Matthew 9

Dagbani Bible (Naawuni Kundi Kasi)

← Chapter 8 Jump to: Chapter 10 →

1Ka Yisa daa kpe ŋariŋ maa ni m-baai du teeku duli kul’ o ya.

2Ka bɛ daa zaŋ gbalikpimalan’ so n-niŋ amaŋka ni n-ʒi o ka Yisa sanna; ka Yisa daa nya bɛ ni niŋ o yɛda shɛm maa ka yɛli gbalikpimalan’ maa, “M bia, chɛ ka a suhu kpɛma, n chɛ a daalahichi paŋ a.”

3Di saha ka Naawuni zaligubaŋdi’ shɛb’ daa yɛli bɛ suhuri ni, “Doo ŋɔ mɔri Naawuni!”

4Ka Yisa daa baŋ bɛ tɛha maa ka bɔhi ba, “Bɔ n-niŋ ka yi tɛhiri tɛhi’ biɛri yi suhuri ni?

5Yɛla ayi ŋɔ sunsuuni dini n-lee be asama ni nira yɛli: A yi yɛli so ni a chɛ o daalahichi paŋ o bee a yi yɛl’ o ni o yiɣisim’ chaŋ?”

6Ka lan yɛli ba, “Amaa m bɔrimi ni yi baŋ ni Daadam Bia mali yiko din chɛri niriba daalahichi paŋdi ba dunia ŋɔ ni.” Di saha ka o ŋmaligi yɛli gbalikpimalan’ maa, “Yiɣisima n-zaŋ a daamaŋka maa kuli!”

7Ka o yiɣisi kuli.

8Salo maa ni daa nya lala maa ka dabiɛm gbahi ba, ka bɛ tibigi Naawuni ŋun niŋ ninsalinim’ yiko ŋɔ tatabo maa.

9Ka Yisa daa yi nimaani chana nti nya Matiu, ka o ʒi farigu deebu shee; ka Yisa yɛl’ o, “Yiɣisim’ doli ma.” Ka o yiɣisi dol’ o.

10Ka Yisa daa chaŋ Matiu maa yiŋa n-daa ti ʒini ni o di bindirigu, ka farigudeeriba pam mini alahichinim’ kana nti ʒini pahi Yisa min’ o nyaandoliba zuɣu.

11Ka Farisiinim’ daa nya lala ka bɔh’ o nyaandoliba maa, “Bɔzuɣu ka yi karimba maa mini farigudeeriba ni alahichinim’ laɣim timdi dira?”

12Ka Yisa daa wum lala maa ka yɛli, “Bɛn mal’ alaafee bi bɔri dɔɣite naɣila bɛn biɛra.

13Chamiya ti bɔhim dimbɔŋɔ gbinni: M paɣi nambɔzɔbo gari sara malibu. Pa wuntizɔriba zuɣu ka n kana, amaa alahichinim’ tuuba niŋbu zuɣu ka n kana.”

14Jɔn Baptaizira nyaandoliba daa ti ka Yisa sanna nti bɔh’ o, “Bɔ n-niŋ ka ti mini Farisiinim’ lɔri noli, ka nyin’ nyaandoliba bi lɔra?”

15Ka Yisa bɔhi ba, “Aŋgo zɔnim’ ni fabili aŋgo ni be bɛ sani saha shɛli? Amaa saha kanna ka bɛ ni ti yihi aŋgo maa bɛ sani, di saha maa ka bɛ ni ti lo noli”

16Ka o daa lan ŋahi ba ŋaha ŋɔ yɛli, “So ku saɣi zaŋ tan’ palli din na bi tiri n-liɣi binyɛr’ kurili, dama o yi niŋ lala, tan’ palli maa ni yaai di ko n-cheei ka chɛ binyɛr’ kurili maa, ka di maan chɛhi pahi.

17So mi ku saɣi zaŋ da’ palli le dakol’ kura ni, dama o yi niŋ lala, kola maa ni chɛhichɛhi, ka dam maa kpaai bahi, ka kola maa gba saɣim. Dinzuɣu bɛ zaŋdi da’ palli n-lɛrila kol’ pala ni, ka di bina ayi maa zaa shɛli ku saɣim.”

18Yisa ni daa na kul tɔɣisiri ba yɛtɔɣa maa ka zuɣulan’ so daa kana nti damd’ o tooni yɛl’ o, “M bipuɣiŋga n-na kul yoli kpi; amaa kamina nti zaŋ a nuu pa o zuɣu ka o lan niŋ nyɛvililana yaha.”

19Ka Yisa daa yiɣisi n-zaŋ o nyaandoliba m-pa omaŋ’ zuɣu dol’ o.

20Di saha maa ka paɣital’ dɔro ni daa mali paɣ’ so yuun’ pinaayi daa gili Yisa nyaaŋa nti shih’ o binyɛrigu naŋgbambili.

21Dama o daa yɛl’ o suhu ni, “Hal n yi kul shih’ o binyɛrigu gba, n ni nya alaafee.”

22Ka Yisa daa ŋmaligi lihi nya paɣ’ maa ka yɛl’ o, “M bia, chɛ ka a suhu kpɛma, a yɛda niŋbu n-chɛ ka a kpaŋ.” Ka o dɔro maa daa dii naai.

23Ka Yisa daa ti paai zuɣulan’ maa yiŋa n-nya ka yupiɛbiriba mini salo pam beni n-yarindi ka mɔhiri vuri.

24Ka o yɛli ba, “Yimiya! Bipuɣiŋga maa bi kpi, amaa o gbihirimi.” Ka bɛ lar’ o.

25Salo maa ni daa yi n-naai, ka o kpe nti gbaai bipuɣiŋga maa nuu, ka o neei n-yiɣisi zani.

26Ka di yɛla daa moli gili di tiŋgbɔŋ maa ni zaa.

27Yisa ni daa yi nimaani gariti tooni, ka dɔbba ayi bɛn nyɛ zoomba dol’ o n-kuhiri pampam yɛra, “Nyin’ ŋun nyɛ Naa Dauda yaaŋa ŋɔ, zom’ ti nambɔɣu!”

28Ka o daa mali nti kpe yil’ shɛli, ka zoomba maa dol’ o kpe; ka Yisa bɔhi ba, “Yi niŋ yɛda ni n ni tooi niŋ yi ni bɔri shɛli maa?” Ka bɛ garigi yɛl’ o, “Iin, ti Duuma.”

29Ka o daa zaŋ o nuu shihi bɛ nina ka yɛli, “Yi yɛda niŋbu ni nyɛ shɛm, di niŋmiya lala.”

30Ka bɛ nina maa dii neei. Ka Yisa kpahi bɛ zuɣu ni viɛnyɛliŋga yɛli, “Miriya ka yi yɛli so di yɛla.”

31Amaa ka bɛ daa yi nti mol’ o yɛla gili di tiŋgbɔŋ maa ni zaa.

32Bɛ ni daa ŋmaligi yira, ka shɛb’ gba zaŋ alizin’ birigu ni daa ʒi do’ so zuɣu tahi Yisa sanna.

33Ka o daa kari alizin’ birigu maa doo maa zuɣu bahi, ka doo maa lan leei ŋun tɔɣisira; ka di daa niŋ salo maa alahiziba pam ka bɛ yɛra, “Ti na ʒi n-nya tuuni ŋɔ tatabo Izraɛl tiŋgbɔŋ ŋɔ ni.”

34Amaa ka Farisiinim’ daa yɛli ni alizin’ biɛri naa n-niŋ o yiko ka o kariti alizin’ biɛri bahiri maa.

35Yisa daa chani gindila fɔntinsi mini tiŋkpansi zaa n-wuhiri niriba Yɛhudianim’ jɛmbu duri ni, ka yihiri Naawuni nam lahibal’ suŋ waazu, ka tibiri dɔro balibu kam mini dɔr’ biɛri balibu kam ni mali ninvuɣ’ shɛba.

36O ni daa nya salo maa, ka bɛ yɛla niŋ o nambɔɣu pam, dama bɛ daa nyɛla bɛn nyari nahiŋgu ka bi nyari sɔŋsim; bɛ daa ŋmanila piɛri bɛn ka gula.

37Di saha ka Yisa daa yɛl’ o nyaandoliba, “Puu atam zooya pam, amaa ka tumtumdiba lee pɔra;

38dinzuɣu suhimiya ŋun su puu atam maa kpuɣibu ka o bo tumtumdiba m-pahi ka bɛ kpuɣi puu atam maa na.”

← Chapter 8 Jump to: Chapter 10 →