Leviticus 13 — Chin (Mara Bible RV (BSI))

1Abeipa ta Mawsi nata Arawna chho ta, ama hnohta,

2“Chyhsa ta a pôhpa vo thlohpa tlyma, hmahchaku tlyma, pakheihpa tlyma hnei sala, phawhpa hri a châ awpa hawhta a pôhpa vo liata â lâ khiahta cha, theihthaipa Arawna lâ tlyma, a sawchapawzy hry liata theihthaipa pakha lâ tlyma a chhi awpa a châ.

3Theihthaipa ta a pôhpa vo liata hri cha moh aw ta, hri yna liata hmi cha pawh sala, hri yna cha a pôhpa vo hlâta a thu viapa ta â lâ khiahta cha, phawhpa hri châ ta, theihthaipa ta ano cha moh aw ta, chyhsa pathaih leipa a châ tahpa a phuah aw.

4A pôhpa vo pakheihpa cha vaw râh ta, a vo hlâta a thu viapa ta a lâ leipa sala, a hmi a pawh leipa khiahta cha, hri ohtuhpa cha theihthaipa ta noh sari chhôh ânano ta a khawhlôh aw.

5A noh sarina noh ta, theihthaipa ta moh heih aw ta, a hri cha a ualua ta hmô sala, a kawh via leipa khiahta cha, theihthaipa ta noh sari ânano ta a khawhlôh via chy aw.

6A noh sarina noh ta, theihthaipa ta ano cha moh heih aw ta, pakheihpa cha lei laihpa ta, a vo liata a kawh laih leipa khiahta cha, theihthaipa ta ano cha pathaihpa ta a phuah aw. A hri ohpa cha riatha rakhapa châ ta, a chysiazy pasu aw ta, pathaihpa a châ aw.

7Pathaisa awpa ta theihthaipa â pamosa khai tawhta, riatha cha a vo liata a kawh lymâ khiahta deikua cha, theihthaipa â pamosa heih awpa a châ.

8Theihthaipa ta moh aw ta, riatha cha a vo liata a kawh lymâpa a hmô khiahta cha, theihthaipa ta ano cha pathaih leipa a châ tahpa a phuah aw. Cha cha phawhpa hri a châ.

9“Chyhsa ta phawhpa hri a oh khiahta cha, theihthaipa lâ a chhi awpa a châ.

10Theihthaipa ta moh aw ta, a vo thloh sala, cha chata a hmi papawhpa ta, a thlohpa liata a sapa â kaw palie khiahta cha,

11phawhpa hri pakâhpâpa a vo liata a ypa châ ta, theihthaipa ta ano cha pathaih leipa a châ tahpa a phuah aw. Pathaih leipa a châpa â lâ hapa vâta, ânano ta khawhlôh byuh aw vei.

12A vo râhpa cha kawh laih sala, theihthaipa hmô theipa rakha liata, hri ohtuhpa cha a vo zydua, a luh tawhta a phei taihta vo râhpa ta a bu khiahta cha,

13theihthaipa ta moh aw ta, vo râhpa ta a pôhpa zydua a bu khiahta cha, hri ohtuhpa cha a pathaih tahpa a phuah aw. A pôhpa duata a râh khai hapa vâta pathaihpa a châ.

14A sapa â kaw palie khiahta deikua cha, pathaih leipa a châ aw.

15Theihthaipa ta sapa a paliepa cha moh aw ta, cha chyhsa cha pathaih leipa a châ tahpa a phuah aw. Sapa a paliepa cha pathaih leipa, phawhpa hri a châ.

16Sapa a paliepa cha vaw pha ha sala, a vaw râh heih khiahta cha, theihthaipa lâ a pangai heih awpa a châ.

17Theihthaipa ta ano cha moh aw ta, hri cha a râh khiahta cha, theihthaipa ta hri ohtuhpa cha a pathaih tahpa a phuah aw. A pathaih hapa a châ.

18“Pôhpa vo liata kheihluh thla ta, tlâh ha ta,

19kheihluh yna su liata a râhpa ta a thlohpa tlyma, a saih tôlôhpa ta a pakheihpa tlyma a y khiahta cha, theihthaipa pamosa awpa a châ.

20Theihthaipa ta moh aw ta, vo hlâta a thu viapa ta a lâpa ta, a hmi a pawh khiahta cha, theihthaipa ta ano cha pathaih leipa ta a phuah aw. Phawhpa hri châ ta, kheihluh liata a vaw puapa a châ.

21Theihthaipa ta moh ta, hmi pawhpa y leipa sala, vo hlâta a thu via leipa ta, hmah cha a chawh laih khiahta cha, theihthaipa ta noh sari ânano ta a khawhlôh aw.

22Hmah cha vo liata a kawh laih khiahta deikua cha, theihthaipa ta ano cha pathaih leipa ta a phuah aw. Cha cha hri chhiepa a châ.

23A saih tôlôhpa ta a pakheihpa cha, a yna ualua liata y sala, a kawh via leipa khiahta cha, kheihluh hmahdawpa dei châ ta, theihthaipa ta ano cha pathaihpa ta a phuah aw.

24“Pôhpa vo liata mei kâna y sala, mei kâna sapa a paliepa cha a saih tôlôhpa ta tlyma, a râhpa ta tlyma a pakheih khiahta cha,

25theihthaipa ta moh aw ta, a pakheihpa liata hmi cha pawh sala, vo hlâta a thu viapa ta â lâ khiahta cha, phawhpa châ ta, mei kâpa liata â vaw luahpa a châ. Theihthaipa ta ano cha pathaih leipa ta a phuah aw. Cha cha phawhpa hri a châ.

26Châhrasala theihthaipa ta moh ta, pakheihpa liata hmi pawhpa y leipa sala, mei kâna hmah cha vo hlâta a thu via leipa ta, a chawh ha khiahta cha, theihthaipa ta noh sari chhôh ânano ta a khawhlôh aw.

27Theihthaipa ta noh sarina noh ta moh aw ta, hmah cha vo liata a kawh lymâ khiahta cha, theihthaipa ta ano cha pathaih leipa ta a phuah aw. Cha cha phawhpa hri a châ.

28Pakheihpa cha a yna ualua liata ypa ta, vo liata kawh laih leipa sala, a chawh laih khiahta cha, mei kâna thlohpa châ ta, theihthaipa ta ano cha a pathaih tahpa a phuah aw. Cha cha mei kâpa hmahdawpa dei a châ.

29“Chapaw tlyma, chanô tlyma ta, a luh liata tlyma, a kâh liata tlyma hri a hnei khiahta cha,

30theihthaipa ta hri cha moh aw ta, vo hlâta a thu viapa ta a lâ sala, hmi di maihpa a y khiahta cha, theihthaipa ta ano cha pathaih leipa ta a phuah aw. Pathapa hri châ ta, luh nata kâh liata phawhpa hri a châ.

31Theihthaipa ta pathapa hri cha moh aw ta, vo hlâta a thu via leipa ta a lâ sala, hmi vyhpa a y leipa khiahta cha, theihthaipa ta pathapa hri a hneituhpa cha noh sari chhôh ânano ta a khawhlôh aw.

32A noh sarina noh ta, theihthaipa ta hri cha moh aw ta, pathapa hri cha kawh leipa sala, hmi maihpa y leipa ta, pathapa hri cha vo hlâta â thu via leipa khiahta cha,

33a kâhhmi a ngyu aw ta, pathapa hri yna hmi deikua cha a ngyu awpa châ vei. Theihthaipa ta pathapa hri a hneipa cha noh sari ânano ta a khawhlôh via aw.

34A noh sarina noh ta, theihthaipa ta pathapa hri cha moh heih aw ta, pathapa hri cha vo liata kawh leipa sala, vo hlâta a thu viapa ta â lâ leipa khiahta cha, theihthaipa ta ano cha pathaihpa ta a phuah aw. A chysiazy pasu aw ta, chatanachata a pathaih aw.

35Pathaisapa a châ khai tawhta, pathapa hri a vo liata a kawh laih khiahta cha,

36theihthaipa ta a moh heih awpa a châ. Pathapa hri cha vo liata a kawh laih khiahta cha, hmi maihpa a y ma tahpa theihthaipa ta a mo awpa byuh vei. Pathaih leipa a châ.

37Pathapa hri cha a yna ualua liata a ypa ta hmô sala, hmi vyhpa a kaw thao khiahta deikua cha, pathapa hri cha a tlâh hapa châ ta, a pathaih hapa a châ. Theihthaipa ta ano cha pathaihpa ta a phuah aw.

38“Chapaw tlyma, chanô tlyma, a pôhpa vo liata pakheihpa y sala, pakheihpa cha a râhpa a châ khiahta cha,

39theihthaipa ta moh aw ta, a pôhpa vo liata pakheihpa cha phiephuh râhpâh dei a châ khiahta cha, pakheih chakhyhpa vo liata a vaw puapa châ ta, ano cha a pathaih.

40“Chyhsa a sâ a py khai ha khiahta cha, luh pôlôpa châ ta, châhrasala pathaihpa a châ.

41A khi sâ a py khai ha khiahta cha, khi tlyhpa châ ta, châhrasala pathaihpa a châ.

42A luh pôlôpa liata tlyma, a khi tlyhpa liata tlyma, pakheihpa saih tôlôhpa a kaw pua khiahta cha, a luh pôlôpa liata tlyma, a khi tlyhpa liata tlyma phawhpa hri a vaw puapa a châ.

43Theihthaipa ta moh aw ta, a luh pôlôpa liata tlyma, a khi tlyhpa liata tlyma hri a kaw puapa cha, pôhpa vo liata phawhpa a vaw lâpa hawhta saih tôlôhpa ta a kaw pua khiahta cha,

44chyhsa phawhpa châ ta, pathaih leipa a châ. A luh liata a hri a ypa châ ta, theihthaipa ta ano cha pathaih leipa ta a phuah thlyu awpa a châ.

45“Phawhpa hri a ohpa cha chysia a hriepa a ky aw ta, a sâ pathliah aw ta, a hmao chô lâ khu aw ta, ‘Pathaih leipa, pathaih leipa,’ tahpa ta a awh awpa a châ.

46Hri a oh chhôh zydua pathaih leipa a châ. A pathaih leipa vâta, ânano ta y aw ta, a y nawpa su cha riehmo khôtho lâ a châ aw.

47“Sahmi chysia liata tlyma, pala rih dipa chysia liata tlyma, chysia liata phawhpa hri a kia khiahta cha,

48sahmi chysia nata pala rih dipa chysiazy sana thaitôh nata thaipheih liata zy, savo nata savo ta taopa hmobaoh liata zy,

49phawhpa hri y sala, cha hri cha chysia liata tlyma, savo liata tlyma, thaitôh liata tlyma, thaipheih liata tlyma, savo ta taopa hmobaoh liata tlyma, a rôh hrohpâpa ta tlyma, saihpâpa ta tlyma ta â vaw lâ khiahta cha, phawhpa hri châ ta, theihthaipa pamosa awpa a châ.

50Theihthaipa ta hri cha moh aw ta, hri kiapa hmo cha noh sari chhôh ânano ta a khawhlôh aw.

51A noh sarina noh ta, hri cha moh aw ta, chysia liata tlyma, thaitôh liata tlyma, thaipheih liata tlyma, savo liata tlyma, savo cha kheihawhpa châ rai ta hmâpa a châpa chhao ta, a kawh lymâ khiahta cha, hri cha phawhpa hri a paka theipa châ ta, pathaih leipa a châ.

52Chysia tlyma, sahmi pala tlyma, pala rih dipa tlyma, thaitôh tlyma, thaipheih tlyma, savo ta taopa hmobaoh kheihawhpa tlyma, phawhpa hri ta a kiapa maih cha, mei ta rao awpa a châ. Phawhpa hri cha a kawh theipa chi a châpa vâta, mei ta rao thlyu awpa a châ.

53“Theihthaipa ta moh aw ta, hri cha chysia liata tlyma, thaitôh liata tlyma, thaipheih liata tlyma, savo ta taopa hmobaoh liata tlyma, a kawh laih leipa khiahta cha,

54theihthaipa ta hri kiana hmo cha pasi awpa ta bie pie aw ta, noh sari ânano ta a khawhlôh via heih aw.

55Hri ta a kiapa hmo cha, pasi khaipa a châ tawhta, theihthaipa ta moh heih aw ta, phawhpa hri ta a chhôh lâ tlyma, a chô lâ tlyma rai kia ha sala, hri cha a kawh leipa chhao ta, a rôh â nano leipa khiahta cha, pathaih leipa châ ta, mei ta na rao awpa a châ.

56“Theihthaipa ta moh ta, hri yna cha pasi khaipa a châ tawhta, a rôh a lei khiahta cha, hri yna su cha chysia tawhta tlyma, savo tawhta tlyma, thaitôh tawhta tlyma, thaipheih tawhta tlyma a hrie pathlah awpa a châ.

57Hri cha chysia liata tlyma, thaitôh liata tlyma, thaipheih liata tlyma, savo ta taopa hmobaoh liata tlyma â vaw luah heih khiahta cha, a paka hapa châ ta, hri ta a kiapa hmo cha mei ta na rao awpa a châ.

58Chysia tlyma, thaitôh tlyma, thaipheih tlyma, savo ta taopa hmobaoh tlyma, na pasi khai tawhta hri ta a paisai khiahta cha, a einona ta pasi heih awpa châ ta, chatanachata a vaw pathaih aw.”

59“Cha cha sahmi chysia liata tlyma, pala rih dipa chysia liata tlyma, thaitôh liata tlyma, thaipheih liata tlyma, savo ta taopa hmobaoh liata tlyma, phawhpa hri a y tita, a pathaih nata pathaih lei phuah nawpa ryhpa a châ,” tah ta.