John 7

Bodo BDVNT (ବ୍‌ଡ଼୍ ହ୍‌ର୍‌ଜା ବାଇବଲ)

1ସେତାର୍‍ଗିନେ ଯୀଶୁ ଗାଲିଲୀ ଜିଲାଇ ବୁଲୁକେ ଲାଗ୍‍ଲା, ମ୍‍ତର୍ ସେ ଯିହୁଦା ଦେଶେ ବୁଲୁକେ ମ୍‌ନ୍ ନ୍‌କେଲା, କାଇତାକ୍ ସେତିର୍ ଯିହୁଦି ନେତାମ୍‍ନ୍ ତାକେ ମ୍‌ର୍‌ନେ ମାରୁକେ ମ୍‍ନ୍‍କ୍‍ର୍‌ତିରିଲାଇ।

2ମ୍‍ତର୍ ଯିହୁଦିମ୍‌ନ୍‌କାର୍ ଗ୍‍ରେ ବାସା କ୍‌ର୍‌ତାର୍ ହ୍‌ରବ୍ ଲ୍‌ଗେ ଆସିରିଲି,

3ସେତାର୍‍ଗିନେ ତାକାର୍ ବାଇସିମ୍‍ନ୍ ତାକେ କଇଲାଇ, “ତୁଇ ଇ ଜାଗାଚାଡି ଯିହୁଦା ଦେଶେ ହ୍‍ଳାଉ। ତୁଇ କ୍‌ରିରିଲା ସ୍‌ବୁକାମ୍ ତର୍ ଚେଲାମ୍‌ନ୍ ସେତି ଦ୍‍କ୍‌ତି,

4କାଇତାକ୍ ଯେ ବ୍‍ଲ୍ ଅମ୍‍କେ ମ୍‍ନ୍‍କ୍‌ରେଦ୍, ସେ ତାର୍ କାମ୍‌କେ ଲୁକାଇକ୍‌ରି ର୍‌କୁକେ ମ୍‌ନ୍ ନ୍‌କେରେ, ଯଦି ତୁଇ ଇସ୍‌ବୁକାମ୍ କ୍‍ରୁଲିସ୍, ତ୍‍ବେ ହୁର୍‌ତିବି ଲ୍‌ଗେ ତର୍ କାମ୍ ବ୍‍ଲ୍ ଅଉଅ।”

5ତାର୍ ବାଇସିମ୍‍ନ୍ ହେଁ ତାର୍ ଲ୍‌ଗେ ବିଶ୍‍ବାସ୍ ନ୍‌କେର୍‌ତିରିଲାଇ।

6ସେତାକ୍ ଯୀଶୁ ସେମ୍‍ନ୍‍‍କେ କଇଲା, “ଅବେହ୍‍ତେକ୍ ମ୍‍ର୍‍ଗିନେ ସ୍‌ମୟ୍ ନାସେତା, ମ୍‍ତର୍ ତୁମାର୍ ଗିନେ ସ୍‌ମୟ୍ ଆଚେ ଜ୍‌ଡେବ୍‌ଳ୍ ହେଁ ଜ୍‌ମ୍‌ହାରାସ୍।

7ହୁର୍‌ତିବି ତୁମୁକେ ଗୁର୍‌ନା ଆର୍ ଲିନ୍ଦା ନ୍‌କେରେ, ମ୍‍ତର୍ ହୁର୍‌ତିବି ମକେ ଗୁର୍‌ନା ଆର୍ ଲିନ୍ଦା କ୍‌ରୁଲି, କାଇତାକ୍ ହୁର୍‌ତିବିର୍ କାମ୍ କ୍‍ରାପ୍ ବ୍‍ଲି ମୁଇ କଇଲେଆଚି ଲାଗି।

8ତୁମିମ୍‍ନ୍ ଇ ହ୍‍ରବ୍‍କେ ଜାହା, ମୁଇ ଆସି ନ୍‌କେରି, ମର୍‌ଗିନେ ଟିକ୍ ସ୍‌ମୟ୍ ନାସେତା।”

9ସେ ସେମ୍‌ନ୍‌କେ ସ୍‍ବୁକ୍‍ତା କ୍‌ଇକ୍‍ରି ଯୀଶୁ ଗାଲିଲୀ ଜିଲାଇ ରିଲା।

10ତାର୍ ବାଇସିମ୍‍ନ୍ ସେ ହ୍‍ରବ୍‍କେ ଗ୍‍ଲାହ୍‌ଚେ, ଯୀଶୁ ହେଁ ସେ ହ୍‍ରବ୍‍କେ ନ୍‌ଦେକ୍‌ଲା ହର୍ ଲୁକିକ୍‌ରି ଗ୍‍ଲା।

11ହ୍‌ରବ୍ ବ୍‍ଳ୍, ଯିହୁଦି ନେତାମ୍‍ନ୍ ତାକେ କଜ୍‍ଲାଇ ଆର୍ ହ୍‌ଚାର୍‌ଲାଇ, ଯୀଶୁ ଆସିନ୍‌କେରେ କି?

12ଲକ୍‍ମ୍‍ନ୍ ତାର୍ ବିଷୟେ ଦିରେ ଦିରେ କ୍‌ତାବାର୍‍ତା କ୍‍ର୍‍ତିରିଲାଇ। କ୍‍ତେକ୍ ଲକ୍‍ମ୍‍ନ୍ କ୍‌ଉତିରିଲାଇ, “ସେ ଗଟେକ୍ ବ୍‍ଲ୍ ଲକ୍।” ଆରେକ୍‌ କ୍‍ତେକ୍ ଲକ୍‍ମ୍‍ନ୍ କ୍‌ଉତିରିଲାଇ, “ନାଇ। ସେ ଲକ୍‌ମ୍‍ନ୍‌କେ କ୍‍ରାପ୍ ବାଟ୍‌କେ ନେମ୍‍ଲା।”

13ମ୍‍ତର୍ ଯିହୁଦି ନେତାମ୍‍ନ୍‌କେ ଡିରିକ୍‍ରି ଲକ୍‍ମ୍‍ନ୍ କୁଲାକୁଲି ବାବେ ତାର୍ ବିଷୟେ କ୍‌ତାବାର୍‍ତା ନ୍‍କେରୁଲାଇ।

14ମ୍‍ତର୍ ହ୍‌ର୍‌ବ୍ ଅଦାବାଗ୍ ସ୍‍ର୍‍ଲା ହ୍‌ଚେ, ଯୀଶୁ ମନ୍ଦିରେ ଜାଇକ୍‍ରି ଶିକ୍ୟା ଦେମ୍‌କେ ଲାଗ୍‍ଲା।

15ଯିହୁଦି ନେତାମ୍‍ନ୍ କାବାଅଇଲାଇ ଆର୍ କଇଲାଇ, “ଇ ମାନାଇ ଦ୍‌ର୍‌ମ୍ ଶାସ୍‌ତର୍ ହଳି ନ୍‌କେରେ, ମ୍‍ତର୍ କ୍‍ନ୍‍କ୍‍ରି ଇ ସ୍‌ବୁ ବିଷଇ ଶିକ୍ୟା ଦେମ୍‍ଲା?”

16ସେତାକ୍ ଯୀଶୁ ସେମ୍‍ନ୍‍‍କେ କଇଲା, ଇ ସ୍‌ବୁ ଶିକ୍ୟା ମର୍ ନିଜାର୍ ଶିକ୍ୟା ନଇ, ମ୍‍ତର୍ ଇ ସ୍‌ବୁ ମକେ ହ୍‌ଟାଇଲା ମର୍ ଉବା ଇଶ୍ଵରାର୍ ଶିକ୍ୟା।

17ଯେ ଇଶ୍ଵରାର୍ ଇଚା ହୁରାକ୍‌ରୁକେ ମ୍‌ନ୍‌କ୍‌ରୁଲା, ସେ ହ୍‍କା ଇ ଶିକ୍ୟା ଇଶ୍ଵରାର୍ ତ୍ଇହ୍‍ଣି ଆସିଆଚେ କି ମୁଇ ମର୍ ନିଜାର୍ ଶିକ୍ୟା ଦେମ୍‍ଲେ, ସେରି ଜାଣୁହାରେ।

18ଯେ ନିଜାର୍ ବୁଦି ଗିଆନେ କ୍‌ତା କଇଦ୍, ସେ ତାର୍ ବ୍‌ଡ୍‌ହାଣ୍ କ୍‍ରେଦ୍, ମ୍‍ତର୍ ଯେ ତାର୍ ହ୍‌ଟାଇରିଲା ମାନାଇକେ ମାନ୍‍ତି କ୍‍ରେଦ୍, ସେ ହ୍‌କା ସ୍‌ତ୍ ଲକ୍, କାଇତାକ୍ ତାର୍ ଲ୍‌ଗେ ଅଳ୍‍କ୍ ହେଁ ମିଚ୍‍ନାଇ।

19ମୋଶା ତୁମାର୍ ଗିନେ ବିଦିବିଦାନ୍ ଆଣି ନ୍‍ରିଲା କି? ମ୍‍ତର୍ ତୁମାର୍ ବିତ୍‌ରେ କେ ଗଟେଲକ୍ ହେଁ କାଇତାକ୍ ସେ ବିଦିବିଦାନ୍‌କେ ନ୍‍ମାନୁଲାସ୍? ତୁମିମ୍‍ନ୍ କାଇତାକ୍ ମକେ ମ୍‌ର୍‌ନେ ମାରୁକେ ମ୍‍ନ୍‍କ୍‍ରୁଲାସ୍?

20ଲକ୍‍ମ୍‍ନ୍ କଇଲାଇ, ତକେ ବୁତ୍‌ଆତ୍ମା ଡ୍‍ସ୍‍ଲିଆଚେ, କେ ତକେ ମ୍‌ର୍‌ନେ ମାରୁକେ ମ୍‌ନ୍ କ୍‌ରୁଲାଇ?

21ଯୀଶୁ ସେମ୍‍ନ୍‍‍କେ କଇଲା, “ମୁଇ ଗଟେକ୍ ବ୍‌ଡ୍‌କାମ୍ କ୍‌ର୍‌ତାର୍ ଦ୍‍କିକ୍‍ରି ତୁମିମ୍‍ନ୍ ବେସି ଚାନିଆ ଅଇଲାସ୍।

22ତୁମାର୍ ହିଲାମ୍‍ନ୍‍କେ ସୁନତ୍ କ୍‌ରୁକେ ମୋଶା ଆଦେଶ୍ ଦ୍‌ଇରିଲା, ଇରି ମୋଶା ଆରମ୍ କ୍‍ରି ନ୍‍ରିଲା ମ୍‍ତର୍ ତୁମାର୍ ଦାଦିବାବୁ ଦିନ୍‌ହ୍‌ଣି ଇ ସ୍‌ବୁ ଚାଲି ଆସୁଲି। ବିଶାଉଣିଦିନ୍ ତୁମିମ୍‍ନ୍ ସେ ସୁନତ୍ କାମ୍ କ୍‍ରୁଲାସ୍ ତ୍‍ବେ ସେନ୍‍କ୍‌ରି କ୍‌ର୍‌ତାର୍ ଲାଗି ତୁମିମ୍‍ନ୍ କାଇରି ବିଶାଉଣିଦିନାର୍ ନିୟମ୍‌କେ ମାନୁଲାସ୍ କି? ଇରି ତୁମିମ୍‍ନ୍ କ୍‍ବେହେଁ ହାସ୍‌ରି ନ୍‌କେରାସ୍।

23ଯଦି ବିଶାଉଣିଦିନ୍ ଗଟେକ୍ ହିଲାକ୍ ସୁନତ୍ କ୍‌ଲେକ୍ ମୋଶାର୍ ବିଦିବିଦାନ୍ ହ୍‍ର୍ ବୁଲ୍ ନ୍‌ମ୍‌ଲି, ତ୍‍ବେ ମୁଇ ସେ ଦିନ୍ ଗଟେକ୍ ଲକ୍‌କେ ବ୍‍ଲ୍ କ୍‌ଲାକେ କାଇତାକ୍ ତୁମିମ୍‍ନ୍ ବେସି ରିସା ଅମ୍‍ଲାସ୍?

24ଲକାର୍‌ ମୁଉଁ ଦ୍‍କିକ୍‍ରି ବିଚାର୍‌ କ୍‍ରାନାଇ, ମ୍‍ତର୍ ଲକାର୍‌ ସ୍‌ତ୍ ବିଚାର୍‌ କ୍‍ରା।”

25ଯିରୁଶାଲମ୍‌ ସ୍‌ହରାର୍‌ କ୍‍ତେକ୍ ଲକ୍‍ମ୍‍ନ୍ କଇଲାଇ, “ଯାକେ ଯିହୁଦି ନେତାମ୍‍ନ୍ ମ୍‌ର୍‌ନେ ମାରୁକେ ଚେଷ୍ଟା କ୍‍ର୍‍ତିରିଲାଇ, ସେ ଇ ମାନାଇ କି?

26ଅବେ ଦ୍‌କା ସେ ସ୍‍ବୁଲକାର୍‌ ମୁଏ ଅତେକ୍ ସ୍‍ବୁକ୍‍ତା କ୍‌ମ୍‌ଲା, ମ୍‍ତର୍ ତାକେ ବିରଦ୍ କ୍‍ରି କେ ହେଁ ହ୍‍ଦେକ୍ କ୍‌ତା ନ୍‍କ୍‍ମ୍‍ଲାଇ, ଏ ଖ୍ରୀଷ୍ଟ ବ୍‍ଲି କାଇରି ସେମ୍‍ନ୍ ଜାଣି ଆତ୍‍ତି କି?

27ଜ୍‌ଡେବ୍‌ଳ୍ ଖ୍ରୀଷ୍ଟ ଆସେଦ୍ ସେ କୁଇତି ଆସେଦ୍ କେ ସେରି ଜାଣୁ ନାହାର୍‌ତି, ମ୍‍ତର୍ ଏ ମାନାଇ କୁଇତିହ୍‍ଣି ଆସିଆଚେ ସେରି ଅମିମ୍‍ନ୍ ବ୍‌ଲ୍‌ବାବେ ଜାଣୁଲୁ।”

28ଯୀଶୁ ମନ୍ଦିରେ ଶିକ୍ୟା ଦେତାବ୍‍ଳ୍ ବ୍‍ଡ୍ ଟଣ୍ତ୍‌କ୍‌ରି କଇଲା, “ମୁଇ କ୍ଇହ୍‍ଣି ଆସିଆଚି ତୁମିମ୍‍ନ୍ ଜାଣିଆଚାସ୍ କି? ମୁଇ ମର୍ ନିଜାର୍ ଅଦିକାରେ ନାସି, ମକେ ଯେ ହ୍‌ଟାଇଲା ଆଚେ ସେ ସ୍‌ତ୍, ତୁମିମ୍‍ନ୍ ତାକେ ନ୍‌ଜାଣାସ୍।

29ମୁଇ ତାକେ ଜାଣୁଲେ କାଇତାକ୍ ସେ ମକେ ହ୍‍ଟାଇ ଆଚେ ଆର୍ ମୁଇ ତାର୍ ଲ୍‌ଗେ ହ୍‍ଣି ଆସିଆଚି।”

30ଇକ୍‍ତା ଶୁଣି ସେମ୍‍ନ୍ ତାକେ ଦ୍‌ରୁକେ ଚେଷ୍ଟା କ୍‌ଲାଇ, ମ୍‍ତର୍ ତାକେ ଦ୍‍ର୍‍ତା ବେଳା ଆସି ନ୍‌ରିଲି ଲାଗି କେ ହେଁ ତାର୍ ଉହ୍‍ରେ ଆତ୍ ଦେମ୍‍ ନ୍‌ହାର୍‍ଲାଇ।

31ମ୍‍ତର୍ ଲକ୍ ମ୍‌ନ୍ଦାଇ ହ୍‍ଣି ଗାଦି ଲକ୍‍ମ୍‍ନ୍ ଯୀଶୁକେ ବିଶ୍‍ବାସ୍ କ୍‌ଲାଇ ଆର୍ କଇଲାଇ, ଖ୍ରୀଷ୍ଟ ଆଇଲେକ୍ ଇ ମାନାଇର୍ ତ୍ଇହ୍‍ଣି ଆରେକ୍‌ କ୍‍ତେକ୍ ଅଦିକ୍ ବ୍‍ଡ୍ ଚାନିଆକାମ୍‍ କ୍‍ରେଦ୍ କି?

32ଯୀଶୁର୍ ବିଷୟେ ଲକ୍‍ମ୍‍ନ୍ ଅନ୍‌କ୍‌ରି କ୍‌ତାବାର୍‍ତା ଅଉତି ରିଲାର୍ ଫାରୂଶୀମ୍‍ନ୍‍ ଶୁଣ୍‍ଲାଇ, ସେତାର୍‍ଗିନେ ସେମ୍‍ନ୍ ଆର୍ ମୁକିଆ ଜାଜକ୍ ଗଟେକ୍ ସ୍ଇନ୍‍ଦ୍‍ଳ୍ ଯୀଶୁକେ ବାନ୍ଦି ଆଣୁକେ ହ୍‌ଟାଇଲାଇ।

33ସେତାର୍‍ଗିନେ ଯୀଶୁ କଇଲା, “ମୁଇ ତୁମାର୍ ସ୍‍ଙ୍ଗ୍‍ ଆରେକ୍‌ ଅଳ୍‍କ୍ ସମୟ୍ ର୍‌ଇନ୍, ତାର୍ ହ୍‌ଚେ ମୁଇ ମର୍ ହ୍‌ଟାଇରିଲା ଉବାର୍ ଲ୍‌ଗେ ଲେଉଟି ଜାଇନ୍।

34ତୁମିମ୍‍ନ୍ ମକେ କଜାସ୍ ମ୍‍ତର୍ କଜୁ ନ୍‌ହାରାସ୍, ଆର୍ ମୁଇ ଜୁଇତି ର୍‌ଇନ୍ଦ ସେତିକେ ତୁମିମ୍‍ନ୍ ଜ୍‌ମ୍ ନ୍‌ହାରାସ୍।”

35ଯିହୁଦି ନେତାମ୍‍ନ୍ ତାକାର୍ ତାକାର୍ ବିତ୍‌ରେ କ୍ଉଆ କୁଇ ଅଇଲାଇ, “ସେ କ୍ଇ ଜାଇଦ୍, ଯେ ଅମିମ୍‍ନ୍ ତାକେ କଜୁ ନାହାରୁ? ଜୁଇ ଗ୍ରୀକ୍ ଦେଶେ ଅମାର୍ ନିଜାର୍ ଜାତିର୍‌ ଲକ୍‍ମ୍‍ନ୍ ଆତ୍‍ତି, ସେତିକେ ଜାଇଦ୍ ଆର୍ ସେମ୍‍ନ୍‍‍କେ ଶିକ୍ୟା ଦ୍‌ଇଦ୍ କି?

36ତୁମିମ୍‍ନ୍ ମକେ କଜାସ୍ ମ୍‍ତର୍ କଜୁ ନ୍‌ହାରାସ୍, ଆର୍ ମୁଇ ଜୁଇତି ର୍‌ଇନ୍ ସେତିକେ ତୁମିମ୍‍ନ୍ ଜ୍‌ମ୍ ନ୍‌ହାରାସ୍, ସେ ଇକ୍‍ତା କଇଲାର୍ ଅର୍ତ କାଇରି?”

37ହ୍‌ର୍‍ବାର୍ ସ୍‌ରାସ୍‌ରି ଦିନ୍ ଯୀଶୁ ଟିଆଅଇ ବ୍‍ଡ୍ ଟଣ୍ତ୍‌କ୍‌ରି କଇଲା, “ଯେ ଶସ୍ ଅଇଆଚେ ସେ ମର୍‍ଲ୍‌ଗେ ଆସିକ୍‍ରି ଡୁକ।

38ଦ୍‌ର୍‌ମ୍ ଶାସ୍‌ତର୍ ଲ୍‌ଗେ ଲେକା ଅଇଲିଆଚେ, ଯେ ମର୍‍ଲ୍‌ଗେ ବିଶ୍‍ବାସ୍ କ୍‍ରେଦ୍ ତାର୍ ହୁର୍‍ଦୟେ ହ୍‍ଣି ଜୀବନ୍ ଦେତା ଗଟେକ୍ ହାଜ୍‍ରା ହାଣି ବାରାଇଦ୍।”

39ଯୀଶୁ ପବିତର୍ ଆତ୍ମାର୍ ବିଷୟେ ଇକ୍‍ତା କଇଲା, ଜ୍‌ତେକ୍ ଲକ୍‍ମ୍‍ନ୍ ଯୀଶୁର୍ ଲ୍‌ଗେ ବିଶ୍‍ବାସ୍ କ୍‍ର୍‍ତିରିଲାଇ, ହ୍‌ଚେ ସେମ୍‍ନ୍ ପବିତର୍ ଆତ୍ମା ହାଇଲାଇ, କାଇତାକ୍ ଇଶ୍ୱର୍‌ ଯୀଶୁର୍ ମଇମାକେ ଦ୍‍କାଇ ନ୍‌ରିଲାକେ, ସେମ୍‌ନ୍‌ ପବିତର୍ ଆତ୍ମା ହାଇ ନ୍‌ରିଲାଇ।

40ଜ୍‌ଡେବ୍‌ଳ୍ ଲକ୍‍ମ୍‍ନ୍ ଇକ୍‍ତା ଶୁଣ୍‍ଲାଇ, ସ୍‌ଡେବ୍‌ଳ୍ ସେମ୍‍ନ୍‍କାର୍ ବିତ୍‌ରେ କ୍‍ତେକ୍ ଲକ୍ କଇଲାଇ, ସ୍‌ତ୍‌କ୍‌ରି, “ଏ ହ୍‌କା ସେ ବବିଶତ୍ କ୍‌ତା କ୍‌ଉତାଲକ୍।”

41ବିନ୍ ଲକ୍‍ମ୍‍ନ୍ କଇଲାଇ, “ସେ ଖ୍ରୀଷ୍ଟ।” ମ୍‍ତର୍ କେ କେ କଇଲାଇ, “କାଇରି ଗାଲିଲୀ ଜିଲାଇ ହ୍‍ଣି ମସିହା ବାରାମ୍ ହାରେ?”

42ଦ୍‌ର୍‌ମ୍ ଶାସ୍‌ତର୍ ଲ୍‌ଗେ କାଇରି ଇରି ଲେକାନାଇ, “ଖ୍ରୀଷ୍ଟ ଦାଉଦ୍ ର୍‍ଜାର୍ ବ୍ଉଁଶ୍ ଆର୍ ଦାଉଦାର୍‌ ଗାମ୍ ବେଥ୍‍ଲିହିମ୍ ସ୍‌ହରେ ଜ୍‍ର୍‍ନ୍‌ ଅଇଦ୍ ବ୍‌ଲି?”

43ସେତାକ୍ ଯୀଶୁର୍ ଗିନେ ଲକ୍‍ମ୍‍ନ୍‌କାର୍ ବିତ୍‌ରେ ବାଗ୍ ବାଗ୍ ଅଇଲି।

44ଆର୍ ସେମ୍‍ନ୍‍କାର୍ ବିତ୍‌ରେ କ୍‍ତେକ୍ ଲକ୍ ତାକେ ଦ୍‌ରୁକେ ଚେଷ୍ଟା କ୍‌ଲାଇ, ମ୍‍ତର୍ କେ ହେଁ ତାକେ ଆତ୍ ଦେମ୍‍ ନ୍‌ହାର୍‍ଲାଇ।

45ଶ୍‌ଇନ୍‍ମ୍‍ନ୍ ଲେଉଟି ଆଇଲେକ୍ ମୁକିଆ ଜାଜକ୍ ଆର୍ ଫାରୂଶୀମ୍‍ନ୍‍ ସେମ୍‍ନ୍‍‍କେ ହ୍‌ଚାର୍‌ଲାଇ, “କାଇତାକ୍ ତୁମିମ୍‍ନ୍ ତାକେ ଦ୍‍ରି ନ୍‌କେଲାସ୍?”

46ଶ୍‌ଇନ୍‍ମ୍‍ନ୍ ଉତର୍ ଦିଲାଇ, “ତାର୍ ହ୍‍ର୍ କେ କ୍‌ବେ ଅନ୍‌କ୍‌ରି ବ୍‍ୟଂକାର୍ ବାକ୍ୟ କ୍ଉତାର୍ ଅମିମ୍‍ନ୍ ନ୍‌ଶୁଣୁ।”

47ସେତାର୍‍ଗିନେ ଫାରୂଶୀମ୍‍ନ୍‍ ସେମ୍‍ନ୍‍‍କେ କଇଲାଇ, “ସେ କାଇରି ତୁମୁକ୍‌ମ୍‌ନ୍ ହେଁ ବକୁଆ କ୍‍ଲା?

48ଫାରୂଶୀମ୍‍ନ୍‍ କି ଅମାର୍ ନେତାମ୍‍ନ୍, କେ ହେଁ ଯୀଶୁର୍ ଲ୍‌ଗେ ବିଶ୍‍ବାସ୍ କ୍‌ଲାର୍ ତୁମିମ୍‍ନ୍ ଜାଣିଆଚାସ୍ କି?

49ମ୍‍ତର୍ ଇ ସ୍‌ବୁ ଲକ୍‍ମ୍‍ନ୍ ମୋଶାର୍ ବିଦିବିଦାନ୍ ବିଷୟେ ନ୍‍ଜାଣ୍‍ତି, ଇ ଲକ୍‍ମ୍‍ନ୍ ଇଶ୍ୱର୍‌ ଲ୍‌ଗେ ହ୍‍ଣି ଅବିଶାପ୍ ହାଇଲା ଲକ୍‍ମ୍‍ନ୍।”

50ସେଡେବ୍‍ଳ୍ ସେତି ନୀକଦିମ ନାଉଁର୍ ଗଟେକ୍ ଫାରୂଶୀରିଲା, ଯେ ଆଗ୍‍ତୁ ଗଟେତର୍ ଯୀଶୁକେ ଦ୍‌କୁକେ ଜାଇରିଲା,

51ସେ କଇଲା, “ଅମାର୍ ବିଦିବିଦାନ୍ ହର୍ ଗଟେକ୍ ଲକାର୍‌ କ୍‌ତା ନ୍‍ଶୁଣ୍‍ତା ଆଗେ କି ସେ କାଇରି କ୍‌ମ୍‌ଲା ନ୍‍ବୁଜ୍‍ତା ଆଗେ, କାକେ ଦସି କ୍‌ର୍‌ତା ନିୟମ୍ ନାଇ?”

52ବିନ୍ ଲକ୍‍ମ୍‍ନ୍ ତାକେ କଇଲାଇ, “ତୁଇ ହେଁ କାଇରି ଗାଲିଲୀ ଜିଲାର୍ ଲକ୍ କି? ବ୍‌ଲ୍‌କ୍‍ରି ଦ୍‌ର୍‌ମ୍ ଶାସ୍‌ତର୍ ହଡ୍ ତ୍‍ବେ ଗାଲିଲୀ ଜିଲାଇ ବବିଶତ୍ କ୍‌ତା କ୍‌ଉତାଲକ୍ ଜ୍‍ର୍‍ନ୍‌ ଅଇଦ୍ ବ୍‍ଲି କ୍ଇ ଲେକାନାଇ, ଇକ୍‍ତା ତୁଇ କଜିକ୍‌ରି ଦ୍‍କ୍।”

53ତାର୍ ହ୍‌ଚେ ସେ ସ୍‍ବୁ ଲକ୍‍ମ୍‍ନ୍ ତାକାର୍ ତାକାର୍ ଗ୍‍ରେ ଲେଉଟି ଗ୍‍ଲାଇ।

← Chapter 6 Jump to: Chapter 8 →