Matthew 18

Dagbani Bible (Naawuni Kundi Kasi)

← Chapter 17 Jump to: Chapter 19 →

1Di saha maa ka Yisa nyaandoliba daa ka o sanna ti bɔh’ o, “Ŋuni n-lee gari sokam zaa alizanda nam ni?”

2Ka o daa boli bibil’ so na nti zaŋ o zali bɛ sunsuuni

3ka yɛli, “Yɛlimaŋli ka n yɛri ya, yi yi bi zaŋ yimaŋ’ zali bia zaani yi ti ku kpe alizanda nam ni.

4Ka ŋunkam siɣis’ omaŋ’ leei kaman bibil’ ŋɔ n-nyɛ ŋun gari sokam zaa alizanda nam ni.

5Ŋunkam mi deeri bibil’ ŋɔ tatabo n yuli zuɣu deerila mani.”

6Yisa daa yɛliya, “Ŋunkam chɛ ka bibihi bɛn niŋ ma yɛda ŋɔ ni yino birigi n-tum alahichi, bɛ yi di zaŋ nɛ’ karili lo dilan’ nyiŋgol’ ni n-zaŋ o bahi teeku ni ka kom di o, di naan so o zuɣu.

7Mbusim be dunia ŋɔ zuɣu binshɛŋa din be di ni n-chɛri ka niriba birigiri tumd’ alahichi zuɣu! Biriginsim din ni kpɛhi nira alahichi ni ku chɛ, amaa mbusim be ninvuɣ’ so ŋun chɛ ka o kpee birigi zuɣu.

8“Ka a nuu bee a napɔŋ yi chɛ ka a yɛn birigi tum alahichi, nyin’ ŋmaam’ li bahi, dama a yi kɔŋ a nu’ yini bee a napɔn yini ka ti be, di so ni a mali nuh’ ayi bee napɔna ayi ka bɛ ti zaŋ a kpɛhi buɣim din bi kpiri ni.

9Ka a nimbil’ mi yi chɛ ka a yɛn birigi tum alahichi, nyin’ kpɔɣim’ li bahi, dama a yi kɔŋ a nimbil’ yini ka ti be, di so ni a mali nina ayi ka bɛ ti zaŋ a kpɛhi buɣim din bi kpiri ni.

10Yisa daa lan yɛli, “Miriya ka yi ʒiɛm bibihi ŋɔ ni yino gba, dama n yɛri ya mi ni bɛ malaikanim’ kul chola m Ba Naawuni ŋun be alizanda ni ŋɔ ninni. [

11Daadam Bia kamina ni o ti tiligi bɛn bɔrigi la. ]

12“Ka wula ka yi lee tɛhira? So yi mali piɛri kɔbiga, ka bɛ ni yino ti bɔrigi, o ku chɛ kɔbigayinika la zoya zuɣu bɛ mɔri ŋubbu shee ka gbaai ŋun bɔrigi maa shee bɔbu?

13Ka o yi ti nya piɛ’ yino maa, yɛlimaŋli ka n yɛri ya, o suhu paligirila o zuɣu gari piɛ’ kɔbigayinika bɛn bi bɔrigi la.

14Dinzuɣu di pala m Ba Naawuni ŋun be alizanda ni ŋɔ yubu ni bibihi ŋɔ ni yino gba bahi yoli.

15Yisa daa lan yɛli yaha, “A mabia yi tum a taali, nyin’ cham’ ti wuh’ o o taali maa a min’ o kɔŋko. O yi deeg’ o galimi, a zaŋ o labisi yi mabiligu maa puuni yaha m-bala.

16Amaa o yi zaɣisi wumbu, nyin’ bom’ ninvuɣ’ yino bee niriba ayi pah’ amaŋ’ zuɣu lab’ o sani, ka niriba ata bee ayi shɛhira dibu zuɣu ti chɛ ka yɛtɔɣili kam mali nyaanzaana.

17Ka o yi zaɣisi bɛ yɛligu wumbu, nyin’ zaŋm’ li yɛli cheechi, ka o yi kul zaɣisi cheechi gba yɛligu wumbu, nyin’ lihim’ o kaman chɛfira bee lampɔdeera.

18“Yɛlimaŋli ka n yɛri ya, yi yi ti lo yɛl’ shɛlikam dunia ŋɔ ni, dina n-ni zani alizanda ni, ka yi yi ti lɔrigi yɛl’ shɛlikam mi dunia ŋɔ ni, di ni ti lɔrigi alizanda ni gba.

19“N lan yɛri ya mi, yi ni niriba ayi yi naai noli dunia ŋɔ ni bɛ ni suhi Naawuni yɛl’ shɛli zuɣu, m Ba Naawuni ŋun be alizanda ni ŋɔ ni chɛ ka di niŋ.

20Dama niriba ayi bee ata yi laɣim luɣ’ shɛli n yuli zuɣu, n ni be bɛ sani.”

21Ka Pita daa ka Yisa sanna ti bɔh’ o, “N Duuma, bula ka m mabia lee yɛn tum ma taali ka n kul chɛri paŋd’ o? N chɛli paŋ o hal ti paai ʒii buyopɔin?”

22Ka Yisa yɛl’ o, “Pa ʒii buyopɔin kɔŋko, amaa pisopɔin mi ʒii buyopɔin.

23Dinzuɣu alizanda nam ŋmanila na’ so ŋun daa bol’ o yiŋbihi na ni o ti mal’ o liɣiri din be bɛ sani laasabu.

24O ni daa ti piligi maani di laasabu maa ka bɛ zaŋ do’ so ŋun daa di naa maa laɣ’ gbaliŋ samli na.

25Ka o daa ka kɔbo din ni yo, ka naa maa yɛli ni bɛ zaŋm’ sandira maa min’ o paɣa ni o bihi n-tabil’ o ni mali shɛlikam zaa ti kɔhi na nti yo o samli maa.

26Ka sandira maa daa damd’ o tooni m-balind’ o yɛra, ‘N dana, na dim’ ma suɣilo, n ni yo a di zaa.’

27Ka di daa niŋ naa maa nambɔɣu, ka o ku samli maa zaa o min’ o sunsuuni, ka chɛ ka o chaŋ.

28Amaa ka ŋun’ daa lee yi ha nti nya o kpe’ so ŋun daa di o gba samli ka di bi yaɣi lala, ka o ʒe n-di dilan’ maa nyiŋgol’ ni ka yɛl’ o, ‘Yom’ ma n samli la!’

29Ka o kpee maa gba damd’ o tooni m-balind’ o yɛra, ‘Na dim’ ma suɣilo, n ni yo a di zaa.’

30Ka ŋun’ daa zaɣisi, ka chɛ ka bɛ kpɛh’ o kpee maa duu, ka yɛli ni faashee o yo samli maa zaa.

31O tab’ ni daa nya lala maa ka di niŋ ba yoli, ka bɛ chaŋ ti yɛli naa doo maa ŋun’ ni niŋ shɛm.

32Ka naa maa daa bol’ o na ti yɛl’ o, ‘Nyin’ zaɣ’ yoli ŋɔ! A ni daa balim ma la, n daa bi ku a samli la zaa ti a?

33Di di bi simdi ni a gba zo a kpee maa nambɔɣu kaman n ni daa zo a nambɔɣu shɛm maa?’

34Ka naa maa gba suhu daa yiɣisi pam, ka o chɛ ka pirinsi kpɛh’ o duu, ka yɛli ni faashee o gba yo samli maa zaa.”

35Dimbɔŋɔ nyaaŋa ka Yisa daa yɛli, “Dinzuɣu yi yi bi chɛri yi mabihi taali paŋdi ba yi suhuri ni, lala ka m Ba Naawuni gba ti yɛn niŋ yi zaa yinoyino.”

← Chapter 17 Jump to: Chapter 19 →