Numbers 17

Chin (Mara Bible RV (BSI))

← Chapter 16 Jump to: Chapter 18 →

1Abeipa ta Mawsi hnohta,

2“Izarei sawzy hetana heta chho teh: Izarei chi hrawh hleino chhituhpazy tawhta, chi kha tawhta chôchahrei miakha lymâ ta, chôchahrei mia hrawh hleino la aw chi ta, ama chôchahrei chyu liata ama moh na roh khai aw.

3Livai chi chôchahrei liata Arawna moh na roh aw. Cha hawhna chata chi chhituhpazy châta chôchahrei miakha chyu a y aw.

4Chazy cha ahmaohna poh o liata eimâ hmô tyhna Biehrai Byh hmiakô liata na soh aw.

5Ei tlyhpa chyhsa chôchahrei cha a chhyh kaw thao aw ta, chatanachata Izarei sawzy paphôhna, na chô liata ama paphôhna cha ei padia aw,” tah ta.

6Cha hawhna chata Mawsi ta Izarei sawzy cha chho ta. Ama chhituhpazy ta chôchahreizy a hnohta vaw pie ei ta, chhituhpa pakha ta chôchahrei miakha lymâ ta, ama chi yzie hawhta chôchahrei mia hrawh hleino pie ei ta. Arawna chôchahrei chhao ama chôchahreizy hry liata â hlao hra.

7Mawsi ta chôchahreizy cha Biehrai Byh poh o chhôh liata Abeipa hmiakô ta soh ta.

8A mylâ ta Mawsi cha Biehrai Byh poh o lâ vawh ta, Livai chi Arawna chôchahrei cha a chhyh kaw thao ta, a pawzy pabyuh ta, a pawzy pakaipa ta, kuasâh thei hmohpazy a patheipa hmô ta.

9Mawsi ta chôchahrei zydua cha Abeipa hmiakô tawhta Izarei sawzy lâ pua khei ta, moh ei ta, chyhsazy ta ama chôchahrei chyu a la ei ta.

10Abeipa ta Mawsi hnohta, “Arawna chôchahrei kha Biehrai Byh hmiakô liata soh pathi teh. Chyhsa chakhia hmâhpa sawzy ama châ tahpa ngiana châta châ aw ta, chatanachata eina chakhiana ei cha padia aw chi ta, thi aw veih ei,” tah ta.

11Cha hawh chata Mawsi ta tao ta, Abeipa ta bie a piepa hawh tlai ta a tao.

12Izarei sawzy ta Mawsi hnohta, “Moh teh, eima leidia ha hih! Paraopa châ pi ta, eima zydua ta paraopa eima châ ha hih.

13Ahy rai Abeipa achhyna byureih a vaw hniapa maih ama thi lymâ aw he zaw! Eima zydua ta thi khai dâhdei khiah pi maw?” tah ei ta.

← Chapter 16 Jump to: Chapter 18 →