Numbers 25

Chin (Mara Bible RV (BSI))

← Chapter 24 Jump to: Chapter 26 →

1Siti liata Izarei a y nota, Izarei sawzy ta Môabâ chanôzy sihryhkhei ei ta.

2Chanôzy ta ama khazohzy lâta atheihna hlânazy liata Izarei sawzy cha hrua ei ta. Izarei sawzy ta atheihnazy cha niepa ta, Môabâ khazohzy lâta a bôh ei ta.

3Cha hawhna chata Izarei ta Peô liata Bâlâ nata azaona tao ta. Chavâta Izarei chô liata Abeipa pathi ia ta.

4Abeipa ta Mawsi hnohta, “Izarei phopi chhituhpa zydua a chhi la, Abeipa pathiiana ru ngaitapa he Izarei chô tawhta a pai nawpa ta, âmo cha Abeipa hmiakô liata nohchhô sawhvaw ta paaosao teh,” tah ta.

5Chatanachata Mawsi ta Izarei ryureituhpazy hnohta, “Peô liata Bâlâ nata azaona a taopa nama chyhsazy kha, nâmo tlai ta thie khai teh u,” tah ta.

6Ahmaohna poh o chhikao liata ama cha hai nota, Izarei chyhsa pakha ta Midia chanô pakha Mawsi mohmô nata Izarei zawpi mohmô liata a o lâ a vaw chhi ta.

7Theihthaipa Arawna sawchapawpa Eliaza sawchapawpa Phinehâ ta a hmô nahta, thyu ta, asei a la ta, zawpi hry tawhta pua ta.

8Izarei chyhsa cha poh o chhôh lâ a ngiahnao ta, Izarei chyhsa nata chanô cha ama pano ta ama py liata a chô ta. Chatanachata potlana cha Izarei sawzy tawhta a pai haw.

9Potlana liata a thipa zydua 24,000 ama châ.

10Abeipa ta Mawsi hnohta,

11“Theihthaipa Arawna sawchapawpa Eliaza sawchapawpa Phinehâ ta Izarei chô liata ei hiehâhna a papai haw. Ama chô liata ei hiatliana liata ano chhao a hia eina tliakhei hrapa vâta, ei hiatliana ta Izarei sawzy cha pahleipadia khao aw va na.

12Chavâta a hnohta hetana heta chho teh, ‘A hnohta adyhna biehrai ei tao aw.

13A Khazohpa châta a hiatlia ta, Izarei sawzy châta chatlaina a taopa vâta, cha cha ano nata a hnôhlâ ta a pathlazy châta chhâzaw ta theihthaipa châna biehrai a châ aw,’” tah ta.

14Izarei chyhsa ama thiepa, Midia chanô nata hmaohkha ama thiepa moh cha Salu sawchapawpa Zimri châ ta, Simeôna chi liata pho kha hyutuhpa a châ.

15Midia chanô ama thiepa moh cha Zuri sawchanô Kôzabi châ ta, Midia chi liata pho kha hyutuhpa sawchanô a châ.

16Abeipa ta Mawsi hnohta,

17“Midia mo kha ama nô papo u la, thie teh u.

18Peô kyh liata cha dôveipa ta nama nô cha papo ei ta. Peô vâta potlana a y nota ama sietanô Kôzabi, Midia hyutuhpa sawchanô cha thiepa châ ta, cha kyh liata chhao piehpie ngaitapa ta châ dôveituhpa ama châ,” tah ta.

← Chapter 24 Jump to: Chapter 26 →