Leviticus 1

Chin (Mara Bible RV (BSI))

Jump to: Chapter 2 →

1Abeipa ta Mawsi aw ta, ahmaohna poh o tawhta bie a vaw chho ta, a hnohta,

2“Izarei sawzy chho la, ama hnohta hetana heta reih teh: Nama hry liata ahy rai ta Abeipa lâta hmo nama hlâ tita, viahchao hri nata mietaku zaw tawhta sahroh nama hlâ awpa a châ.

3“A hmohlâpa cha viahchao hri tawhta raopa hlâna a châ khiahta cha, a chapawpa seina hnei leipa a hlâ awpa a châ. A hmohlâpa cha Abeipa hmiakô liata a pyhpa a châ thei nawpa ta, ahmaohna poh o chhikao thaby liata a hlâ awpa a châ.

4Raopa hlâna luh chô liata a ku pahnieh aw ta, chatanachata ano chatlaina châta raopa hlâna cha ano vyuhpa ta a pyhpa a châ aw.

5Viahchao tôhpa cha Abeipa hmiakô liata thie aw ta, Arawna sawchapaw theihthaipazy ta a thisaih hlâ aw ei ta, ahmaohna poh o chhikao liata maisâh kâ zydua liata thisaih ama thia aw.

6Chatawhcha raopa hlâna sahroh cha a vo hlaih aw ta, a pachhaih aw.

7Theihthaipa Arawna sawchapawzy ta maisâh chô liata mei patih aw ei ta, mei chô liata tho ama pacho aw.

8Arawna sawchapaw theihthaipazy ta sa cha, a luh nata a thaw chhaota a vyuh vyuh ta paziah aw ei ta, chazy cha maisâh mei tho chô liata ama soh aw.

9A chhôrihzy nata a pheizy deikua cha, ti ta a pasi tua awpa a châ. Theihthaipa ta sa cha a zydua ta maisâh liata a rao aw. Cha cha ropahâhpa châta Abeipa lâta raopa hlâna, mei ta hmohlâpa a châ.

10“Raopa hlâna châta a hlâ awpa cha mietaku zaw hry liata mietaku tlyma, mie tlyma a châ khiahta cha, a chapawpa seina hnei leipa a hlâ awpa a châ.

11Maisâh kâ maw lâchhâh ta Abeipa hmiakô liata thie aw ta, Arawna sawchapaw theihthaipazy ta maisâh kâ zydua liata a thisaih ama thia aw.

12A sa cha a hlâtuhpa ta pachhaih aw ta, theihthaipa ta a luh nata a thaw chhaota maisâh mei tho chô liata a soh aw.

13A chhôrihzy nata a pheizy deikua cha, ti ta a pasi tua awpa a châ. Theihthaipa ta a zydua ta hlâ aw ta, maisâh liata a rao aw. Cha cha ropahâhpa châta Abeipa lâta raopa hlâna, mei ta hmohlâpa a châ.

14“ Abeipa lâta raopa hlâna ta a hlâ awpa cha pavaw hry tawhta a châ khiahta cha, vachhuh tlyma, pivaw taw tlyma a hlâ awpa a châ.

15Theihthaipa ta maisâh lâ cheih aw ta, a rao chamieh pachhô aw ta, a thisaih cha maisâh kâ liata pathlaoh aw ta, maisâh chô liata a rao aw.

16A hmi chhaota a daoh hlaih aw ta, maisâh kiapâh nochhi lâchhâh ta buchâh thyna su liata a thy aw.

17A mathlawzy chamieh pachhô aw ta, a pachhaih deikua pachhaih pathlah awpa châ vei. Hmohlâpa cha theihthaipa ta maisâh mei tho chô liata a rao aw. Cha cha ropahâhpa châta Abeipa lâta raopa hlâna, mei ta hmohlâpa a châ.

Jump to: Chapter 2 →