Matthew 8

Dagbani Bible (Naawuni Kundi Kasi)

← Chapter 7 Jump to: Chapter 9 →

1Yisa ni daa yi zoli maa zuɣu siɣina ka salo pam kul kabiri dol’ o;

2ka kɔŋlan’ so daa kana nti damd’ o tooni yɛra, “N dana, a yi di saɣi, a naan chɛ ka n kɔŋ’ ŋɔ naai ka n kpe n tab’ ni.”

3Ka Yisa daa teeg’ o nuu shih’ o ka yɛli, “N saɣiya; di naama!” Ka o kɔŋ’ maa dii naai.

4Ka Yisa yɛl’ o, “Miri ka a yɛli so di yɛla; amaa cham’ ti zaŋ amaŋ’ wuhi maligumaana, ka mali sara shɛli Anabi Musa ni daa sab’ zali zaŋ chaŋ kɔŋ’ tibbu polo la; dina n-ni niŋ a kpaŋbu maa shɛhira niriba sani.”

5Yisa ni daa ti kpe Kapɛrinium tiŋ’ puuni saha shɛli, ka Rom sapashin’ so daa ka o sanna nti balind’ o yɛra,

6“N Duuma, n yiŋ’ bia bɔɣu min’ o gbali zaa n-kpi, ka di muɣis’ o pam ka o do yiŋa.”

7Ka Yisa yɛl’ o, “N ni kana nti chɛ ka o kpaŋ.”

8Ka sapashin’ maa yɛl’ o, “N Duuma, m pɔri ni a ka n yiŋ’ na; amaa kul yɛlim’ yɛtɔɣ’ shɛli a ni yɛn yɛli, ka n yiŋbia maa kpaŋ.

9Dama n nyɛla bɛ ni su ninvuɣ’ so, ka m mi su tɔbbi’ shɛb’ fukumsi. N ni tooi yɛli bɛ ni yino ni o cham’ luɣ’ shɛli, ka o chaŋ; ka ni tooi yɛli bɛ ni yino ni o kamina, ka o kana; ka ni tooi yɛli n dabili mi ni o niŋmi ŋ-ŋɔ, ka o niŋ li.”

10Yisa ni daa wum o ni yɛli shɛm maa ka di gar’ o pam, ka o yɛli ninvuɣ’ shɛb’ bɛn dol’ o maa, “Yɛlimaŋli ka n yɛri ya, hal Izraɛlnim’ ni n na ʒi n-nya ŋun niŋ yɛda ŋ-ŋɔ.

11N yɛri ya mi ni niriba pam bɛn pa Yɛhudianima ni ti yi wulimpuhili mini wulinluhili polo na, ka bɛ mini Ibrahimma ni Yisahaku ni Yaakubu ti laɣim ʒini alizanda nam ni ni suhupiɛlli;

12amaa ka bɛ ti zaŋ ninvuɣ’ shɛb’ bɛn daa niŋdi Naawuni nam maa ni kpɛbu tahima la nti bahi bumbɔn’ ni; nimaani ka niriba ni ti fabili ka dim bɛ nyina.”

13Ka o daa ŋmaligi yɛli sapashin’ maa, “Kulima! A ni niŋ yɛda shɛm maa zuɣu, di ni niŋ lala.” Ka o yiŋbia maa daa shiri kpaŋ di saha maa.

14Ka Yisa daa kpe Pita yiŋa n-nya ka Pita deempaɣa niŋgbuŋ bii ka o doya;

15ka o shih’ o nuu, ka o niŋgbun’ biisim maa dii maai, ka o yiɣisi niŋ o saani.

16Dindali maa zaawun’ yuŋ, ka bɛ daa zaŋ alizin’ biɛri ni ʒi ninvuɣ’ shɛb’ zuɣu n-tahi Yisa sanna; ka o daa zaŋ o nol’ ni yɛligu n-kari alizin’ biɛri maa, ka tib’ ŋunkam daa biɛra.

17Ka o ni daa niŋ shɛm maa chɛ ka Anabi Aizaia ni daa yɛl’ o yɛla shɛm la niŋ pali, Anabi Aizaia ni daa yɛli shɛm maa m-bɔŋɔ, “Omaŋmaŋ’ n-daa deei ti niŋgbun’ biisim mini ti dɔriti zaa ʒi.”

18Yisa ni daa nya ka salo pam laɣim gil’ o maa ka o yɛl’ o nyaandoliba ni bɛ baami n-du duli ha.

19Ka Naawuni zaligubaŋdi’ so daa kana nti yɛl’ o, “Karimba, n ni dol’ a chaŋ a ni chani luɣ’ shɛlikam zaa.”

20Ka Yisa yɛl’ o, “Ŋɔri malila voya, ka noonsi mi mali tɛri, amaa Daadam Bia ka luɣ’ shɛli din ni zaŋ o zuɣu sɔŋ gba.”

21Ka o nyaandoliba maa ni yino mi ti yɛl’ o, “N Duuma, chɛ ka n kuli ka m ba ti di saɣim saɣ’ o tariga ka n sɔɣ’ o pɔi ka naanyi kana ti dol’ a.”

22Amaa ka Yisa yɛl’ o, “Doli ma, ka chɛ ka kpiimba sɔɣimi bɛ kpiin’ taba.”

23Yisa daa kpe ŋariŋ ni, ka o nyaandoliba gba dol’ o kpe.

24Ka sanʒiɛ’ titali daa ti yiɣisi teeku maa ni, ka kɔgbana yiɣiri luri ŋariŋ maa ni hal ka kom ti yɛn kpe m-pal’ li; amaa ka Yisa do di ni gbihira.

25Ka o nyaandoliba maa chaŋ ti neeg’ o yɛl’ o, “Ti Duuma, kom yɛn di ti; tiligim’ ti!”

26Ka o bɔhi ba, “Yinim’ bɛn yɛda bi yaɣi lala ŋɔ, bɔ n-niŋ ka yi zɔri dabiɛm lala?” Di saha ka o daa yiɣisi n-tahi sanʒiɛɣu maa mini teeku kɔgbana maa zuɣu, ka di zaa dii fo baalim.

27Ka di niŋ ba alahiziba pam ka bɛ bɔhiri taba, “Bɔtaa nira n-lee bɔŋɔ hal ka sanʒiɛɣu mini kɔgbana ti wumd’ o noli?”

28Yisa ni daa du Galili Teeku duli m-paai Gɛrasa tiŋgbɔŋ ni ka alizin’ biɛri ni daa ʒi dɔbba ayi shɛb’ zuɣu yi gbala polo n-tuhir’ o sol’ na. Bɛ nini daa tuli pam hal ka so ku tooi gari bɛ ni be shɛli polo maa.

29Ka bɛ daa kuhi pam m-bɔhi, “Ti min’ a bɔ ni, nyin’ Naawuni Bia? A kamina ni a ti nahim ti ka saha na bi paai?”

30Kuruchu bɔbigu daa ʒe kpaŋ’ ha n-gbiri binyara ŋubira,

31ka alizin’ biɛri maa daa balim o yɛli, “A yi kari ti, nyin’ chɛ ka ti chaŋ ti kpe kuruchunim’ ŋɔ ni.”

32Ka o daa bahi ba noli yɛli, “Chamiya!” Ka bɛ daa yi dɔb’ maa ni n-chaŋ ti kpe kuruchunim’ maa ni; ka bɛ zaa daa dii zo wuriwuri nti sirigi kuligbiriŋ ni ha n-faai lu teeku ni, ka kom di ba.

33Ka bɛn daa guli kuruchunim’ maa zo nti kpe fɔŋ ni n-yɛli niriba dinkam daa niŋ maa mini din daa niŋ alizin’ biɛri ni daa ʒi dɔbba ayi shɛb’ zuɣu maa yɛla zaa.

34Nyama, ka tiŋ’ maa nim’ zaa daa kabina ni bɛ ti nya Yisa; bɛ ni daa ti nya o, ka bɛ balim o ni o yim’ bɛ tiŋgbɔŋ maa ni.

← Chapter 7 Jump to: Chapter 9 →