Leviticus 17

Chin (Mara Bible RV (BSI))

← Chapter 16 Jump to: Chapter 18 →

1Abeipa ta Mawsi hnohta,

2“Arawna nata a sawchapawzy nata Izarei saw zydua chho la, ama hnohta hetana heta reih teh. He he Abeipa biepiepa a châ:

3Izarei pathla ahy rai viahchao tôhpa tlyma, mietakutaw tlyma, mie tlyma, riehmo liata tlyma, riehmo khôtho lâ tlyma thie sala,

4Abeipa achhyna byureih hmiakô liata Abeipa lâta hmohlâpa ta hlâ awpa ta, ahmaohna poh o chhikao liata a vaw cheih leipa cha, thisaih a palopa ta pachâpa châ aw ta, a chô liata thisaih maoh a y aw. Cha chyhsa cha a phopi tawhta chhawh pathlahpa a châ aw.

5Izarei sawzy ta lyurâhpa liata atheihna ama hlâ tyhpazy kha, Abeipa lâta hlâ awpa ta, ahmaohna poh o chhikao liata theihthaipa lâta cheipa ta, aryhna hlâna atheihna châta Abeipa lâta ama hlâ thei nawpa ta, he ryhpa he taopa a châ.

6Theihthaipa ta ahmaohna poh o chhikao liata Abeipa maisâh chô liata thisaih thia aw ta, a thaw cha Abeipa châta ropahâhpa châta a rao aw.

7Amâ phei tyhna mie tôhpa khazohzy lâta atheihnazy ama hlâ awpa châ khao vei. Cha cha ama chhâ zydua châta chhâzaw bieraopa a châ aw.

8“Ama hnohta hetana heta reih via teh: Izarei pathla ahy tlyma, chihropa ama hry liata a pahrâpa ahy tlyma, raopa hlâna tlyma, atheihna tlyma hlâ sala,

9Abeipa lâta hlâ awpa ta ahmaohna poh o chhikao liata a vaw cheih leipa khiahta cha, cha chyhsa cha a phopi tawhta chhawh pathlahpa a châ aw.

10“Izarei pathla ahy tlyma, chihropa ama hry liata a pahrâpa ahy tlyma, thisaih kheihawhpa rai a niepa maih cha, cha thisaih a nietuhpa cha hiehâhpa ta moh aw na ta, a phopi tawhta ei chhawh pathlah aw.

11Sapa hrona cha thisaih liata y ta, cha cha nama hronazy chatlai nawpa ta, maisâh liata ei cha pie ei. Thisaih cha hrona châ ta, hrona chatlaina a tao theituhpa cha thisaih a châ.

12Chavâta Izarei sawzy hnohta, ‘Nama hry liata ahy hmahta thisaih nama nie awpa châ leipa ta, chihropa nama hry liata a pahrâpa ahy hmahta thisaih ama nie awpa châ vei,’ ei tahpa a châ.

13“Izarei saw tlyma, chihropa ama hry liata a pahrâpa tlyma, râh a khie sala, sa tlyma, pavaw tlyma, nie theipa chi a vaw phaoh khiahta cha, a thisaih palo aw ta, dohlei ta a khu awpa a châ.

14Hmohrohneipa to hrona cha a thisaih a châ. A thisaih cha a hrona a châ. Chavâta Izarei sawzy hnohta, ‘Kheihawhpa sa thisaih hmah nama nie awpa châ vei. Hmohrohneipa to hrona cha a thisaih châ tlôh ta, chavâta thisaih a niepa cha chhawh pathlahpa a châ aw,’ tahpa ta ei chho ei.

15“Ano kho ta a thipa tlyma, sa taipa tlyma a niepa cha, a râh chyhsa chhao, chihropa chhao, a chysiazy pasu aw ta, ti liata a ngai a si aw ta, zâlâ taih pathaih leipa a châ aw. Cha khai tawhta a pathaih aw.

16A chysiazy pasu leipa sala, a ngai â si vei khiahta cha, a paraona maoh a phaoh aw,” tah ta.

← Chapter 16 Jump to: Chapter 18 →