Numbers 27

Chin (Mara Bible RV (BSI))

← Chapter 26 Jump to: Chapter 28 →

1Zelôphehâ sawchanôzy a vy ei ta. Zelôphehâ cha Hepha sawchapawpa châ ta, Hepha cha Kilia sawchapawpa châ ta, Kilia cha Mâkhi sawchapawpa châ ta, Mâkhi cha Manase sawchapawpa châ ta, Manase cha Zawsi sawchapawpa a châ. Zelôphehâ sawchanôzy cha Mâhlâ, Noâh, Hôkalâ nata Tizah zy ama châ.

2Mawsi nata theihthaipa Eliaza nata beimachâzy nata zawpi zydua hmiakô liata ahmaohna poh o chhikao liata a kei duah ei ta, ama hnohta,

3“Eima paw cha râhchawhpa liata thi ha ta, Abeipa a dyuh awpa ta a paraohpa ta a hmaohpakhypa Kôrâ py liata deikua a hlao vei. Ano moleina vâ tlai ta a thipa a châ. Sawchapaw hnei vei.

4Sawchapaw a hnei leipa vâta, khazia eima paw moh cha a phoheihzy hry tawhta a lei aw? Eima paw unawhzy hry liata ryuto miah pie hra teh u,” tah ei ta.

5Mawsi ta ama bie cha Abeipa hmiakô liata tlôkhei ta.

6Abeipa ta Mawsi hnohta,

7“Zelôphehâ sawchanôzy reipa cha hmo dopa a châ. Ama paw unawhzy hry liata ama ryuto râh na pie hra awpa ei châ ta, ama paw ryuto râh cha âmo na pie awpa ei a châ.

8Izarei sawzy hnohta, ‘Chyhsa ta sawchapaw hnei leipa ta a thi khiahta cha, a ryu cha a sawchanô nama pie awpa a châ.

9Sawchanô a hnei vei khiahta cha, a ryu cha a unawhzy nama pie awpa a châ.

10Unawh a hnei vei khiahta cha, a ryu cha a paw unawhzy nama pie awpa a châ.

11A paw ta unawhzy a hnei vei khiahta cha, a ryu cha a pho liata a heinawh a hnia chaipa pie aw ei chi ta, ano ta a pakhy aw. Abeipa ta Mawsi bie a piepa hawhta, cha cha Izarei sawzy châta pachiana ryhpa a châ aw,’ tah mah y,” tah ta.

12Abeipa ta Mawsi hnohta, “Abari tlâh lâ khi khy la, Izarei sawzy ei piepa râh cha kaw sai mah y.

13Na hmô khai tawhta, na unawhpa Arawna a chiheihzy hnohta pahlyhpa a châpa hawhna khata, nâ chhao na chiheihzy hnohta pahlyhpa na châ aw.

14Zini râhchawhpa liata zawpi ta einâ dyuh no ei ta, nâmo pano chhao ei biepiepa a dyuh hra ei chi ta, tizy kiah liata zawpi hmiakô liata eina palyupalih leipa vâ ei chi ta a châ,” tah ta. Cha tizy cha Zini râhchawhpa liata Kâdesâ liata Meribâ tizy a châ.

15Mawsi ta Abeipa hnohta,

16“Zawpizy he chhihtha awpa ta, Abeipa, chyhsa zydua thlahpa Khazohpa ta chyhsa pakha rao mawh sy.

17Ano chata zawpizy hmia lâta pua aw ta, a tlôkhei aw ei. Zawpizy chhihtha aw ta, â ngiakhei aw ei. Chatanachata Abeipa chyhsa zawpizy cha vaituhpa hnei leipa mietaku hawhta y aw veih ei,” tah ta.

18Abeipa ta Mawsi hnohta, “Nunâ sawchapawpa Zawsua, thlahpa ta a ylâhpa chyhsa kha a chhi la, a chô liata na ku pahnieh mah y.

19Theihthaipa Eliaza nata zawpi zydua hmiakô liata paduasa aw chi ta, ama mohmô liata biehneina na pie aw.

20Izarei zawpizy ta a rei amâ ngiah thei nawpa ta, na biehneina ano hnohta na hlâ aw.

21Ano cha theihthaipa Eliaza hmiakô liata a duah aw ta, theihthaipa Eliaza ta Abeipa hmiakô liata Uri hmâpa ta pachiana bie a hiahripa tyh aw. Ano nata a hnohta a ypa Izarei zawpi zydua ano rei sai ta pua aw ei ta, ano rei sai ta amâ ngia aw,” tah ta.

22Mawsi ta Abeipa biepiepa hawhta tao ta. Zawsua cha a chhi ta, Eliaza nata zawpi zydua hmiakô liata paduasa ta.

23A chô liata a ku pahnieh ta, Mawsi hmâpa ta Abeipa biereipa hawhta biehneina cha pie ta.

← Chapter 26 Jump to: Chapter 28 →