Leviticus 21

Chin (Mara Bible RV (BSI))

← Chapter 20 Jump to: Chapter 22 →

1Abeipa ta Mawsi hnohta, “Arawna sawchapaw theihthaipazy chho la, ama hnohta hetana heta reih teh: Theihthaipa cha, a chiheihzy hry liata athihpa vâta â papuapalei awpa châ vei.

2A chhôhkha sipa, a nô tlyma, a paw tlyma, a sawchapaw tlyma, a sawchanô tlyma, a unawhpa tlyma,

3a sietanô laihsa kôpa tlyma tah leipa ta cha, athihpa vâta â papuapalei awpa châ vei. Dyhchâ leipa a sietanô laihsa kôpa vâta deikua cha â papuapalei thei aw.

4Theihthaipa cha a chiheihzy hry liata pawhrâh chaipa a châpa vâta, pathaih leipa ta a taopa ta, â papuapalei awpa châ vei.

5Theihthaipazy cha luh pôlôpa ta ama sâ amâ ngyu awpa châ leipa ta, ama kâhhmi kâ lâ ama tai awpa châ hra leipa ta, ama pôhpa ama â awpa châ vei.

6Ama Khazohpa châta ama pathaih awpa châ ta, ama Khazohpa moh ama papuapalei awpa châ vei. Khazohpa tovyuh a niepa châ ei ta, Abeipa lâta hmohlâpazy mei ta a hlâ tyhpa ama châpa vâta, ama pathaih awpa a châ.

7Theihthaipa cha a Khazohpa châta chyhsa pathaihpa a châpa vâta, âzuahnô tlyma, chanô papuapalei hapa tlyma ama hnei awpa châ vei. A vahpa nata a chhaihpa chanô chhao ama hnei awpa châ vei.

8Na Khazohpa viahchhâ a hlâpa a châpa vâta, na châta chyhsa pathaihpa ta na rao awpa a châ. Kei, Abeipa nâmo cha pathaisatuhpa he pathaih tlôh na ta, chavâta theihthaipa cha chyhsa pathaihpa ta na pachâ awpa a châ.

9Theihthaipa sawchanô ta a zuah sala, â papuapalei khiahta cha, a paw a papuapaleipa châ ta, mei ta raosao awpa a châ.

10“Theihthai beichaipa châ awpa ta a unawhzy hry tawhta panano hapa nata, a luh liata sathaw pathaihpa bao hapa nata theihthaipa chysia a tobi awpa ta panano hapa cha, a sâ a pathliah awpa châ leipa ta, a chysiazy a hrie awpa châ vei.

11Athihpa ri yna liata â ngia awpa châ leipa ta, a nô tlyma, a paw tlyma vâta chhao â papuapalei awpa châ vei.

12A Khazohpa ta a pananona sathawthuna a chô liata y tlôh ta, chavâta supathaihpa tawhta a pua awpa châ vei. Chataleipatala a Khazohpa supathaihpa a papuapalei pathlei aw. Kei he Abeipa ei châ.

13“Theihthaipa cha lapinô châta laihsa kôpa a hnei awpa a châ.

14Nôhmei tlyma, a vahpa nata a chhaihpa tlyma, chanô papuapalei hapa tlyma, âzuahnô tlyma a hnei awpa châ vei. Ano chiheih laihsa kôpa lapinô ta a hnei awpa a châ.

15Chatanachata a pathlazy cha a chiheihzy hry liata papuapalei leipa ta a y aw. Kei he Abeipa ano pathaisatuhpa cha ei châ,” tah ta.

16Abeipa ta Mawsi hnohta,

17“Arawna chho la, a hnohta hetana heta reih teh: ‘Chhâ vaw y lymâ awpa liata, na pathlazy hry liata a khaihly leipa cha, a Khazohpa viahchhâ hlâ awpa ta â hnia awpa châ vei.

18A khaihly leipa maih, mochaopa, pheisypa, hmia pizie doleipa, ku phei seih tupa,

19phei tliepa, ku tliepa,

20zôh kopa, heih a kho leipa mataw tupa, mo liata adoleina a hneipa, hmahchaku a hneipa, thachhâpa nata tihmô keipazy cha, ama Khazohpa viahchhâ hlâ awpa ta amâ hnia awpa châ vei.

21Theihthaipa Arawna pathla a khaihly leipa cha Abeipa lâta mei ta hmohlâpa hlâ awpa ta â hnia awpa châ vei. A khaihly leipa a châpa vâta, a Khazohpa viahchhâ hlâ awpa ta â hnia awpa châ vei.

22A Khazohpa viahchhâ pathaih chaipa nata hmo pathaihpazy cha a nie thei khai aw.

23A khaihly leipa a châpa vâta, pohraipa deikua siepahlie thei leipa aw ta, ei supathaihpazy a papuapalei lei nawpa ta, maisâh kiapâh lâ vawh thei aw vei. Kei he Abeipa âmo pathaisatuhpa ei châ,’” tah ta.

24Cha hawhna chata Mawsi ta Arawna nata a sawchapawzy nata Izarei saw zydua hnohta reih ta.

← Chapter 20 Jump to: Chapter 22 →