Numbers 36

Chin (Mara Bible RV (BSI))

← Chapter 35 Jump to:

1Zawsi sawchapawpa Manase chi Mâkhi pathla Kilia pho hyutuhpazy a vaw hnia ei ta, Mawsi nata Izarei pathla chhituhpazy hmiakô liata bie reih ei ta,

2ama hnohta, “ Abeipa ta ei zibeipa hnohta, nuby padaosapa ta Izarei sawzy ama ryuto râh pie awpa ta bie cha pie ta, eima unawhpa Zelôphehâ ryuto râh chhao a sawchanôzy hnohta pie awpa ta Abeipa ta ei zibeipa hnohta bie a cha pie hra.

3Cha chanôzy chata Izarei chihropa sawchapawzy ama hnei khiahta deikua cha, ama ryuto râh cha miah pathlatuhpazy ryuto râh tawhta lapa châ aw ta, ama dyhchâna chi ryuto râh liata pahlyhpa a châ aw. Chatanachata eima ryuto râh châta nuby eimâ daopa eima pahlei aw.

4Izarei sawzy zubili kô a vaw tlô tita, Zelôphehâ sawchanôzy ryuto râh cha, ama dyhchâna chi ryuto râh liata pahlyhpa a châ aw. Ama ryuto râh cha lapa châ aw ta, miah pathlatuhpazy ryuto râh cha pachhaihpa a châ aw,” tah ei ta.

5Mawsi ta Abeipa bie hawhta Izarei sawzy cha piepa ta, ama hnohta, “Zawsi pathla chi bie reipa he bie dopa a châ.

6Zelôphehâ sawchanôzy kyh liata Abeipa biepiepa cha hetana heta a châ: ‘Ama kho chaipazy hnei aw ei ta, anodeikua ama paw chi pho liata chapawzy ama hnei awpa a châ.

7Izarei sawzy ryuto cha chi kha tawhta chihropa lâ pasie awpa châ vei. Izarei saw zydua ta ama pathlatuhpa chi ryuto râh ama hnei pazao lymâ aw.

8Izarei saw ahy rai ta a pathlatuhpazy ryuto râh a hnei lymâ thei nawpa ta, Izarei chizy liata ryuto râh a hneipa sawchanô maih cha, a paw chi nata pho chyhsa lapinô a châ awpa a châ.

9Izarei chi ryuto râh cha, chihropa lâ â pasie awpa châ vei. Izarei saw chi to ta ama ryuto râh chyu ama hnei lymâ awpa a châ’” tah ta.

10Abeipa ta Mawsi bie a piepa hawhta, Zelôphehâ sawchanôzy ta tao ei ta,

11Mâhlâ, Tizah, Hôkalâ, Milkâ nata Nôah zy ta ama paw unawhzy sawchapawzy cha vahpa ta ama hnei chyu.

12Zawsi sawchapaw Manase pathlazy cha vahpa ta hnei ei ta, chatanachata ama ryuto râhzy cha ama paw chi nata pho ryuto râh ta a y lymâ.

13Chazy cha Abeipa ta Mawsi hmâpa ta Zerikô dady Zawdâh haosâ Môabâ bypi liata Izarei sawzy hnohta a piepa biepiepazy nata ryhpazy a châ.

← Chapter 35 Jump to: