Leviticus 24

Chin (Mara Bible RV (BSI))

← Chapter 23 Jump to: Chapter 25 →

1Khazohpa ta Mawsi chho ta, a hnohta,

2“Meiôh cha khâ a khaih thei nawpa ta, ôli thaw saohpa pasohpa nâ lâta vaw cheih awpa ta Izarei sawzy hetana heta biepie teh:

3Ahmaohna poh o liata Biehrai Byh pohraipa khôtho liata, meiôh cha zâlâ tawhta my taihta Abeipa hmiakô liata pakhaih tyh awpa ta, Arawna ta soh tyh mawh sy. Cha cha nama chhâ vaw y lymâ awpazy châta chhâzaw bieraopa a châ aw.

4Meiôhzy cha ngôh suapa ta taopa meiôh sona chô liata Abeipa hmiakô ta khaih pazao awpa ta Arawna ta a soh tyh aw.

5“Viahdie dipa la aw chi ta, cha chata viahchhâ tlâ hrawh hleino na tao aw. Viahchhâ tlâ kha châta viahdie kachu su hrawh su no lymâ hmâ awpa a châ.

6Abeipa hmiakô liata tlâhkhai pathaihpa chô liata tlâh no ta paziah aw chi ta, tlâh kha liata viahchhâ tlâ charu lymâ ta na paziah aw.

7Viahchhâ chô liana cha, a tlâh no liata deiryh pasoh ngaitapa soh aw chi ta, cha cha viahchhâ vyuhpa ta atheithlâhna hmo châta châ aw ta, Abeipa lâta mei ta hmohlâpa a châ aw.

8Pahânoh maihta Arawna ta viahchhâ cha Abeipa hmiakô liata soh lymâ aw ta, cha cha Izarei sawzy tawhta ama chhâzaw biehrai châta ama piepa a châ aw.

9Cha cha Arawna nata a sawchapawzy tovyuh châ aw ta, Abeipa lâta mei ta hmohlâpazy tawhta chhâzaw châta ama tovyuh pathaihpa a châpa vâta, su pathaihpa liata ama nie awpa a châ,” tah ta.

10Chyhsa pakha, a nô Izarei chyhsa, a paw Izi chyhsa cha, Izarei sawzy yna lâ vawh ta. Cha Izarei chanô sawchapawpa nata Izarei chyhsa pakha cha riehmo liata a tu ei ta.

11Izarei chanô sawchapawpa chata Moh reipachhiepa ta chhie sa ta. Mawsi lâ a chhi ei ta, a nô moh cha Selômi châ ta, ano cha Dânâ chi Dibri sawchanô a châ.

12Abeipa pakah tawhta bie a puapa hâpa ta patâhna liata khô chy ei ta.

13Abeipa ta Mawsi hnohta,

14“Chhiesatuhpa kha riehmo khôtho lâ a chhi u la, a biereipa a theipa zydua ta a luh liata ama ku pahnieh ei sala, zawpi zydua ta alô ta vawh mawh ei sy.

15Izarei sawzy chho la, ama hnohta, ahy rai a Khazohpa chhie a sapa cha, a moleina maoh a phaoh aw.

16Abeipa moh a reipachhiepa cha thie thlyu awpa châ ta, zawpi zydua ta alô ta ama vawh awpa a châ. Chihropa chhao, a râh chyhsa chhao, Moh a reipachhie khiahta cha thie awpa a châ.

17“Thina taihta chyhsa chô liata ku a pathlapa cha thie thlyu awpa a châ.

18Thina taihta sahroh chô liata ku a pathlapa cha thô aw ta, sahroh vyuhpa ta sahroh a thô aw.

19Chyhsa ta a vaih hmah a paphao khiahta cha, a taopa hawhta a chô liata tao hra awpa a châ.

20Ru tliepa vyuhpa ta ru tliepa, mo vyuhpa ta mo, hâh vyuhpa ta hâh châ aw ta, chyhsa hmah a paphaopa hawhta, ano chhao hmah paphao awpa a châ.

21Sahroh a thiepa cha thô aw ta, chyhsa a thiepa cha ano chhao thie awpa a châ.

22Chihropazy châta nata a râh chyhsazy châta ryhpa â lyupa ta nama hnei awpa a châ. Kei he Abeipa nama Khazohpa ei châ,” tah ta.

23Cha hawhna chata Mawsi ta Izarei sawzy cha chho ta, chhiesatuhpa cha riehmo khôtho lâ a chhi ei ta, Mawsi hnohta Abeipa biepiepa hawhta Izarei sawzy ta tao ei ta, alô ta ama vawhsao haw.

← Chapter 23 Jump to: Chapter 25 →