Matthew 27 — Dagbani Bible (Naawuni Kundi Kasi)

1Biɛɣu ni daa ti neerina ka maligumaaniba kpamba mini tiŋ’ maa ni kpamba laɣim to jina ni bɛ gbaai bɛ ni yɛn niŋ shɛm ku Yisa,

2ka daa lo o mihi n-zaŋ o tahi Gomna Pailɛt sani.

3Saha shɛli Judas ŋun daa yi Yisa nyaaŋa la ni daa ti wum ka bɛ yɛli ni bɛ kum’ Yisa, ka o daa galim omaŋa, ka zaŋ anzinfa kpil’ pihita la labisi ti ti maligumaaniba kpamba mini tiŋ’ maa ni kpamba

4ka yɛli, “N tum alahichi, dama n yi ŋun ka taali nyaaŋa.” Ka bɛ bɔh’ o, “Ka dimbɔŋɔ nya ti ya? A yɛla m-bala!”

5Ka o daa zaŋ anzinfa kpila maa bahi Naawuni jɛmbu duu maa ni, ka yi n-chaŋ ti yil’ omaŋ’ mia.

6Ka maligumaaniba kpamba maa daa kpuɣi anzinfa kpila maa ka yɛli, “Di bi simdi ni ti lan zaŋ li gari Naawuni jɛmbu duu liɣiri ni, dama di nyɛla ninsal’ ʒim liɣiri.”

7Dinzuɣu ka bɛ daa niŋ tab’ saawara, ka zaŋ li da yaɣimɛr’ so palo ni bɛ mali saamba sɔɣiri nimaani.

8Lala zuɣu ka bɛ daa boli palo maa yuli, “Ʒim Palo” hal ni zuŋɔ.

9Ka di daa chɛ ka Anabi Jɛrimia ni daa yɛli shɛm la niŋ pali. O ni daa yɛli shɛm maa m-bɔŋɔ, “Bɛ zaŋ anzinfa kpil’ pihita shɛli Izraɛlnim’ shɛb’ ni daa zal’ o daa shɛm la

10yo yaɣimɛr’ palo zuɣu kaman n Duuma Naawuni ni daa pun wuhi ma shɛm.”

11Ka Yisa daa ʒe Gomna Pailɛt tooni, ka Gomna Pailɛt maa bɔh’ o, “A shiri nyɛla Yɛhudianim’ naa?” Ka Yisa garigi yɛl’ o, “A ni yɛli shɛm maa n-nyɛ li.”

12Amaa maligumaaniba kpamba mini tiŋ’ maa ni kpamba ni daa fiɣis’ o, o daa bi garigi shɛli.

13Di saha ka Gomna Pailɛt daa lan bɔh’ o, “A bi wum bɛ ni fiɣisir’ a shɛm maa?”

14Amaa ka Yisa kul shini, hal o daa bi garigi bɛ ni fiɣis’ o yɛl’ shɛŋa zuɣu maa zaɣ’ yini gba. Ka di daa gari Gomna Pailɛt pam.

15Yaɣigari Chuɣu kam puhibu saha daa yi ti paai, Gomna maa yihirila dansarika so niriba ni bɔri bahi.

16Dansarika so daa beni ka o yuli booni Barabas, ka o nyɛ bɛ ni mi so yɛla pam.

17Dinzuɣu bɛ ni daa laɣimna ka Gomna Pailɛt bɔhi ba, “Ŋuni ka yi lee bɔri ni n yihi bahi? Barabas bee Yisa so bɛ ni booni Masia la?”

18O daa mi ni nyuli ka bɛ zab’ Yisa n-zaŋ o tahi na maa.

19Gomna Pailɛt ni daa ʒiya kariti saria maa ka o paɣ’ timna ti yɛl’ o, “Yihim’ a nuu wuntizɔra ŋɔ yɛla ni, dama yuŋ la n sa nya muɣisigu pam zahindi ni o zuɣu.”

20Ka maligumaaniba kpamba mini tiŋ’ maa ni kpamba daa dim salo maa tiba ni yɛli ni bɛ yɛlim’ o ni o yihimila Barabas bahi ka ku Yisa.

21Ka Gomna maa daa lan bɔhi ba pahi, “Niriba ayi maa ni, ŋuni ka yi lee bɔri ni n yihi bahi?” Ka bɛ yɛl’ o, “Barabas.”

22Ka Gomna Pailɛt lan bɔhi ba yaha, “Ka wula ka yi lee bɔri ni n niŋ Yisa so bɛ ni booni Masia la?” Ka bɛ zaa yɛli, “Kpahim’ o tabili dapulli zuɣu!”

23Ka o bɔhi ba, “Bɔzuɣu? Tuumbiɛ’ bɔ ka o lee tum?” Ka bɛ maan mɔhi vuri pam yɛli, “Kpahim’ o tabili dapulli zuɣu!”

24Gomna Pailɛt ni daa zahim nya ka o ku tooi yihi ba bɛ ni bɔri shɛm maa ni, ka nya ka bɛ maan piligirila duŋ taabu maa zuɣu, ka o daa zaŋ kom paɣ’ o nuhi salo maa ninni ka yɛli, “N nuu ka doo ŋun ka taali ŋɔ ʒim yihibu ni. Yi yɛla m-bala!”

25Ka niriba maa zaa garigi yɛli, “O ʒim yihibu kpalimmi ʒi ti mini ti bihi zuɣu!”

26Di saha ka o daa yihi Barabas bahi, ka chɛ ka bɛ fiɛb’ Yisa, ka naanyi zaŋ o ti ba ni bɛ ti kpah’ o tabili dapulli zuɣu.

27Di saha ka Gomna maa tɔbbihi daa zaŋ Yisa kpe Gomna maa yiŋ’ dundɔŋ ni nti laɣim bɛ tɔbbi’ tab’ zaa na.

28Ka bɛ daa ti pirigi Yisa binyɛra ka zaŋ kpar’ ʒiɛɣu yɛl’ o,

29ka wuɣi gɔhi zuɣupiligu pil’ o, ka zaŋ kaɣili gbibil’ o nudirigu ni; ka damdir’ o tooni maan’ o ansarisi yɛra, “Ti puhir’ a, nyin’ Yɛhudianim’ Naa!”

30Ka bɛ daa tuhiri nintɔri viɛr’ o, ka deei kaɣili maa fiɛbir’ o zuɣu ni.

31Bɛ ni daa mal’ o ansarisi maa naai, ka bɛ pirigi kpar’ ʒiɛɣu maa, ka zaŋ omaŋmaŋ’ binyɛrigu yɛl’ o n-zaŋ o chaŋ ni bɛ ti kpah’ o tabili dapulli zuɣu.

32Bɛ ni daa mali Yisa chani maa ka bɛ chirigi Sairiini nira ŋun yuli booni Saimɔn, ka bɛ gbaag’ o ti muɣis’ o n-zaŋ Yisa dapulli maa ʒil’ o ni o ʒi li.

33Bɛ ni daa ti paai luɣ’ shɛli din yuli booni Goligɔta la (Di gbinni nyɛla, “Zuɣuŋmaŋ Shee”),

34ka bɛ daa zaŋ bɛ ni zaŋ yabiga gari wain shɛl’ ni ti o ni o nyu; amaa ka o lam li ka zaɣisi li nyubu.

35Bɛ ni daa kpah’ o tabili dapulli maa zuɣu, ka bɛ zaŋ o binyɛra pumpu n-sɔŋ tɔri tɛte ni bɛ nya bɛ zaa yinoyino ni yɛn di shɛli;

36ka daa ʒi nimaani gul’ o.

37Ka bɛ daa sab’ bɛ ni yɛli ni Yisa tum taal’ shɛli maa tabil’ o dapulli maa zuɣusaa o zuɣu dɛde. Di ni daa sab’ shɛm m-bɔŋɔ: “Yisa ŋun nyɛ Yɛhudianim’ Naa la m-bɔŋɔ.”

38Bɛ daa kpahi ŋmɛnditoya ayi gba tabili dapula n-zaŋ sa m-pah’ o zuɣu; yino o nudirigu polo, ŋun’ la mi o nuzaa polo.

39Ka bɛn daa gariti nimaani gba yɛri Yisa zilima, ka gbaɣisiri bɛ zuɣuri niŋd’ o

40ka yɛra, “Nyin’ ŋun wurindi Naawuni jɛmbu duu ka lan mɛri li daba ata sunsuuni ŋɔ, tiligim’ amaŋa! A yi shiri nyɛla Naawuni Bia, nyin’ siɣim’ dapulli maa zuɣu na!”

41Lala ka maligumaaniba kpamba mini Naawuni zaligubaŋdiba ni tiŋ’ maa ni kpamba la gba daa maan’ o ansarisi yɛra,

42“O daa tiligi shɛba, ka lee ku tooi tilig’ omaŋa. O nyɛla Izraɛlnim’ Naa. To, o siɣim’ dapulli maa zuɣu na pumpɔŋɔ, ka ti niŋ o yɛda.

43O niŋla Naawuni naani; lala zuɣu Naawuni yi bɔr’ o, ŋun’ fam’ o bahi pumpɔŋɔ, dama o yɛliya, ‘N nyɛla Naawuni Bia.’ ”

44Ka bɛ ni daa kpahi ŋmɛnditol’ shɛba tabili dapula zuɣu n-zaŋ sa m-pah’ o zuɣu la gba yɛr’ o zilima.

45Luɣ’ shɛlikam zaa daa zibigimi agbaa dɛde zaŋ ti paai kurig’ ata saha.

46Kurig’ ata maa saha ka Yisa daa kuhi pam yɛli, “Ilai, Ilai, lama sabakitani?” Di gbinni nyɛla, “N Duuma Naawuni, n Duuma Naawuni, bɔ n-niŋ ka a chɛ ma?”

47Ka bɛn daa ʒe nimaani maa shɛb’ wum lala ka yɛli, “Doo maa boonila Anabi Ilaija.

48Ka bɛ ni yino daa dii zo n-chaŋ ti zaŋ gumdi tim komihigu ni n-zaŋ kaɣili gbab’ li zaŋ ti o ha ni o nyu.

49Amaa ka o tab’ maa yɛli, Guhim’ pɔi! Chɛ ka ti nya Anabi Ilaija ni kana ti tilig’ o bee o ku kana.

50Ka Yisa daa kuhi pam ka naanyi bahi.

51Di saha ka chinchin’ shɛli din daa yili Naawuni jɛmbu duu sunsuuni la daa cheei di zuɣusaa hal ti siɣi di tiŋli. Ka tiŋgbani daa dam ka tampima bɔɣi,

52ka gbala yɔhi; ka kpiimba pam bɛn daa nyɛ wuntizɔriba la neei kum ni

53n-daa yi gbala maa ni na Yisa kum ni neebu nyaaŋa n-chaŋ ti kpe Jɛrusalɛm din nyɛ Naawuni tiŋ’ kasi la puuni, ka niriba pam daa nya ba ni bɛ nini.

54Ka sapashin’ kpeen’ so mini bɛn daa pah’ o zuɣu ʒiɛya guli Yisa maa ni daa nya tiŋgbani dambu maa mini din niŋ maa, ka dabiɛm kpe ba pam ka bɛ yɛli, “Yɛlimaŋli, doo ŋɔ shiri nyɛla Naawuni Bia!”

55Paɣiba pam gba daa be nimaani n-kaɣi ʒe kpaŋ’ ha yuuni din niŋ maa. Bɛna n-daa nyɛ bɛn doli Yisa yi Galili na, ka nyɛ bɛn sɔŋd’ o la.

56Mariama ŋun daa yi Magdala na la mini Mariama ŋun daa nyɛ Jeemsi mini Yisifu ma ni Zɛbidii bihi ma la gba daa be bɛ ni.

57Ka di daa ti niŋ zaawun’ yuŋ ha, ka bundaan’ so ŋun daa yi Arimatia na ka o yuli booni Yisifu, ka o nyɛ Yisa nyaandol’ la

58daa chaŋ Gomna Pailɛt sani ti suh’ o soli ni o chɛ ka o zaŋ Yisa ti sɔɣi. Ka Gomna Pailɛt daa yɛli ni bɛ zaŋm’ o ti o.

59Ka Yisifu daa chaŋ ti zaŋ Yisa m-bo bimpiɛlli niŋ o

60n-zaŋ o ti sɔɣi omaŋmaŋ’ silig’ pal’ shɛli o ni daa yoli chib’ tampiŋ ni la ni; ka daa bilim kuɣ’ titali na ti yo di noli, ka ŋmaligi kuli.

61Mariama ŋun daa yi Magdala na la min’ o tɔɣima la daa ʒiɛla kpaŋ’ ha tuhi siliga maa.

62Dindali maa kaai biɛɣu daa nyɛla Vuhim Dabisili dali, ka maligumaaniba kpamba mini Farisiinim’ daa laɣim chaŋ Gomna Pailɛt sani

63ti yɛl’ o, “Ti dana, ti teeya ni ʒirilan’ la ni daa be o nyɛvil’ ni la, o daa yɛliya ni o ni ti neei kum ni daba ata dali.

64Dinzuɣu bahim’ noli ka bɛ chaŋ ti guli siliga maa viɛnyɛliŋga hal ti paai daba ata maa dali, ka di chɛ ka o nyaandoliba ti ku chaŋ ti zu n-yih’ o ka yɛli niriba ni o neela kum ni, ka yɔhiŋgu din bahindi nyaaŋa maa ni ti bie n-gari tuuli din’ la.”

65Ka Gomna Pailɛt yɛli ba, “Yi mali tɔbbihi bɛn ni gul’ li; chamiya ti niŋ yi ni ni niŋ shɛm gul’ li viɛnyɛliŋga.”

66Ka bɛ daa chaŋ nti dalim siliga maa noli kuɣili la, ka zali tɔbbihi ka bɛ gul’ li.