Matthew 2

Dagbani Bible (Naawuni Kundi Kasi)

← Chapter 1 Jump to: Chapter 3 →

1Bɛ ni daa dɔɣi Yisa Bɛtilihɛm Judia tiŋgbɔŋ ni Naa Hɛrɔd saha la ka baŋdib’ shɛb’ daa yi wulimpuhili polo ka Jɛrusalɛm na

2nti bɔhi, “Ya polo ka bɛ ni dɔɣi Yɛhudianim’ Na’ so la lee be? Ti daa nyala o saŋmariga wulimpuhili polo, ka kana ni ti ti jɛm o.”

3Naa Hɛrɔd ni daa wum lala maa di daa muɣis’ o mini Jɛrusalɛmnim’ zaa pam, ka bɛ kɔŋ ʒiya.

4Ka o daa boli maligumaaniba kpamba mini Naawuni zaligubaŋdiba na nti bɔhi ba, “Ya polo ka bɛ daa lee yɛli ni bɛ ni ti dɔɣi Masia la?”

5Ka bɛ yɛl’ o, “Bɛtilihɛm din be Judia tiŋgbɔŋ ni la; dama anab’ so daa sab’ yɛli:

6‘Nyin’ Bɛtilihɛm, tiŋ’ din be Judia tiŋgbɔŋ ni ŋɔ, a pala tin’ bila Juda nabihi sani, dama a ni ka na’ so ŋun ni su n niriba Izraɛlnim’ ni ti yina.’ ”

7Dimbɔŋɔ nyaaŋa ka Naa Hɛrɔd daa boli baŋdiba maa ashilɔni na nti vihi ba viɛnyɛliŋga ni o baŋ saha shɛli saŋmariga maa ni daa puhi.

8Di nyaaŋa ka o daa yɛli ba, “Chamiya Bɛtilihɛm nti bo bia maa viɛnyɛliŋga; yi yi ti nya o ni be shɛli, yin’ labimiyana ti yɛli ma, ka n gba chaŋ ti jɛm o.”

9Bɛ ni daa wum Naa maa yɛligu maa bahi ka bɛ yi n-gbaai chandi; bɛ ni daa chani maa ka saŋmar’ so bɛ ni daa nya wulimpuhili polo maa dii gari bɛ tooni hal nti kpalim zani bia maa ni daa be yil’ shɛli maa dɛde.

10Bɛ ni daa nya saŋmariga maa ka bɛ suhuri paligi pam.

11Ka bɛ daa kpe yili maa ni nti nya bia maa min’ o ma Mariama, ka damdi tiŋa n-jɛm bia maa, ka naanyi lɔrigi bɛ daazichi ni be bɛ daadiiku shɛŋa ni n-yihi pina ti o. Pina maa daa nyɛla salima mini tulaale zim shɛŋa bɛ ni booni firanki tulaale la ni mɛɛr din to kaman yabiga la.

12Ka Naawuni daa wuhi ba zahindi ni ni bɛ di lan lab’ Naa Hɛrɔd sani; ka bɛ daa taɣi so’ shɛli kuli bɛ ya.

13Baŋdiba maa ni daa kuli maa ka ti Duuma malaika la ka Yisifu sanna zahindi ni nti yɛl’ o, “Yiɣisima n-zaŋ biliɛɣu maa min’ o ma zo n-chaŋ Ijipti tiŋgbɔŋ ni nti ʒini nimaani hal ka n ti lan ti a zilinli, dama Naa Hɛrɔd bɔri ni o bola bia maa shee ku o.”

14Ka o daa yiɣisi yuŋ maa n-zaŋ bia maa min’ o ma zo n-chaŋ Ijipti tiŋgbɔŋ ni

15nti be nimaani hal ka Naa Hɛrɔd ti kpi. Dimbɔŋɔ daa niŋmi ni di chɛ ka anab’ so ni daa yɛli shɛm la niŋ pali. O daa yɛlimi ni ti Duuma yɛliya, “Ijipti tiŋgbɔŋ ni ka n yihi m Bia maa na.”

16Naa Hɛrɔd ni daa nya ka baŋdib’ maa yɔhim o maa ka di ku o suli pam, ka o daa tim ni bɛ cham’ ti ku bidibbihi bɛn zaa be Bɛtilihɛm mini di tiŋkpansi zaa, yuma ayi bihi zaŋ tabili biliɛri kaman o ni daa kpahim baŋ shɛm baŋdiba maa yɛligu ni.

17Di saha maa ka Anabi Jɛrimia ni daa yɛli shɛm la niŋ pali. O ni daa yɛli shɛm maa m-bɔŋɔ:

18“Rama tiŋ’ puuni ka bɛ wum vuri din nyɛ fabila mini kumsi ni nandahima yɛla pam. Reechɛl kumd’ o bihi zuɣu, ka bɛ balim o je, dama bɛ zaa lan kani.”

19Naa Hɛrɔd kum nyaaŋa ka ti Duuma malaika so daa lan chaŋ Yisifu sani zahindi ni Ijipti tiŋgbɔŋ ni

20nti yɛl’ o, “Yiɣisima n-zaŋ bia maa min’ o ma labi Izraɛl tiŋgbɔŋ ni, dama bɛn daa lo ni bɛ ku bia maa kpiya.”

21Ka Yisifu daa yiɣisi n-zaŋ bia maa min’ o ma labiri Izraɛl tiŋgbɔŋ ni,

22amaa ka daa ti wum ni Arikilɔs n-di nam zan’ o ba Hɛrɔd zaani Judia, ka dabiɛm daa mal’ o ni o kul’ ni; ka Naawuni daa lan wuh’ o zahindi ni ni o ŋmaligim’ chaŋ Galili tiŋgbɔŋ ni.

23Ka o daa chaŋ nti ʒini tin’ shɛli din yuli booni Nazarɛt la ni di chɛ ka anabinim’ ni daa yɛli shɛm la niŋ pali. Bɛ daa yɛliya ni bɛ ni ti bol’ o Nazarɛt nira.

← Chapter 1 Jump to: Chapter 3 →