1 Chronicles 20

Chin TBR17 (Tedim Bible Revision 2017)

← Chapter 19 Jump to: Chapter 21 →

1Khuakhal sungin galsimin kumpite kuan khia zel uh hi. Tua bang hunhoih khuakhal hong tun ciangin Joab in galkapte kuan khiat pihin Ammon miteʼ gam su gawp a, hong pai-in Rabbah khua umcih hi. Ahih hangin Jerusalem ah David om hi. Tua ciangin Joab in Rabbah khua vatin lumlet hi.

2Tua ciangin David in amauʼ kumpipaʼ kumpi lukhu ama tung panin lakkhiatsak hi. Tua lukhu kham talen khat gikin a sungah suangmanpha khat a omna amah in thei hi. Tua hi a, David in tua lukhu ama lu tungah khu hi. Tua ciangin amah in tua khuapi van kinusiate tampi tak khat paikhiatpih hi.

3Tua ciangin amah in tua sunga om mite paikhiat pihin singatnate le tuzumte le heite tawh na a sem dingin a koih hi. Tua bangin Ammon miteʼ khuapite khempeuh ah David in hih hi. Tua ciangin David le mi khempeuh Jerusalem ah a ciah uh hi.

4Hih thute khit ciangin Gezer ah Filistia mite tawh kidona hong om a, Hushah khuami Sibbekai in mi thagolteʼ suanlekhakte khat ahi Sippai a that hi. Tua bangin Filistia mite kinuaisiah hi.

5Tua ciangin Filistia mite tawh kidona omkik leuleu hi. Tua hi a, Jairʼ tapa Elhanan in a teipi kung siamlawngpi cia a pha, Gath khuami Goliathʼ sanggampa Lahmi a that hi.

6Tua ciangin a khut lang tuakah khutme guk a nei, a khe lang tuakah zong kheme guk mah a nei, a vekpi-in sawm nih le li a nei, mi thalian khat a omna Gath ah gal omkik hi. Tua mipa zong mi thagolteʼ sung pan a hong piang ahi hi.

7Amah in Israel a to ciangin Davidʼ sanggampa Shimeaʼ tapa Jonathan in amah that hi.

8Hih mi thumte pen Gath a mi thagolte sung pan a hong piang ahi uh hi. David le a nasemteʼ khutin amaute puk uh hi.

← Chapter 19 Jump to: Chapter 21 →