ୍ର୍ଗେ ହ୍ଣି ଆଇଲେଆଚି।
39
ଜୁଇସ୍ବୁ ଲକ୍ମ୍ନ୍କେ ସେ ମକେ ଦିଲାଆଚେ, ସେ ଲକ୍ମ୍ନ୍କାର୍ ବିତ୍ରେହ୍ଣି ଗଟେକ୍ ଲକ୍କେ ହେଁ ମୁଇ ଆରାଇ ନ୍କେରି, ମ୍ତର୍ ସ୍ରାସ୍ରି ଦିନ୍ ସେମ୍ନ୍କେ ଆରେକ୍ ଜୀବନ୍ ଦ୍ଇକ୍ରି ଉଟାଇନ୍ ଇରି ତାର୍ ଇଚ୍ଚା।
40
କାଇତାକ୍ ମର୍ ଉବା ମ୍ନ୍କ୍ରୁଲା ଜ୍ତେକ୍ ଲକ୍ ମକେ ଦ୍କିକ୍ରି ମର୍ ଉହ୍ରେ ବିଶ୍ବାସ୍ କ୍ର୍ତି, ସେମ୍ନ୍ ନ୍ସେର୍ତା ଜୀବନ୍ ହାଉତି। ସେତାର୍ଗିନେ ସ୍ରାସ୍ରି ଦିନ୍ ମୁଇ ସେ ସ୍ବୁଲକ୍କେ ଆରେକ୍ ଜୀବନ୍ ଦ୍ଇକ୍ରି ଉଟାଇନ୍।”
41
ଯୀଶୁ ନିଜ୍କେ ସ୍ର୍ଗେ ହ୍ଣି ଆସି ରିଲାର୍ କାଦିବ୍ଲି କଇଲାକ୍, ଯିହୁଦିମ୍ନ୍ ଇକ୍ତା ଶୁଣିକ୍ରି ମ୍ନ୍ ଉଣା କ୍ଲାଇ,
42
ସେମ୍ନ୍ କଇଲାଇ, “ଇ ମାନାଇ ଯୋଷେପାର୍ ହଇସି ଯୀଶୁ ନଇକି, ଅମିମ୍ନ୍ ତାର୍ ଉବାସି ଆଇସିକେ ହେଁ ଜାଣୁନ୍ଦ୍ କି? ତ୍ବେ ସେ କ୍ନ୍କାର୍ ମୁଇ ସ୍ର୍ଗେ ଆସି ରିଲାର୍ କାଦିବ୍ଲି କ୍ମ୍ଲା?”
43
ଯୀଶୁ ସେମ୍ନ୍କେ କଇଲା, “ଇ ସ୍ବୁ କ୍ତାବାର୍ତା ବ୍ନ୍ଦ୍ କ୍ରା।
44
ଜୁଇ ଉବା ମକେ ହ୍ଟାଇଲା ଆଚେ, ଯଦି ସେ କାକେ ମର୍ଲ୍ଗେ ନାନ୍ଲେକ୍ କେ ହେଁ ମର୍ଲ୍ଗେ ଆସୁ ନାହାର୍ତି, ଆର୍ ଜ୍ତେକ୍ ସ୍ବୁ ଲକ୍ ମର୍ଲ୍ଗେ ଆସ୍ତି, ମୁଇ ସେମ୍ନ୍କେ ସ୍ରାସ୍ରି ଦିନ୍ ଆରେକ୍ ଜୀବନ୍ ଦ୍ଇକ୍ରି ଉଟାଇନ୍।”
45
ବବିଶତ୍ କ୍ତା କ୍ଉତା ଲକ୍ମ୍ନ୍କାର୍ ଦ୍ର୍ମ୍ ଶାସ୍ତର୍ ଲ୍ଗେ ଲେକା ଅଇଲିଆଚେ, ଯେ “ସ୍ବୁ ଲକ୍ମ୍ନ୍ ଇଶ୍ଵରାର୍ ତ୍ଇହ୍ଣି ହ୍କା ଶିକ୍ୟା ହାଉତି।” ଯେ କେ ଉବା ଇଶ୍ଵରାର୍ କ୍ତା ଶୁଣିକ୍ରି ତାର୍ ଶିକ୍ୟା ମ୍ନ୍କ୍ରେଦ୍, ସେ ହ୍କା ମର୍ଲ୍ଗେ ଆସେଦ୍।
46
କେ ହେଁ ଉବାକେ ଦ୍କି ନ୍କେର୍ତି, ମ୍ତର୍ ମୁଇ ହ୍କା ଦ୍କ୍ଲେ ଆଚି, ଯାକେ ମର୍ ଉବା ଇଶ୍ୱର୍ ହ୍ଟାଇଲା ଆଚେ, ସେ ହ୍କା ତାକେ ଦ୍କ୍ଲା ଆଚେ।
47
ମୁଇ ତୁମୁକ୍ମ୍ନ୍ ସ୍ତ୍ ସ୍ତ୍ କ୍ମ୍ଲେ, ଯେ ବିଶ୍ବାସ୍ କ୍ରେଦ୍ ସେ ନ୍ସେର୍ତା ଜୀବନ୍ ହାଇଦ୍।
48
ମୁଇ ନ୍ସେର୍ତା ଜୀବନ୍ ଦେତା କାଦି।
49
ତୁମାର୍ ଦାଦିବାବୁମ୍ନ୍ ଶୁନ୍ସାନ୍ ଜାଗାଲ୍ଗେ ମାନ୍ନା କାଇକ୍ରି ହେଁ ମ୍ରିଗ୍ଲାଇ।
50
ମ୍ତର୍ ଜୁଇ କାଦି ସ୍ର୍ଗେ ହ୍ଣି ଆସେଦ୍, ସେ କାଦି ଯେ କାଇଦ୍, ସେ ମ୍ରିନ୍କେରେ।
51
ମୁଇ ସ୍ର୍ଗେ ହ୍ଣି ଆସିରିଲା ସେ ଜୀବନ୍ ଦେତା କାଦି, ଇ କାଦି ଯେ କାଇଦ୍, ସେ ସ୍ବୁଦିନ୍ ବଚି ର୍ଇଦ୍। ମୁଇ ଜୁଇ କାଦି ଦ୍ଇନ୍ଦ୍ ସେରି ଅମ୍ଲି ମର୍ ମାସ୍। ହୁର୍ତିବିକେ ବାଚାମ୍କେ ମୁଇ ସେରି ଦ୍ଇନ୍ଦ୍।
52
ଇକ୍ତା ଶୁଣିକ୍ରି ଯିହୁଦି ନେତାମ୍ନ୍ ରିସା ଅଇଲାଇ, ଆର୍ କ୍ଉଆ କୁଇ ଅଇଲାଇ, “ଇ ମାନାଇ କ୍ନ୍କ୍ରି ସେ ଆମୁକେ ତାର୍ ଗ୍ଗାଳାର୍ ମାସ୍ କାମ୍କେ ଦ୍ଇଦ୍?”
53
ଯୀଶୁ ସେମ୍ନ୍କେ କଇଲା, “ମୁଇ ସ୍ତ୍କ୍ରି କ୍ମ୍ଲେ, ମୁଇ ମାନାଇ ହିଲାର୍ ଗ୍ଗାଳାର୍ ମାସ୍ ତୁମିମ୍ନ୍ ନ୍କାଇଲେକ୍ ଆର୍ ମ୍ର୍ ବ୍ନି ନ୍ଡୁକ୍ଲେକ୍, ତୁମିମ୍ନ୍ ଜୀବନ୍ ହାମ୍ ନାହାରାସ୍।
54
ଯେ ମର୍ ଗ୍ଗାଳାର୍ ମାସ୍ କାଇଦ୍ ଆର୍ ମର୍ ବ୍ନି ଡୁକେଦ୍, ସେ ନ୍ସେର୍ତା ଜୀବନ୍ ହାଇଦ୍, ମୁଇ ତାକେ ସ୍ରାସ୍ରି ଦିନ୍ ଆରେକ୍ ମ୍ଲାତ୍ଇହ୍ଣି ଆରେକ୍ ଉଟାଇନ୍।
55
କାଇତାକ୍ ମର୍ ଗ୍ଗାଳାର୍ ମାସ୍ ସ୍ତକ୍ରି କାଦି ଆର୍ ମର୍ ବ୍ନି ସ୍ତକ୍ରି ଡୁକ୍ତା ଜିନିଷ୍।
56
ଯେ ମର୍ ଗ୍ଗାଳାର୍ ମାସ୍ କାଇଦ୍, ଆର୍ ମର୍ ବ୍ନି ଡୁକେଦ୍ ସେ ମର୍ଲ୍ଗେ ର୍ଇଦ୍, ଆର୍ ମୁଇ ତାର୍ ଲ୍ଗେ ସ୍ବୁବ୍ଳ୍ ର୍ଇନ୍।
57
ଜ୍ନ୍କ୍ରି ଜୀବନ୍ ରିଲା ଉବା ମକେ ହ୍ଟାଇଲା ଆଚେ, ସେତାର୍ଗିନେ ମୁଇ ହେଁ ତାର୍ ଗିନେ ଜୀବନ୍ ଆଚି, ସେନ୍କ୍ରି ଯେ ମର୍ ଗ୍ଗାଳାର୍ ମାସ୍ କାଇଦ୍ ସେ ମର୍ଗିନେ ଜୀବନ୍ ର୍ଇଦ୍।
58
ଇରିହ୍କା ସ୍ର୍ଗେ ହ୍ଣି ଆସିରିଲା କାଦି, ଜୁଇ କାଦି କାଇଲାଇ ଆର୍ ତୁମାର୍ ଦାଦିବାବୁମ୍ନ୍ ମ୍ଲାଇ, ଇ କାଦି ସେତିହ୍ଣି ସ୍ବୁ ଅଲ୍ଗା ଆଚେ, ଇ କାଦି ଯେ କାଇଦ୍ ସେ ସ୍ବୁଦିନ୍ ବାଚି ର୍ଇଦ୍।”
59
ଯୀଶୁ କପର୍ନାହୁମ୍ ସ୍ହରାର୍ ଯିହୁଦିମ୍ନ୍କାର୍ ପାର୍ତେନା ଗ୍ରେ ଶିକ୍ୟା ଦେତାବ୍ଳ୍ ଇ ସ୍ବୁକ୍ତା କଇରିଲା।
60
ଇକ୍ତା ଶୁଣି ତାର୍ ଚେଲାମ୍ନ୍କାର୍ ବିତ୍ରେ କ୍ତେକ୍ ଲକ୍ମ୍ନ୍ କଇଲାଇ, ଇ ସ୍ବୁ ଶିକ୍ୟା ବେସି କ୍ଷ୍ଟ, ଇ ଶିକ୍ୟା କେ ଶୁଣେଦ୍?
61
ଇ ବିଷୟେ କେ ଯୀଶୁକେ କ୍ମ୍ ନାହାର୍ତି ରିଲାଇ, ମ୍ତର୍ ଚେଲାମ୍ନ୍ ତାକାର୍ ତାକାର୍ ବିତ୍ରେ କ୍ରାପ୍ ବାବୁଲାଇ ବ୍ଲି ବାବିକ୍ରି ସେ ସେମନ୍କେ କଇଲା, କାଇତାକ୍ ତୁମିମ୍ନ୍ ଇ କ୍ତାଇ ମନ୍ ଉଣା କ୍ରୁଲାସ୍?
62
ସ୍ର୍ଗେ ହ୍ଣି ମାନାଇ ହିଲା ଜୁଇତି ଆସିଆଚେ, ସେ ସେ ଜାଗାଇ ଲେଉଟି ଜାତାର୍ ଦ୍କଲେକ୍ ତୁମି କାଇରି କ୍ରାସ୍?
63
ଇଶ୍ଵରାର୍ ଆତ୍ମା ଜୀବନ୍ ଦ୍ଇଦ୍, ମ୍ତର୍ ମାନାଇ ହିଲାର୍ ଶ୍କ୍ତି କାଇରି କ୍ରୁନାହାରେ। ସେ ଜୀବନ୍ ଦେତା ଆତ୍ମାକେ ତୁମିମ୍ନ୍ ଜାଣୁହାରାସ୍ ସେତାର୍ଗିନେ ମୁଇ ଇ ସ୍ବୁକ୍ତା କ୍ମ୍ଲେ।
64
ମ୍ତର୍ ତୁମାର୍ ବିତ୍ରେ କ୍ତେକ୍ ଲକ୍ ବିଶ୍ବାସ୍ ନ୍କେରୁଲାସ୍। ଯୀଶୁ ହ୍ର୍ତୁ ହ୍ଣି ଜାଣିରିଲା, କେ ତାକେ ବିଶ୍ବାସ୍ କ୍ର୍ତି ଆର୍ କେ ତାକେ ଶ୍ତ୍ରୁ ଆତେ ସ୍ହ୍ରି ଦ୍ଇଦ୍ ବ୍ଲି ଜାଣିରିଲା।
65
ଆରେକ୍ ଯୀଶୁ କଇଲା, “ସେତାର୍ଗିନେ ମୁଇ କ୍ମ୍ଲେ, ଯେ ଉବା ଇଶ୍ୱର୍ ମକେ ସାଇଜ ନ୍ଦିଲେକ୍ କେ ହେଁ ମ୍ର୍ ଲଗେ ଆସୁ ନାହାଁରେ।”
66
ଇକ୍ତା ଶୁଣି ଯୀଶୁର୍ ହ୍ଚ୍ ହ୍ଚ୍ ଜାତିରିଲା କ୍ତେକ୍ ଚେଲାମ୍ନ୍ ତାର୍ସ୍ଙ୍ଗ୍ ଜ୍ମ୍କେ ମ୍ନ୍ ନ୍କେରି ଲେଉଟି ଗ୍ଲାଇ।
67
ସେରି ଦ୍କିକ୍ରି ଯୀଶୁ ତାର୍ ବାର୍ଗଟ୍ ଚେଲାମ୍ନ୍କେ ହ୍ଚାର୍ଲା, “ତୁମିମ୍ନ୍ ହେଁ କି ମକେ ଜାଡି ଜ୍ମ୍କେ ମ୍ନ୍କ୍ରୁଲାସ୍?”
68
ଶିମୋନ୍ ପିତର୍ ତାକେ କଇଲା, “ମାପ୍ରୁ ଅମିମ୍ନ୍ କାର୍ ଲଗେ ଜ୍ମନ୍ଦ୍? ତର୍ ଲଗେ ତ ନ୍ସେର୍ତା ଜୀବନ୍ ଆଚେ।
69
ଆରେକ୍ ତୁଇ ଇଶ୍ୱର୍ ତ୍ଇହ୍ଣି ହ୍ଟାଇଲା ଗଟେକ୍ ପବିତର୍ ମାନାଇ ହିଲା, ଇକ୍ତା ଅବେ ଅମିମ୍ନ୍ ବିଶ୍ବାସ୍ କ୍ରି ଜାଣୁଲୁ।”
70
ଯୀଶୁ ସେମ୍ନ୍କେ କଇଲା, “ମୁଇ ତୁମୁକେ ବାରଗଟ୍ ଚେଲାମ୍ନ୍କେ ବାଚି ନ୍କେରି କି? ମ୍ତର୍ ତୁମାର୍ ବିତ୍ରେ ଗଟେକ୍ ଶଇତାନ୍ ଆଚେ।”
71
ଶିମୋନାର୍ ହଇସି ଇଷ୍କାରିୟତ୍ ଯେ କି ଯିହୁଦାକେ ଦ୍କାଇକ୍ରି ସେ ଇକ୍ତା କଇରିଲା, ବାରଗଟ୍ ଚେଲାମ୍ନ୍କାର୍ ବିତ୍ରାର୍ ଲକ୍ ଅଇକ୍ରି ହେଁ ଯୀଶୁକେ ଶ୍ତ୍ରୁ ମ୍ନ୍କାର୍ ଆତେ ସ୍ହ୍ରି ଦେମ୍କେ ଜାତିରିଲା।
← Chapter 5
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 7 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21