Jeremiah 48

Ewe 1913 (Biblia alo Ŋɔŋlɔ Kɔkɔe La Le Eʋegbe Me 1913)

← Chapter 47 Jump to: Chapter 49 →

1Ɖe Moab ŋu Ale Yehowa Zebaot, Israel ƒe Mawu la, gblɔ esi: Baba na Neho, elabena wogblẽe! Wòxɔ Kiryatayim, eye ŋukpe lée, wogbã mɔ̃ sesẽ la wòzu ŋukpe!

2Moab ƒe adegbeƒoƒo nu tso, wodo tame vɔ̃ ɖe eŋu le Xesbon be: Mina míatsrɔ̃e, ne womaganye dukɔ azɔ o! Woatsrɔ̃ wò Madmen hã, eye yi anɔ yowóme.

3Ɣli ɖi le Xoronayim be Gbegblẽ kple mumũ gã!

4Moab mũ dze anyi, eye wo viwo le ɣlikpɛ dom.

5Wole avi fam lia Luxit ƒe to dzi mɔ la, eye konyifaɣli le ɖiɖim le wo nu le Xoronayim ƒe abu nu le gbegblẽ la ta.

6Misi, miɖe miaƒe agbe, eye minɔ abe ame ɖeƒeƒle le gbegbe ene.

7Esi nèle dzi ɖom ɖe wò dɔwɔwɔwo kple wò kesinɔnuwo ŋu la, eyata woaxɔ wò hã, eye Kamos ayi aboyo me hekpe ɖe eƒe trɔ̃nuawo kple amegãwo ŋu.

8Nugblẽla ava du sia du me, eye dua ɖeke masi o, bali me nu ayi, eye tagba atsrɔ̃, abe alesi Yehowa gblɔ ene.

9Mina aʋala Moab, ne wòadzò adzo; eƒe duwo le aƒedo zu ge, amea ɖeke manɔ wo me o.

10Aɖi amesi le alɔgblɔlɔ wɔm le Yehowa ƒe dɔ ŋu la ŋuti, eye aɖi amesi he eƒe yi ɖe megbe tso ʋukɔkɔɖi me la ŋu kpekpekpe.

11Moab li bɔkɔɔ tso eƒe ɖevime ke, eɖo ƒã ɖi kpoo, eye wometrɔe tso goe me ko ɖe goe bubu me o, eye meyi aboyo me o, eyata eƒe vivi gale eŋu, eye eƒe ʋeʋẽ metrɔ o.

12Yehowa be: Eyata kpɔ ɖa, ŋkeke li gbɔna, eye madɔ goeviãlawo ɖa, ne woaviãe, woaɖi ƒuƒlu eƒe goewo, eye woagbã eƒe zewo.

13Ŋu akpe Moab ɖe Kamos ŋu, abe alesi ŋu kpe Israel ƒe aƒe la ɖe Betel, si ŋu woɖo dzi ɖo la ŋu ene.

14Aleke mianɔ gbɔgblɔm be: Kalẽtɔwo míenye, eye ŋutsu aʋamewo míenye?

15Fia, si ŋkɔ nye Yehowa Zebaot la be: Moab kple eƒe duwo gblẽla gbɔna xoxo, eye eƒe ɖekakpui tiatiawo yina ɖe amewuƒe.

16Moab ƒe gbegblẽ tu aƒe, ne woava eme, eye eƒe dzɔgbevɔ̃e le du dzi ŋutɔ.

17Mi eƒe aƒelikawo katã kple amesiwo katã nya eƒe ŋkɔ la, mifa nɛ! Migblɔ be: Aleke ati tɔɖeŋu sesẽ la, atikplɔ nyo la ŋe?

18Dibon-nyɔnuvi, ɖi tso wò ŋutikɔkɔe me, nabɔbɔ nɔ ke me; elabena Moab-gblẽla le ƒoƒo ge ɖe dziwò, eye wòagblẽ wò mɔ sesẽwo.

19Aroer-nyɔnu, va tsi tre ɖe mɔ to nanɔ ŋu tsam, bia amesiwo si, eye wokplɔ la bena: Nya kae dzɔ?

20Ŋukpe lé Moab, elabena wogbãe. Mifa avi, eye mido ɣli, mido boblo le Arnon nu be: Wogblẽ Moab!

21Ʋɔnudɔdrɔ̃ va gbadzaƒe nyigba, Xolon, Yaza kple Mefaat dzi,

22Dibon, Neho kple Bet-Diblatayim dzi.

23Kiryatayim, Bet-Gamul kple Bet-Meon dzi,

24Keriyot kple Bozra kpakple Moab-nyigba ƒe du, siwo katã le didiƒe kple kpuiƒe la dzi.

25Yehowa be: Wòŋe Moab ƒe dzo, eye wolã eƒe alɔ.

26Mina aha Moab, ne wòano amu, be wòadze anyi ɖe eƒe xeɖeɖe me, ne eya hã nazu alɔmeɖenu, elabena Yehowa ŋu wòtɔ asi akɔ ɖo.

27Ɖe Israel mezu alɔmeɖenu na wò oa? Fiafiwo domee wolée le, hafi ne ènya ƒo nu le eŋu ko la, nènɔa ta ʋu ʋuma?

28Mi Moabitɔwo, migblẽ miaƒe duwo ɖi, ne miaɖanɔ agatowo me, minɔ abe akpakpa, si wɔ atɔ ɖe agakpewo toga ene.

29Míese Moab dadala ŋkɔ be, edoa eɖokui ɖe dzi ŋutɔ, eƒoa adegbe, edana, edzraa eɖokui, eye eƒe dzi doa eɖokui ɖe dzi.

30Yehowa be: Menya eƒe dɔmedzoe dodo kple eƒe numeɖiɖi, eƒe nu wɔwɔ mele ɖeke me o.

31Eyata mafa avi ɖe Moab ŋu, mado ɣli ɖe Moab blibo la ŋu, eye maɖe hã ɖe Kir-Xeres-ŋutsuwo ŋu.

32Sibna ƒe weinka, mafa avi na wò, wu alesi mefa avi na Yaezer, wò kawo to atsiaƒu dzi vaseɖe ƒu nu le Yaezer, nugblẽla va ƒo ɖi le wò kutsetsegbeɣi kple wò weinxaɣi.

33Dzidzɔ kple aseyetsotso nu tso le agblewo me le Moab-nyigba dzi; metsi wein nu le weinfiãnu me, eye womagafiã wein kple aseyetsotso azɔ o; aseyetsotso maganye aseyetsotso o!

34Le Xesbon ƒe aƒadodo, si ɖi vaseɖe Eleale kple Yahaz ta wodo ɣli tso Zoar va ke ɖe Xoronayim vaseɖe Eglat etɔ̃lia ke, elabena Nimrim ƒe tsiwo hã amie.

35Yehowa be: Matsrɔ̃ amesiwo dea nuxeƒe, eye woɖoa dzudzɔ na woƒe mawuwo la ɖa le Moab.

36Eyata nye dzi axa nu ɖe Moab ŋu abe dzekuku ene, eye nye dzi axa nu ɖe Kir-Xeres-ŋutsuwo ŋu abe dzekuku ene, elabena nusiwo wotu ɖo la ƒe mlɔea dɔ̃.

37Elabena tawo katã nye ta kokoe, wolũ gewo katã, abi kuku teƒe le asiwò katã ŋu, eye akpanya le aliwo katã dzi.

38Amewo katã le nu xam le Moab ƒe xɔtawo katã kple eƒe kpɔdomeewo katã, elabena megbã Moab abe ze manyomanyo ene.

39Aleke wòhegbãe ale? Mifa avi! Aleke Moab trɔ megbe kple ŋukpee? Moab zu alɔmeɖenu kple bibi na eƒe aƒelikawo katã.

40Elabena ale Yehowa gblɔ esi: Futɔ la adzo abe hɔ̃ ene, eye wòake aʋala ɖe Moab dzi!

41Wòxɔ duwo, eye wòxɔ mɔ̃ sesẽwo. Moab-kalẽtɔwo ƒe dzi le ɣemaɣi abe nyɔnu, si le ku lém ƒe dzi ene.

42Wotsrɔ̃ Moab, eye meganye dukɔ azɔ o, elabena etɔ asi akɔ ɖe Yehowa ŋu.

43Mi Moabitɔwo, Yehowa be: Ŋɔdzi, ʋe kple mɔ̃ka le mia ŋu.

44Amesi si le ŋɔdzi nu la, age adze ʋe me, eye amesi do le ʋe me la, mɔ̃ka aɖee. Elabena Yehowa be: Mahe toheɣi avae na Moab.

45Amesisiawo tsra wɔɔ ɖe vɔvɔli te le Xesbon; elabena dzo tso Xesbon, eye dzoƒaɖe tso Sixon, efiã Moab ƒe tonuƒui kple ʋunyaʋunyaviwo ƒe dzodzome.

46Moab, baba na wò! Kamos-dukɔ tsrɔ̃, elabena wokplɔ wò ŋutsuviwo ɖade gaxɔ me, eye wokplɔ wò nyɔnuviwo yi aboyo mee.

47Yehowa be: Ke magaɖo Moab te le ŋkeke mlɔeawo me. Moab ƒe ʋɔnudɔdrɔ̃ seƒe enye si.

← Chapter 47 Jump to: Chapter 49 →

Recommended Reading

Commentary Jeremiah Commentaries → Devotional Jeremiah Devotional Guide → Get This Bible Ewe (Biblia alo Ŋɔŋlɔ Kɔkɔe La Le Eʋegbe Me ) Study Bible →