Numbers 3

Chin (Mara Bible RV (BSI))

← Chapter 2 Jump to: Chapter 4 →

1Hezy he Abeipa ta Sinai Tlâh liata Mawsi bie â chho nota, Arawna nata Mawsi pathla a ypazy ama châ.

2Hezy he Arawna sawchapawzy moh a châ: Sawchapaw uhtheipa cha Nâdâ châ ta, a pazipazy cha Abihu, Eliaza nata Ithamâ zy ama châ.

3Chazy cha Arawna sawchapawzy moh châ ta, âmo cha sathawthupa theihthaipazy châ ei ta, theihthaipa chakaona rai hria awpa ta chahnaopazy ama châ.

4Nâdâ nata Abihu cha, mei ta hlâlei awpa chi Sinai râhchawhpa liata Abeipa hmiakô ta ama hlâ nota, Abeipa hmiakô liata thi ha ei ta, saw hnei veih ei. Chavâta ama paw Arawna hro chhôh cha, Eliaza nata Ithamâ ta theihthaipa chakaona rai ama hria lymâ.

5Abeipa ta Mawsi chho ta,

6“Livai chizy a vaw chhi la, theihthaipa Arawna ama chakao thei nawpa ta âmo cha a hmiakô liata paysa mah y.

7Âmo ta theihthaipa Arawna nata zawpi zydua chakaona rai ahmaohna poh o hmiakô liata hria aw ei ta, achhyna byureih chakaona rai ama hria aw.

8Ahmaohna poh o hmobaoh zydua a vao aw ei ta, achhyna byureih chakaona rai hriapa ta Izarei sawzy ama mohôh aw.

9Livai pathlazy cha Arawna nata a sawchapawzy hnohta na pie aw ei. Âmo cha Izarei sawzy hry tawhta Arawna hnohta pie khaipa ama châ.

10Arawna nata a sawchapawzy cha theihthaipa châta rao aw chi ta, ama theihthai châna ama pazao lymâ aw. Khôtho chyhsa ta theihthaipa chakaona rai hria awpa ta achhyna byureih â hnia khiahta cha, thie awpa a châ,” tah ta.

11Abeipa ta Mawsi chho ta,

12“Pachâ teh, Livai pathlazy cha Izarei sawzy hry liata chhi a pahy tuapa sawchapaw uhtheipazy vyuhpa ta Izarei sawzy tawhta ei lapazy ama châ. Chavâta Livai pathlazy cha kei eih ama châ aw.

13Sawchapaw uhtheipa zydua cha kei eih ama châ. Izi râh liata sawchapaw uhtheipa zydua ei thie khai nona khata, Izarei sawzy hry liata sawchapaw uhtheipazy deikua cha, chyhsapa chhao sahroh chhao, ei châta ei pathaisa ei. Chavâta kei eih ama châ aw. Kei he Abeipa ei châ,” tah ta.

14Abeipa ta Sinai râhchawhpa liata Mawsi hnohta,

15“Livai pathlazy a pho pho ta nata a chhôh chhôh ta ama maluh reih la, chapaw thla kha tawhta chô lâ zydua reih khai mah y,” tah ta.

16Chatanachata Mawsi ta Abeipa bie hawhta, a hnohta biepiepa hawh tlai ta, ama maluh cha reih ta.

17Hezy he Livai sawchapawzy moh a châ: Kesao, Kôhâ nata Merâri.

18Hezy he ama pho ta a laichadaipa ta Kesao sawchapawzy moh a cha: Libni nata Simei.

19Kôhâ sawchapawzy cha ama pho ta a laichadaipa ta Amrâ, Iza, Hebraw nata Uzie zy ama châ.

20Merâri sawchapawzy cha, ama pho ta a laichadaipa ta, Mâhli nata Musi zy ama châ. Chazy cha a chhôh chhôh ta a laichadaipa ta Livai phozy ama châ.

21Kesao cha Libni pho nata Simei phozy pathlatuhpa châ ta, hezy he Kesao pathlazy ama châ.

22Chapaw thla kha tawhta chô lâ maluh reipa zydua 7,500 ama châ.

23Kesao phozy cha achhyna byureih hnôh lâta notla baih lâta ama poh o rai aw ei ta,

24Kesao pathlazy hyutuhpa cha Lâe sawchapawpa Eliasaphâ a châ aw.

25Kesao sawchapawzy ta ahmaohna poh o liata ama mohôh awpazy cha, achhyna byureih, poh o nata khuna pohzy, ahmaohna poh o chhikao pohraipazy,

26dôhpachhôh tlyhmia pohraipazy, achhyna byureih kiapâh liata dôhpachhôh tlyhmia chhikao nata maisâh chadôpa ta pohraipazy nata chaorizy châ aw ta, chazy nata a zaokhipa chakaona rai zydua chhao ama hria khai aw.

27Kôhâ cha Amirâ pho zy, Izah pho zy, Hebraw pho nata Uzie phozy pathlatuhpa châ ta, hezy he Kôhâ pathlazy ama châ.

28Chapaw thla kha tawhta chô lâ maluh zydua 8,600 châ ei ta, âmo cha su pathaihpa mohôhtuhpa ama châ aw.

29Kôhâ sawchapawzy tawhta pho a puapazy cha achhyna byureih chho lâ chhâh ta ama poh o rai aw ei ta,

30Kôhâ pathla phozy hyutuhpa cha Uzie sawchapawpa Elizaphâ a châ aw.

31Ama mohôh awpazy cha Biehrai Byh, tlâhkhai, meiôh sona, maisâh, supathaihpa liata theihthaipa chakaona chhaichhizy nata pohraipa zy châ aw ta, chazy nata a zaokhipa chakaona rai zydua ama mohôh khai aw.

32Theihthaipa Arawna sawchapawpa Eliaza cha Livai chi hyutuhpazy hyutuhpa châ aw ta, supathaihpa mohôhtuhpazy mohôhtuhpa a châ aw.

33Merâri cha Mâhli pho nata Musi phozy pathlatuhpa châ ta, hezy he Merâri pathlazy ama châ.

34Chapaw thla kha tawhta chô lâ maluh reipa zydua 6,200 ama châ.

35Merâri pathlazy hyutuhpa cha Abihai sawchapawpa Zurie châ aw ta, âmo cha achhyna byureih maw lâ chhâh ta ama poh o ama parai aw.

36Merâri sawchapawzy ta ama mohôh awpazy cha achhyna byureih thophiazy, a tlâhzy, a tôhzy, a patyunazy nata chazy châta a chhaichhi zydua châ aw ta, chazy nata a zaokhipa chakaona zydua ama mohôh aw.

37Tlyhmia dôhna tôhzy, a patyunazy, a khaipânazy nata a chaorizy chhao ama mohôh aw.

38Nochhi lâ chhâh ta achhyna byureih hmia lâ, ahmaohna poh o laihmia lâta noh vaw chhi tyhna dady ta poh o a parai awpa cha, Mawsi nata Arawna nata a sawchapawzy châ aw ei ta, âmo ta supathaihpa mohôh aw ei ta, Izarei sawzy ama mohôh aw. Khôtho chyhsa theihthaipa chakaona rai hria awpa ta achhyna byureih a hniapa maih cha thiepa a châ aw.

39Abeipa biepiepa hawhta, Mawsi nata Arawna ta Livai chizy cha a chhôh chhôh ta ama maluh reih ei ta, chapaw thla kha tawhta chô lâ ama reipa zydua cha 22,000 ama châ.

40Abeipa ta Mawsi hnohta, “Izarei sawzy hry liata sawchapaw uhtheipa thla kha tawhta chô lâ zydua reih la, ama moh roh khai teh.

41Izarei pathla sawchapaw uhtheipazy vyuhpa ta Livai pathlazy na lapa aw chi ta, Izarei sawzy sahroh pataw tuapazy vyuhpa ta Livai sahrohzy eina lapa aw chi. Kei he Abeipa ei châ,” tah ta.

42Mawsi ta Abeipa biepiepa hawhta Izarei sawzy hry liata sawchapaw uhtheipa zydua reih ta.

43Thla kha tawhta chô lâ sawchapaw uhtheipa zydua maluh, ama moh paziahpa tlai ta reipa zydua cha, 22,273 ama châ.

44Abeipa ta Mawsi chho ta,

45“Izarei pathla sawchapaw uhtheipazy vyuhpa ta Livai pathlazy la la, ama sahroh vyuhpa ta Livai pathlazy sahroh la mah y. Livai pathlazy cha kei eih ama châ aw. Kei he Abeipa ei châ.

46Izarei sawzy hry liata sawchapaw uhtheipazy maluh cha Livai chi maluh hlâta 273 ta a hluh viapa vâta, âmo chatlai nawpa ta,

47pakha châta sekel tlaw pangawh lymâ la aw chi ta, sekel reizie cha supathaihpa sekel reizie châ aw ta, kerâ miakih ta sekel tlaw kha reizie hawhta a châ aw.

48Izarei saw hluh viapazy chatlaina sôh cha Arawna nata a sawchapawzy na pie aw ei,” tah ta.

49Livai chi maluh ta a chatlai theipa hlâta hluh viapa sawchapaw uhtheipazy chatlaina sôh cha Mawsi ta la ta.

50Supathaihpa tâkâ reizie ta reipa ta, Izarei sawchapaw uhtheipazy chatlaina sôh sekel 1,365 pakhy ta.

51Abeipa bie hawhta, Abeipa ta Mawsi bie a piepa hawh tlai ta, Mawsi ta chatlaina sôh cha Arawna nata a sawchapawzy hnohta hlâ ta.

← Chapter 2 Jump to: Chapter 4 →

Recommended Reading

Commentary Numbers Commentaries → Devotional Numbers Devotional Guide → Get This Bible BSI Study Bible →