Matthew 4

Dagbani Bible (Naawuni Kundi Kasi)

← Chapter 3 Jump to: Chapter 5 →

1Di saha maa ka Naawuni Shia Kasi daa zaŋ Yisa n-tahi mɔɣu ni ni Sintani ti zahim o.

2Yisa daa lola noli biɛɣ’ pihinahi wuntaŋ’ ni mini yuŋ zaa, ka di dabisa maa daa ti gari ka kum wum o.

3Ka Sintani ŋun nyɛ ninvuɣ’ zahinda la daa chaŋ o sani ti yɛl’ o, “A yi shiri nyɛla Naawuni Bia, nyin’ chɛ ka kuɣa ŋɔ leei bindirigu ka a di.”

4Amaa ka Yisa yɛl’ o, “ Di sabiya, ‘Pa bindirigu kɔŋko zuɣu ka daadam be, amaa yɛtɔɣili kam din yiri Naawuni nol’ ni na zuɣu ka daadam be.’ ”

5Ka Sintani daa zaŋ o chaŋ Tiŋ’ Kasi la ni nti du n-tam Naawuni jɛmbu duu zuɣusaa kpaakpaanyom ni ha

6ka yɛl’ o, “A yi shiri nyɛla Naawuni Bia, nyin’ bahim’ amaŋa n-lu tiŋ’ sa, dama di sabiya, ‘Naawuni ni bah’ o malaikanim’ noli, ka bɛ gbib’ a. Bɛ ni gbib’ a bɛ nuhi ni, ka a napɔŋ ku tuui kuɣili kam.’ ”

7Ka Yisa yɛl’ o, “ Di sabiya yaha, ‘Miri ka a zahim a Duuma Naawuni.’ ”

8Ka Sintani lan zaŋ o chaŋ nti du zo’ shɛli din du pam zuɣu n-wuh’ o dunia ŋɔ nama mini di jilima zaa

9ka yɛl’ o, “A yi ni damdi tiŋa n-jɛm ma, n ni zaŋ di zaa ha ti a.”

10Amaa ka Yisa yɛl’ o, “ Sintani, wara! Di sabiya, ‘Sal’ kul ni jɛmla o Duuma Naawuni kɔŋko, ka pa ni so yaha.’ ”

11Di saha ka Sintani daa zo ka chɛ Yisa, ka malaikanim’ kana ti kpaŋs’ o suhu.

12Yisa ni daa ti wum ni be gbaai Jɔn Baptaizira, ka o yiɣisi chaŋ Galili tiŋgbɔŋ ni.

13O ni daa paai Nazarɛt, o daa bi yuui, ka yi nimaani gari chaŋ Kapɛrinium din be teeku duli Zɛbulɔn mini Naftali tiŋgbana ni la

14ni di chɛ ka Anabi Aizaia ni daa yɛli shɛm zaŋ chaŋ bɛ polo la niŋ pali. O ni daa yɛli shɛm maa m-bɔŋɔ:

15“Zɛbulɔn tiŋgbani mini Naftali tiŋgbani din be Jɔɔdɛn mɔɣili duli zaŋ labi teeku polo, ka nyɛ tiŋgban’ shɛŋa bɛ ni booni Galili chɛfirinim’ tinsi la,

16Niriba bɛn daa ʒi zibisim ni la yipa nya neesim titali; ka bɛn daa ʒi kum zibisim ni be luɣ’ shɛli polo la gba nya ka neesim maa neei m-paai ba.”

17Di saha ka Yisa daa piligi yihiri waazu n-yɛri niriba, “ Niŋmiya tuuba, dama alizanda nam mirina.”

18Yisa daa ti baɣisiri Galili Teeku chana nti nya nira ni o mabia: Saimɔn ŋun yuli daa lan booni Pita la min’ o tizo Anduru, ka bɛ labiri laŋa teeku ni, dama bɛ daa nyɛla kulipalinima.

19Ka o yɛli ba, “ Doliya ma, ka n chɛ ka yi booni ninsalinim’ tiri Naawuni kaman yi ni gbahiri zahim shɛm maa.”

20Ka bɛ daa dii chɛ bɛ lansi maa ka dol’ o.

21Ka bɛ daa lan tirisi tooni ha nti nya Zɛbidii min’ o bih’ ayi: Jeemsi min’ o tizo Jɔn, ka bɛ be ŋariŋ ni n-liɣiri bɛ lansi. Ka Yisa daa boli bɛ gba;

22ka bɛ dii chɛ bɛ ba mini ŋariŋ maa ka dol’ o.

23Yisa daa chani gindila Galili tiŋgbɔŋ ni zaa n-wuhiri niriba Yɛhudianim’ jɛmbu duri ni, ka yihiri alizanda nam lahibal’ suŋ waazu, ka tibiri dɔro balibu kam mini dɔr’ biɛri balibu kam ni daa mali ninvuɣ’ shɛba.

24Ka o yɛla daa mol’ gili Siria tiŋgbɔŋ ni zaa; ka bɛ daa zaŋ barinim’ zaa tah’ o sanna. Bɛna n-daa nyɛ dɔr’ biɛri balibu kam mini niŋgbuna ni biɛrim ni daa muɣisiri shɛba zaŋ tabili alizin’ biɛri ni daa ʒi shɛb’ zuɣu ni kpilinkpihi ni luhiri shɛba ni bɛn bɔɣiri mini bɛ gbaya kpi. Ka Yisa daa chɛ ka bɛ zaa kpaŋ.

25Ka salo pam bɛn daa yi Galili mini Tinsi Pia tiŋgbana ni na mini bɛn yi Jɛrusalɛm ni Judia zaŋ tabili Jɔɔdɛn mɔɣili dulinim’ zaa daa kabiri dol’ o.

← Chapter 3 Jump to: Chapter 5 →

Recommended Reading

Commentary Matthew Commentaries → Devotional Matthew Devotional Guide → Get This Bible Dagbani Bible (Naawuni Kundi Kasi) Study Bible →