1 Chronicles 19

Chin TBR17 (Tedim Bible Revision 2017)

← Chapter 18 Jump to: Chapter 20 →

1Hih thu khit tawl khat ciangin Ammon miteʼ kumpipa Nahash si a, a tapa in ama tangin uk hi.

2Tua ciangin David in, “Ama pa kei tungah thuman takin hong gamta ahih manin Nahashʼ tapa Hanunʼ tungah thuman takin ka gamta ding hi,” a ci hi. Tua ahih ciangin David in a paʼ huhau-in amah a hehnem dingin kamtaite a sawl hi. Tua ciangin Davidʼ nasemte amah a hehnem dingin Ammon miteʼ gam Hanunʼ kiangah hong pai uh hi.

3Ahih hangin Ammon miteʼ uliante in Hanunʼ kiangah, “David in nang kiangah hehnemte hong sawlna hangin na pa a pahtawi hi, ci-in ngaihsun na hi hiam? Gam sung a pheklek ding le a lumlet ding le gam sung a ensim dingin ama nasemte na kiangah hong pai hi lo ahi hiam?” a ci uh hi.

4Tua ahih ciangin Hanun in Davidʼ nasemte manin a khamul uh metsak a, a kawng ciang uh ah a puante uh at khiatsakna tawh amaute daisakin a sawl khia hi. Tua ahih ciangin amaute kihem uh hi.

5Hih mite tawh kisai thu David kiangah a kigen ciangin amaute a dawntuah dingin mi a sawl hi; bang hang hiam cih leh hih mite nakpi takin maizum uh a, ciah ngam lo uh hi. Tua ciangin kumpipa in, “Na khamul uh a khankik mateng Jerikho ah om unla, tua ciangin hong ciah un,” a ci hi.

6Ammon mite in Davidʼ muhdahin amau mah a kibawl tawmna uh a muh uh ciangin Hanun le Ammon mite in Mesopotamia, Aram-maakah le Zobah panin leeng galkapte le sakol galkapte cial nadingin ngun talen tul khat a puak uh hi.

7Amaute in leeng galkap tul sawm thum le tul nih le Maakah gam kumpipa a galkap tawh cial uh a, amaute hong pai-in Medeba khua kiangah phual a sat uh hi. Tua ciangin a khuapite uh panin Ammon mite kikhawmin galsim dingin hong kuan uh hi.

8David in tua thu a zak ciangin Joab le mi thahat galkap khempeuh a sawl hi.

9Tua ciangin Ammon mite hong kuan khia-in khuapi lutna ah galdo dingin hong pang uh a, a hong kuan kumpite in gamlak ah panmun a la uh hi.

10Gal in a nung le a mai panin a panna Joab in a theih ciangin Israel mi a kiteng khia mi pawl khat teel a, Syria mite a do dingin pangsak hi.

11A om lai a mite amah in a sanggampa Abishaiʼ ukin koih a, Ammon mite a do dingin amaute kipangsak hi.

12Tua ciangin amah in, “Syria mite ka lelhtuak leh nangmah in kei nong huh dinga, ahih hangin Ammon mite nang na lelhtuak leh keimah in nang kong huh ding hi.

13Hang in; i mite ading le i Pasianʼ khuapite adingin pasal tat ni; Topa in ama hoihsak bangin hong hih tahen,” a ci hi.

14Tua ahih ciangin Joab le amah tawh a om mite in a do dingin Syria mite kiang hong naih uh hi. Tua ciangin ama mai ah Syria mite tai uh hi.

15Syria mite a taina Ammon mite in a muh uh ciangin tua bangmahin amaute zong Joabʼ sanggampa Abishaiʼ mai ah tai uh a, khuapi sungah lut uh hi. Tua ciangin Jerusalem ah Joab hong ciahkik hi.

16Ahih hangin Syria mite in Israel-te a lelhlam uh a kitheih uh ciangin, amaute in kamtaite sawlin Eufratis gal khat a om Syria galkapte sam uh a, Hadadezerʼ galkapte a ukpa Shofak a makai-in koih uh hi.

17David kiangah hih thu a kigen ciangin, amah in Israel khempeuh khawmin Jordan gal kah a, amaute kiangah pai-in amaute a do dingin galkapte khawm hi. David in Syria mite a do dingin gal pangsak a, Syria mite tawh kido uh hi.

18Tua ciangin Israel-teʼ mai ah Syria mite tai uh hi. Tua ciangin David in Syria miteʼ leeng hawl galkap mihing tul sagih le khe galkap tul sawm li that a, amauʼ galkap a ukpa Shofak zong a that hi.

19Tua khit ciangin Hadadezerʼ nasemte in Israel-te a lelhlam uh a kitheih uh ciangin amaute in David tawh kilemna bawl uh a, ama khutnuai mi a suak uh hi.

20Tua ahih ciangin Syria mite in Ammon mite huh nuam nawn lo uh hi.

← Chapter 18 Jump to: Chapter 20 →